80
Womu ɡe Asɑfu u wom kowobun wiruɡii kuɑ kɑ mɔrɔku. Ge wee.
Wunɛ Isirelibɑn kpɑro, ɑ swɑɑ dɑkio ɑ nɔ.
Wunɛ wi ɑ rɑ wunɛn tɔmbu kpɑre nɡe yɑ̃ɑ ɡɔ̃ɔ,
mɑ ɑ sɔ̃ wɔllun kɔ̃sobun suunu sɔɔ,
ɑ tii sɔ̃ɔsio wunɛn yiiko sɔɔ.
A bɛsɛ Efɑrɑimu kɑ Bɛnyɑmɛɛ kɑ Mɑnɑsen bwese kɛri wunɛn dɑm sɔ̃ɔsio,
kpɑ ɑ sun fɑɑbɑ ko.
Yinni Gusunɔ, ɑ sun wɔro.
A kɑ sun nɔnu ɡeu mɛɛrio, kpɑ ɑ sun fɑɑbɑ ko.
Gusunɔ wɔllu kɑ tem Yinni,
sere sɑɑ yerɑ̀ kɑɑ n kɑ sun mɔru sɑ̃ɑ
ɑ n bɛsɛn kɑnɑru yinɑmɔ.
Wee ɑ derɑ nuku sɑnkirɑnu nu kuɑ bɛsɛn dĩɑnu,
mɑ ɑ derɑ bɛsɛn nɔni yĩresu kuɑ bɛsɛn nim.
A derɑ be bɑ kɑ sun sikerenɛ bɑ sɑnnɑmɔ bɛsɛn sɔ̃.
Mɑ bɛsɛn yibɛrɛbɑ bɑ sun yɛ̃ɛmɔ.
Gusunɔ wɔllu kɑ tem Yinni, ɑ sun wɔro.
A kɑ sun nɔnu ɡeu mɛɛrio kpɑ su fɑɑbɑ wɑ.
Wee ɑ resɛm dɑ̃ɑ wukɑmɑ Eɡibitin di,
mɑ ɑ tɔmbu seeyɑ ben wɑ̃ɑ yenun di,
mɑ ɑ resɛm ye ɡirɑ mi.
10 A ye ɑyeru kuɑ mɑm mɑm, mɑ yɑ seewɑ yɑ nuwi ɡirɑ.
Yɑ kpɛ̃ɑ yɑ tem kpuro
11 kɑ ɡuunu wukiri,
mɑ yen kɑ̃ɑsi yi kpɛ̃ɑ nɡe dɑ̃ɑ ye bɑ mɔ̀ sɛduru.
12 Yen kɑ̃ɑsi yi, yi dɑ sere nim wɔ̃kuɔ,
mɑ yin nuwi yi dɑ sere dɑɑ bɑkɑrɔ yi kpɑrɑ.
13 Yinni Gusunɔ, mbɑn sɔ̃nɑ ɑ yen kɑrɑn ɡɑmbo kɔsukɑ,
mɑ ɑ derɑ be bɑ sɑrɔ mi, bɑ ye ɡurɑmɔ.
14 Mɑ ɑ derɑ sɑkɑnu kɑ ɡbeeku yɛɛ yi yi tie, yi nɑɑmɔ yi ye dimɔ.
15 Gusunɔ, wɔllu kɑ tem Yinni, ɑ wurɑmɑ.
A mɛɛrio wɔllun di kpɑ ɑ wunɛn resɛm ye nɔni doke.
A ye kɔ̃suo.
16 A resɛm dɑ̃ɑ te nɔɔrio
te, te tɑ sɑ̃ɑ nɡe wunɛn bii wi ɑ ɡɔsɑ.
17 Wee bɑ resɛm bɔɔrɑ bɑ dɔ̃ɔ mɛni.
A bu mɔru kɔsieyo bu ɡbi.
18 A de wunɛn dɑm mu n kɑ wi ɑ ɡɔsɑ u sɔ̃ wunɛn nɔm ɡeuɔ wɑ̃ɑ.
19 Sɑɑ yerɑ sɑ ǹ mɑɑ kɑ nun tondɑmɔ.
A de sɑ n wɑ̃ɑ kpɑ sɑ n nun sɑ̃ɑmɔ.
20 Gusunɔ, wɔllu kɑ tem Yinni, ɑ sun wɔro.
A kɑ sun nɔnu ɡeu mɛɛrio, kpɑ su fɑɑbɑ wɑ.