SAKARI
Sɑkɑri kɑ Asee, wɑɑti tiɑ sɔɔrɑ bɑ ben sɔmburu kuɑ. Adɑmɑ ben ɡɑri kun sɑ̃ɑ tiɑ. Asee u Isirelibɑ kirɔ kuɑwɑ bu kɑ Yinni Gusunɔn sɑ̃ɑ yeru bɑni. Mɑ Sɑkɑri u ɡeruɑ ye yɑ siɑ wee ye yɑ kɑ hɑnduniɑɡibu kpuro yɑ̃. Win kɑ̃si dɑbi ni u wɑn sɔ̃, u tɔmbu kirɔ kuɑ bu kɑ ɡɔ̃ru ɡɔsiɑ. U nɛɛ, sunɔ wìn nɔɔ mwɛɛru Gusunɔ u kuɑ, u koo nɑ u bɑndu di kpɑ u tɔmbu yɑkiɑ yorun di.
Sɑ ko kpĩ su tire ten ɡɑri bɔnu ko yiru.
Tire ten kpunɑɑ
1. Sɑkɑrin kɑ̃si ni u wɑ kɑ win kirɔbɑ, wiru 1n di sere wiru 8.
2. Ye yɑ koo koorɑ siɑ, wiru 9n di sere wiru 14.
SAKARIN KÃSINU
1
Yinni Gusunɔ u win tɔmbu sokumɔ bu wurɑmɑ
Dɑrusin bɑndun wɔ̃ɔ yirusen suru nɔɔbɑ itɑse sɔɔrɑ Yinni Gusunɔ u kɑ win sɔmɔ Sɑkɑri, Berekiɑn bii, Idon debubu ɡɑri kuɑ u nɛɛ, nɛ, Yinni Gusunɔ nɑ kɑ bɛɛn bɑɑbɑbɑ mɔru kuɑ too. Yen sɔ̃, nɑ bɛɛ sɔ̃ɔmɔ, i wurɑmɑ nɛn mi, kpɑ nɛ, Gusunɔ wɔllu kɑ tem Yinni n mɑɑ wurɑ bɛɛn mi. Nɛ, Yinni Gusunɔwɑ nɑ yeni ɡeruɑ. I ku kɑ bɛɛn bɑɑbɑbɑ weenɑ be nɛn sɔmɔ ɡbiikobu bɑ nɛn ɡɑri sɔ̃ɔwɑ bɑ nɛɛ, bu ben dɑɑ kɔ̃sɑ derio. Adɑmɑ bɑ ǹ sɔmɔ be swɑɑ dɑki bu sere mɑn mɛm nɔɔwɑ. Mɑnɑ bɛɛn bɑɑbɑ be, bɑ wɑ̃ɑ tɛ̃. Sɔmɔ ben tii, bɑ wɑ̃ɑ sere kɑ tɛ̃? Aɑwo, bɑ ɡu. Kɑ mɛ, woodɑ kɑ ɡɑri yi nɑ nɛn sɔmɔ be wɛ̃, bɑ yi bɛɛn bɑɑbɑbɑ sɔ̃ɔwɑ, mɑ bɑ ɡɔ̃ru ɡɔsiɑ bɑ nɛɛ, nɛ Gusunɔ wɔllu kɑ tem Yinni nɑ bu kuɑ nɡe mɛ nɑ ɡɔ̃ru doke ben dɑɑ kɔ̃sɑn sɔ̃.
Sɑkɑri u dumi wɑ kɑ̃siru sɔɔ
Dɑrusin bɑndun wɔ̃ɔ yirusen suru wɔkurɑ tiɑse, wi bɑ mɔ̀ Sebɑti, win sɔ̃ɔ yɛndɑ nnɛse sɔɔrɑ Yinni Gusunɔ u kɑ win sɔmɔ Sɑkɑri, Berekiɑn bii, Idon debubu ɡɑri kuɑ kɑ̃siru sɔɔ. Wee ye u wɑ kɑ̃si te sɔɔ. Wɔ̃kuru, u durɔ ɡoo wɑ u dum swɑ̃ɑ sɔni u kɑ yɔ̃ dɑ̃nu ɡɑnun suunuɔ, wɔwɑ ɡɑɑ sɔɔ. Mɑ dum swɛ̃ɛ kɑ dum bɛrɔ wurusu kɑ dum kɑɑbɑ yi wɑ̃ɑ win biruɔ. Mɑ u bikiɑ u nɛɛ, nɛn Yinni, mbɑ dumi yin tubusiɑnu.
Mɑ Gusunɔn ɡɔrɑdo wi, u nùn sɔ̃ɔwɑ u nɛɛ, kon nun yi tubusiɑ. 10 Yerɑ u nùn sɔ̃ɔwɑ u nɛɛ, dumi yi, yi sɑ̃ɑwɑ yi Gusunɔ u ɡɔrimɑ yi kɑ tem bukiɑnɑ.
11 Mɑ dumi yin tii yi ɡɔrɑdo wi sɔ̃ɔwɑ yi nɛɛ, sɑ tem bukiɑnɑ sɑ wɑ mɛ kpuro mu wɑ̃ɑ bɔri yɛndu sɔɔ.
12 Mɑ ɡɔrɑdo wi, u nɛɛ, Gusunɔ wɔllu kɑ tem Yinni, sere sɑɑ yerɑ̀ kɑɑ Yerusɑlɛmu kɑ Yudɑbɑn wuu si su tien wɔnwɔndu wɑ, si ɑ kɑ mɔru sɑ̃ɑ sɑɑ wɔ̃ɔ wɑtɑ kɑ wɔkurun di.
13 Mɑ Yinni Gusunɔ u ɡɔrɑdo wi wisɑ kɑ ɡɑri dori yi yi nùn ɡɔ̃ru yɛmiɑ.
Yinni Gusunɔ
u koo kpɑm Yerusɑlɛmu ɡɔsi
14 Gɔrɑdo wi, u mɑɑ nùn sɔ̃ɔwɑ u nɛɛ, ɑ ɡeruo ɑ nɛɛ, ɑmɛniwɑ wi, Yinni Gusunɔ u ɡeruɑ.
U nɛɛ, u Yerusɑlɛmu kɑ Siɔnin kĩru mɔ tɑ kpɑ̃.
15 Mɛyɑ u kɑ bwese ni nu tii sue mɔru mɔ̀.
Yellu u rɑɑ kɑ nu mɔru kuɑ fiiko.
Mɑ nu Yerusɑlɛmu kɔ̃sɑ kuɑ.
16 Yen sɔ̃nɑ wi, Gusunɔ wɔllu kɑ tem Yinni u nɛɛ,
u koo Yerusɑlɛmun wɔnwɔndu ko.
Bɑ koo win sɑ̃ɑ yeru bɑni.
Kpɑ bu Yerusɑlɛmun kpɛɛkpɛɛku yĩire.
17 Win wusu su koo dukiɑ yibu.
U koo mɑɑ Yerusɑlɛmu nukuru yɛmiɑsiɑ.
Kpɑ u mɑɑ ye ɡɔsi win tiin sɔ̃.
Wi, Gusunɔ, wɔllu kɑ tem Yinniwɑ u yeni ɡeruɑ.
Sɑkɑri u kɔbi nnɛ
kɑ sekobu nnɛ wɑ kɑ̃siru sɔɔ