Yinni, sɑɑ yellun di, wunɑ ɑ sɑ̃ɑ bɛsɛn kuku yeru.

2 A sɑ̃ɑwɑ Gusunɔ ɑ sere ɡuunu kɑ hɑnduniɑ tɑkɑ kuɑ.

Mɛyɑ kɑɑ n mɑɑ sɑ̃ɑ sere kɑ bɑɑdommɑɔ.

3 A rɑ de tɔnu u ɡɔsirɑ tuɑ.

A rɑ nùn sɔ̃ ɑ nɛɛ, u ɡɔsiro min di, u we.

4 Wunɛn mi, wɔ̃ɔ nɔrɔbu (1.000) rɑ n sɑ̃ɑwɑ nɡe ɡĩɑn tɔ̃ru te tɑ doonɑ kɔ,

ǹ kun mɛ nɡe wɔ̃kurun sɑ̃kiru.

5 A rɑ tɔnun wɑ̃ɑru nɔru koosiewɑ nɡe mɛ dosu ɡɑ rɑ doonɛ bururu.

Gɑ ku rɑ tɛ nɡe yɑkɑsu

6 sìn wɛ̃su rɑ n bɑɑre bururu,

ǹ n kuɑ yokɑ bu su burɑ kpɑ su ɡberɑ.

7 Wunɛn mɔru yɑ derɑ sɑ ɡɔɔ dɔɔ.

Mɑ sɑ nɑndɑ yen sɑɑbu.

8 A rɑ bɛsɛn torɑnu terɑsiewɑ wunɛn wuswɑɑɔ,

kpɑ wunɛn yɑm bururɑm mu bɛsɛn ɑsiri kpuro sɔ̃ɔsi.

9 Bɛsɛn wɑ̃ɑru tɑ rɑ doonɛwɑ wunɛn mɔrun sɔ̃.

Tɑ rɑ doonɛwɑ nɡe wɛ̃siɑ teeru.

10 Tɔnun wɑ̃ɑru tɑ rɑ turi sere wɔ̃ɔ wɑtɑ kɑ wɔkuru,

wi u mɑɑ dɑm mɔ, wɔ̃ɔ wɛnɛ,

ɑdɑmɑ kɑ mɛ, tɔnun wɑ̃ɑrɑ ku rɑ n ɑrufɑɑni ɡɑɑ mɔ

sere wɑhɑlɑ kɑ nɔni swɑ̃ɑru.

Domi tɑ rɑ doonɛwɑ fuuku ɡɔri ɡiɑ.

11 Wɑrɑ u wunɛn mɔrun dɑm yɛ̃.

Wɑrɑ u nun nɑsie yen sɔ̃.

12 A de sɑ n yɛ̃ mɑ bɛsɛn wɑ̃ɑrun tɔ̃rɑ kun dɛ̃u,

kpɑ su ko bwisiɡibu.

13 Yinni Gusunɔ, sere dommɑ kɑɑ ɡɔ̃ru ɡɔsiɑ ɑ wunɛn mɔru deri.

A bɛsɛ wunɛn sɔm kowobun wɔnwɔndu wɑɑwo.

14 A sun wunɛn durom bɑkɑm sɔ̃ɔsio bururu bɑɑtere.

Kpɑ sɑ n nuku dobu mɔ sɑ n womusu mɔ̀ bɛsɛn wɑ̃ɑrun tɔ̃ru kpuro sɔɔ.

15 A sun nuku dobu wɛ̃ɛyɔ nɡe mɛ̀n nɔɔ ɑ sun sɛɛyɑsiɑ.

Kpɑ ɑ bɛsɛn nuku sɑnkirɑ ten wɔ̃su ɡɔsiɑ nuku dobun wɔ̃su.

16 A de su wunɛn sɔmɑ wɑ bɛsɛ wunɛn sɔm kowobu,

kpɑ ɑ bɛsɛn bibun bweseru wunɛn yiiko sɔ̃ɔsi.

17 Gusunɔ bɛsɛn Yinni, ɑ sun durom kuo,

kpɑ ɑ de bɛsɛn sɔmɑ kpuro yu ɑrufɑɑni ko.