Bibeli Gusunɔn Gari Womu Duro 1
WOMU GE GA DOBU BO
Kɑ Heberum bɑ tire te sokɑwɑ Womu ɡe ɡɑ dobu bo. Kurɔ kɑ durɔn kĩrun ɡɑriyɑ tɑ mɔ̀.
Yuubɑ bɑ tire ten ɡɑri weesinɑwɑ kɑ kĩi te Gusunɔ u win tɔmbu Isirelibɑ kĩɑ. Mɑ nɑɑnɛ dokeobu bɑ mɑɑ tu weesinɑ kɑ kĩi te Yesu Kirisi u win yiɡbɛru kĩɑ.
Tire ten kpunɑɑ
1. Womu 1, wiru 1.1n di sere wiru 2.7.
2. Womu 2, wiru 2.8-17.
3. Womu 3, wiru 3.1n di sere wiru 5.1.
4. Womu 4, wiru 5.2n di sere wiru 6.3.
5. Womu 5, wiru 6.4n di sere wiru 7.11.
6. Womu 6, wiru 7.12n di sere wiru 8.5ɑ.
7. Womu 7, wiru 8.5b-14.
1
Womu ɡe ɡɑ dobu bo wee. Sɑlomɔɔwɑ ɡɑ kɑ yɑ̃.
Kurɔ kɑ durɔn fɑɑɡi
Kurɔ u nɛɛ,
ɑ mɑn sɔ̃suo kɑ wunɛn tiin nɔɔ.
Domi wunɛn kĩrun kookoosu su tɑm dobu kere.
Wunɛn wɑni yi nuburu do.
A sɑ̃ɑwɑ nɡe turɑre ye yɑ pusɑ.
Yen sɔ̃nɑ wɔndiɑbɑ bɑ nun kĩ.
A mɑn tii ɡɑwemɑ kpɑ su nun nɑɑ swĩi kɑ dukɑ.
A sɑ̃ɑwɑ nɛn sunɔ, ɑ kɑ mɑn doo wunɛn wɑ̃ɑ yerɔ.
Wunɛn sɑɑbuwɑ sɑ nuku dobu mɔ.
Wunɛn kĩru tɑ tɑm dobu kere.
Bɑ ɡem mɔ be bɑ nun kĩ.
Yerusɑlɛmun wɔndiɑbɑ, i swɑɑ dɑkio i nɔ.
Nɑ tĩri, ɑdɑmɑ nɑ sɑ̃ɑ kurɔ burɔ.
Nɑ tĩri nɡe Kedɑɑn kuu bekuruɡinu,
ɑdɑmɑ nɑ wɑ̃wɑ nɡe beku kɑrenu ni nu wɑ̃ɑ Sɑlomɔɔn sinɑ kpɑɑrɔ.
I ku mɑn ɡɛm yèn sɔ̃ nɑ tĩri.
Sɔ̃ɔwɑ u mɑn kuɑ mɛ.
Nɛn sesubu bɑ kɑ mɑn mɔru kuɑ.
Bɑ mɑn kuɑ ben reseɛm dɑ̃ɑ ɡbɑɑrun kɔ̃so.
Adɑmɑ nɑ ǹ nɛn tiiɡiru kɔ̃su.
A mɑn sɔ̃ɔwɔ nɛn kĩnɑsi mi ɑ rɑ wunɛn sɑbenu kpɑre,
kɑ mi ɑ rɑ de nu sɔ̃ɔ sure.
Kpɑ nɑ kun mɑɑ sirenɛ wunɛn berusebun sɑbenun suunu sɔɔ.
Yɑ̃ɑ kpɑrobɑ nɛɛ,
wunɛ wi ɑ tɔn kurɔbu kpuro burɑm kere,
ɑ̀ kun yɑm mi yɛ̃, ɑ doo ɑ yɑ̃ɑ ɡɔ̃ɔn yirɑ swĩi.
Kpɑ ɑ wunɛn bonu kpɑrɑ kpɑrobun wɑ̃ɑ yerun bɔkuɔ.
Durɔ u nɛɛ,
nɛn kĩnɑsi, ɑ kɑ dum niɑ weenɛ
ye yɑ Eɡibitin sunɔn tɑbu kɛkɛ ɡɑwɑmɔ.
10 Wunɛn burɑ yɑ̃nu nu rɑ de wunɛn bɑɑnu nu mɑn wɛ̃re.
Wunɛn wĩirɑ kɑ ɡoonu wɑ̃.
Yɑ̃ɑ kpɑrobɑ nɛɛ,
11 sɑ ko nun sɑbɑ kuɑ ye yɑ wurɑ kɑ sii ɡeesu mɛnnɛ.
Kurɔ u nɛɛ,
12 sɑnɑm mɛ sinɑ boko u sɔ̃ kɑ wiɡibu,
nɛn turɑren nuburɑ pusɑ.
13 Nɛn kĩnɑsi u nuburu dowɑ nɡe turɑre ye bɑ mɔ̀ miru,
ye yɑ sure nɛn tororɔ.
14 Nɛn kĩnɑsi u sɑ̃ɑwɑ nɡe dɑ̃ɑ wɛ̃ɛ burɑsu.
Su rɑ kpiwɑ resɛm dɑ̃ɑ ɡbɑɑrɔ Enɡɛdiɔ.
Durɔ u nɛɛ,
15 nɛn kĩnɑsi, ɑ sɑ̃ɑwɑ kurɔ burɔ.
Wunɛn nɔni yi bɑllimɔ nɡe wɑɑ bɑkɑɡii.
Kurɔ u nɛɛ,
16 nɛn kĩnɑsi, ɑ sɑ̃ɑwɑ durɔ burɔ,
wunɑ ɑ mɑn wɛ̃re.
Bɛsɛn kpin yeru tɑ ko n nɔɔ nɛ nɡe yɑkɑ bekusu.
17 Dɑ̃ɑ ye bɑ mɔ̀ sɛduru, yerɑ bɑ kɑ bɛsɛn dirun dɑ̃ɑ mwɑɑnɑtiɑ kuɑ.
Mɑ bɑ ten yɑri kuɑ kɑ dɑ̃ɑ ye bɑ mɔ sipɛrɛ.