2 Gusunɔ, nɑ sɔɔru sɑ̃ɑ.

Kon womu ko kɑ nɛn dwee yɑ̃nu, kɑ nɛn ɡɔ̃ru kpuro.

3 Nɛn mɔrɔku kɑ nɛn ɡuuru, i dom yɑndo,

kpɑ n womu ko yɑm sɑ̃reru.

4 Yinni Gusunɔ, kon nun siɑrɑ tɔmbun suunu sɔɔ sere kɑ bɑɑdommɑɔ.

Kon nun womu kuɑ bwesenu sɔɔ.

5 Domi wunɛn tɔn ɡeerɑ kpɑ̃ tɑ wɔllu ɡirɑri.

Mɛyɑ mɑɑ wunɛn bɔrɔkinirɑ sɔ̃ɔsire sere ɡuru wirɔ.

6 Gusunɔ, ɑ seewo ɑ tii wɔlle suɑ.

Kpɑ wunɛn yiiko yu sɔ̃ɔsirɑ hɑnduniɑ kpuro sɔɔ.

7 Kpɑ ɑ wɑ ɑ kɑ bɛsɛ wunɛn kĩnɑsibu fɑɑbɑ ko.

A bɛsɛn kɑnɑru nɔɔwɔ kpɑ ɑ sun fɑɑbɑ ko kɑ wunɛn nɔm ɡeu.

8 Gusunɔ u ɡeruɑ win sɑ̃ɑ yee dɛɛrɑrɔ u nɛɛ, u koo nɑsɑrɑ wɑ.

U koo Sikɛmu bɔnu ko kpɑ u tɔmbu Sukɔtun wɔwɑ yɑbuɑ.

9 Wiyɑ u Gɑlɑdi mɔ. Wiyɑ u mɑɑ Mɑnɑse mɔ.

Efɑrɑimu yɑ sɑ̃ɑwɑ nɡe win sii furɔ kɔkɔru.

Mɑ Yudɑ yɑ sɑ̃ɑ nɡe win sinɑ dɛkɑ.

10 Adɑmɑ Mɔɑbu yɑ sɑ̃ɑwɑ win woburutiɑ.

U koo Edɔmu bɑrɑ nɔɔ teu kɔ̃ɔwɑ u kɑ sɔ̃ɔsi mɑ yɑ kuɑ wiɡiɑ.

Kpɑ u nuku dobun kuuki ko Filisitibɑn tem sɔɔ.

11 Wɑrɑ u koo kɑ mɑn dɑ wuu ɡbɑ̃rɑruɡuu ɡen mi.

Wɑrɑ u koo mɑn kpɑrɑ u kɑ dɑ Edɔmuɔ.

12 Yinni Gusunɔ, wunɑ kɑɑ kɑ mɑn dɑ, wunɛ wi ɑ rɑɑ sun yinɑ,

mɑ ɑ ku rɑ mɑɑ kɑ bɛsɛn tɑbu kowobu yɑri.

13 A sun somiɔ su kɑ yɑri nɔni swɑ̃ɑrun di.

Tɔnun somiru tɑ sɑ̃ɑwɑ wom dirum.

14 À n wɑ̃ɑ kɑ bɛsɛ, sɑ ko kpĩ su tɑbu ko kɑ wɔruɡɔru.

Kpɑ ɑ bɛsɛn yibɛrɛbɑ kɔsuku.