1 I Yinni Gusunɔ siɑro.

Kon Yinni Gusunɔ siɑrɑ kɑ nɛn ɡɔ̃ru kpuro.

Kon nùn siɑrɑ tɔn dɛɛrobun suunu sɔɔ.

2 Yinni Gusunɔn nɔmɑn sɔmɑ yɑ kpɑ̃.

Mɑ be bɑ ye kĩ bɑ kɑsu bu ye ɡiɑ.

3 Ye u kuɑ yɑ rɑ n ɡirimɑ kɑ bɛɛrɛ mɔwɑ.

Win ɡem mu rɑ n wɑ̃ɑwɑ sere kɑ bɑɑdommɑɔ.

4 U rɑ de su win sɔm mɑɑmɑɑkiɡinu yɑɑyɑ.

Yinni Gusunɔ u sɑ̃ɑwɑ duromɡii kɑ wɔnwɔnduɡii.

5 U rɑ be bɑ nùn nɑsie dĩɑnu wɛ̃,

kpɑ u win ɑrukɑwɑni yɑɑyɑ.

6 U win tɔmbu win sɔm mɑɑmɑɑkiɡinun dɑm sɔ̃ɔsi

ni u kɑ bu tɔn tukobun tem wɛ̃.

7 Win sɔm mɑɑmɑɑkiɡii ni, nu sɑ̃ɑwɑ ɡem mɑm mɑm.

Win woodɑbɑ bɑ mɑɑ nɑɑnɛ mɔ.

8 Yɑ ko n sirerewɑ sere kɑ bɑɑdommɑɔ,

domi bɑ ye kuɑwɑ ɡem sɔɔ mɑm mɑm.

9 U derɑ bɑ win tɔmbu yɑkiɑ.

Mɑ u kɑ bu ɑrukɑwɑni bɔkuɑ sere kɑ bɑɑdommɑɔ.

Win yĩsiru tɑ dɛɛre, tɑ mɑɑ nɑnum mɔ.

10 À n kĩ ɑ ko bwisiɡii, ɑ de ɑ ɡinɑ Gusunɔ nɑsiɑ.

Be bɑ bwisi mɔ, beyɑ bɑ rɑ yirɑ ye swĩi.

Win bɛɛrɛ yɑ ko n wɑ̃ɑwɑ sere kɑ bɑɑdommɑɔ.