4
1 Gusunɔn ɡɔrɑdo wi u kɑ Sɑkɑri ɡɑri mɔ̀ u nɑ u nùn yɑmiɑ nɡe mɛ bɑ rɑ tɔnu dom yɑmiɛ. 2 Mɑ u nùn bikiɑ u nɛɛ, mbɑ ɑ wɑɑmɔ mi.
Mɑ u nùn wisɑ u nɛɛ, wurɑn dɑbuwɑ nɑ wɑɑmɔ ɡèn wɔllɔ bɑ wekeru ɡɑru sɔndi. Weke te, tɑ kɑ̃ɑnu nɔɔbɑ yiru mɔ. Nin wɔllɔwɑ bɑ fitilɑnu sɔndi tiɑ tiɑ. Kɑ̃ɑ nin min diyɑ ɡum mu rɑ kɑ de fitilɑ nin mi. 3 Olifin dɑ̃nu yiru yɑ wɑ̃ɑ weke ten bɔkuɔ. Teeru nɔm dwɑru ɡiɑ, teeru mɑɑ nɔm ɡeu ɡiɑ.
4 Mɑ Sɑkɑri u wure u ɡɔrɑdo wi bikiɑ u nɛɛ, yinni, mbɑ yenibɑ kpuron tubusiɑnu.
5 Mɑ Gusunɔn ɡɔrɑdo u nɛɛ, ɑ ǹ yen tubusiɑnu yɛ̃?
6a Mɑ Sɑkɑri u nɛɛ, ɑɑwo, yinni. Mɑ ɡɔrɑdo u nɛɛ, 10b fitilɑ nɔɔbɑ yiru ye, yɑ sɑ̃ɑwɑ Yinni Gusunɔn nɔni yi yi tem bukiɑnɑmɔ.
11 Mɑ Sɑkɑri u mɑɑ nɛɛ, mbɑ olifin dɑ̃nu yiru ye yɑ wɑ̃ɑ dɑbu ɡen nɔm ɡeuɔ kɑ ɡen nɔm dwɑrɔ min tubusiɑnu.
12 U mɑɑ bikiɑ u nɛɛ, mbɑ olifin kɑ̃ɑnu yiru yen tubusiɑnu ni nu wɑ̃ɑ dɑbun kɑ̃ɑnu yiru yen bɔkuɔ, mìn di ɡum kokumɔ nɡe wurɑ.
13 Yerɑ u wisɑ u nɛɛ, ɑ ǹ nin tubusiɑnu yɛ̃?
Mɑ u nɛɛ, ɑɑwo, Yinni.
14 U nùn wisɑ u nɛɛ, nu sɑ̃ɑwɑ tɔmbu yiru be nɑ ɡɔsɑ bɑ nɛ, tem kpuron Yinni sɑ̃ɑmɔ.
Nɔɔ mwɛɛnu Sorobɑbɛlin sɔ̃
6b Yerɑ u mɑɑ nɛɛ, wee ye Yinni Gusunɔ u Sorobɑbɛli sɔ̃ɔmɔ. U nɛɛ,
n ǹ mɔ kɑ wi, Sorobɑbɛlin dɑm
ǹ kun mɛ kɑ win yiikowɑ
u koo kpĩ u sɔmburu ko.
Adɑmɑ kɑ wi, Gusunɔn Hunden dɑmɑ.
Wi, wɔllu kɑ tem Yinniwɑ u yeni ɡeruɑ.
7 U mɑɑ nɛɛ,
Sɑkɑri, mbɑ n dɑ n ɡuu bɑkɑ te tɑ wɑ̃ɑ Sorobɑbɛlin wuswɑɑɔ.
Sorobɑbɛli wi, u koo tu kɔrɑ
kpɑ u kpee ɡeeru yɑrɑ
te bɑ koo sɔndi sɑ̃ɑ yerun wii kpiirɔ.
Sɑɑ ye sɔɔ, tɔmbu bɑ koo nuku dobun kuuki ko bɑ n mɔ̀
ɑnnɑ ɑ kpee burɑru wɑ.
8 Yinni Gusunɔ u mɑɑ Sɑkɑri sɔ̃ɔwɑ u nɛɛ,
9 Sorobɑbɛliwɑ u dii ten kpɛɛkpɛɛku swĩi.
Wiyɑ u koo mɑɑ ten bɑnɑ wiru ɡo.
Sɑɑ ye sɔɔrɑ nɛn tɔmbu bɑ koo ɡiɑ mɑ nɛ, Gusunɔ wɔllu kɑ tem Yinniwɑ nɑ nun ɡɔrimɑ.
10a Yen sɔ̃, bu ku sɔmbu ten tore ɡɛm
bɑɑ tɑ̀ n sɑ̃ɑn nɑ piibu.
Bɑ koo nuku dobu ko
bɑ̀ n wɛ̃ɛ wɑ
yi bɑ rɑ kɑ ɡɑnɑn dɛndɑbu mɛɛri
Sorobɑbɛlin nɔmɑɔ.
Sɑkɑri u tireru wɑ tɑ yɔ̃ɔwɑ