kon Yinni Gusunɔ siɑrɑ.

Kon win yĩsi dɛɛrɑru tɔmɑ kɑ nɛn ɡɔ̃ru kpuro.

2 Kon Yinni Gusunɔ siɑrɑ.

Win ye u kuɑ, nɑ ǹ duɑrimɔ, bɑɑ yen tiɑ.

3 U rɑ mɑn nɛn torɑnu kpuro suuru kue.

U rɑ nɛn bɑrɑnu kpuro kpeesie.

4 U rɑ mɑn yɑre sɑɑ siki wɔrun di.

U rɑ mɑn durom kɑ wɔnwɔndu kue.

5 U rɑ nɛn wɑ̃ɑru doo nɔɔru yibie.

Kpɑ u mɑn ko nɡe ɑluwɑɑsi nɛn tɔkɔru sɔɔ,

nɑ n dɑm mɔ nɡe ɡunɔ bɑkeru te tɑ yɔ̃ɔwɑ.

6 Yinni Gusunɔ u rɑ siriwɑ ɡem sɔɔ.

U rɑ be bɑ dɑm dɔremɔ wɔre.

7 U Mɔwisi win woodɑbɑ sɔ̃ɔsi.

Mɑ u Isirelibɑ win sɔm mɑɑmɑɑkiɡinu sɔ̃ɔsi.

8 Yinni Gusunɔ u wɔnwɔndu mɔ.

U rɑ mɑɑ tɔnu durom kue.

Win durom mu kpɑ̃.

Win mɔru ku rɑ se fuuku.

9 U ku rɑ tɔmbu ɡerusi kiri kiri.

U ku rɑ mɑɑ mɔru ko n kɑ tɛ.

10 U ku rɑ sun sɛɛyɑsie nɡe mɛ bɛsɛn torɑrɑ nɛ.

U ku rɑ sun bɛsɛn torɑnu kɔsie.

11-12 Adɑmɑ nɡe mɛ sɔ̃ɔ yɑri yeru tɑ kɑ sɔ̃ɔ duu yeru tondinɛ,

nɡe mɛyɑ u rɑ mɑɑ bɛsɛn torɑnu tondɑsie.

Nɡe mɛ wɔllɑ kɑ tem tomɑ,

nɡe mɛyɑ win durom mu kpɑ̃ɑru nɛ be bɑ nùn nɑsien mi.

13 Nɡe mɛ tundo u rɑ n win bibun wɔnwɔndu mɔ,

nɡe mɛyɑ Yinni u be bɑ nùn nɑsien wɔnwɔndu mɔ.

14 Domi u yɛ̃ ye bɑ kɑ sun tɑkɑ kuɑ.

U ǹ duɑri mɑ yɑnimɑ bɑ kɑ sun mɔmɑ.

15 Tɔnun wɑ̃ɑrun tɔ̃nu nu ku rɑ tɛ.

Nu sɑ̃ɑwɑ nɡe yɑkɑsu.

U rɑ sewɑ nɡe dɑ̃ɑ wɛ̃su.

16 Woo ɡɑ̀ n su swee kpɑ su doonɑ.

Bɑɑ sin yĩreru ɑ ǹ mɑɑ wɑsi.

17-18 Adɑmɑ Yinni Gusunɔn durom mu rɑ n wɑ̃ɑwɑ sere kɑ bɑɑdommɑɔ

be bɑ nùn nɑsien mi, mɑ bɑ win ɑrukɑwɑni nɛni,

mɑ bɑ win woodɑbɑ mɛm nɔɔwɑmmɛ.

Mɛyɑ mɑɑ win ɡem mu rɑ n kɑ bu wɑ̃ɑ sere kɑ ben bibun bibɔ.

19 Yinni Gusunɔ u win sinɑ ɡɔnɑ tɛriɑ wɔllɔ.

Mɑ u bɑndu dii ɡɑ̃ɑnu kpuron wɔllɔ.

20 Bɛɛ Yinni Gusunɔn ɡɔrɑdobɑ, bɛɛ be i dɑm mɔ

i rɑ win ɡɑri mɛm nɔɔwɛ, i nùn siɑro.

21 Bɛɛ win tɑbu kowobu kpuro,

bɛɛ be i nùn sɑ̃ɑmɔ,

i win kĩru mɔ̀,

i nùn siɑro.

22 Bɛɛ win tɑkɑ koorɑ, i nùn siɑro mi u bɑndu dii kpuro.

Yinni Gusunɔ, kon nun siɑrɑ.