3
Hodáay lóg o Hodáay hezmatkár
1 Brátán! Man gón shomá á paymá gapp jat nakort ke yakké gón ruhi mardomán gappa jant, anchosh habaron kort ke yakké gón jesmi mardomán habara kant, gwashay Masihi imáná shomá nonnok ét. 2 Man shomárá shir dát, trondén warákon*3:2 Trondén warák, bezán dhaddhén warák, hamá warák ke narm naent. nadát, chéá ke shomá trondén warák wárta nakort o angat ham wárta nakanét. 3 Shomá angat jesmi mardom ét. Shomárá ke hasadd mán o arh o korha kanét, gorhá shomá jesmi mardom ét o donyái kár kanagá ét. 4 Chéá ke wahdé yakké gwashit: “Man Pulosayg án” o yakké gwashit: “Man Apulosayg án” gorhá shomá jesmi mardom ét o bass. 5 Apulos chéé? Pulos chéé? É hezmatkár ant ke shomá hamesháni wasilahá imán áwortag o eshán hamá kár kortag ke Hodáwandá gwashtagant. 6 Man kesht, Apulosá áp dát, bale Hodáyá ródént. 7 Gorhá keshók o áp dayók, har do hecch naant, asl Hodá ent ke ródénók ent. 8 Keshók o áp dayók doénáni maksad yakkén ent o har yakkéá wati kár o zahmatay mozza rasit. 9 Chéá ke má Hodáay hamkár én o shomá Hodáay dhagár ét, Hodáay lóg ét.
10 Hamá rahmat ke Hodáyá maná bakshátag, hamáiay barkatá man chó zabrén bánbandéá bonred ér kort o degaré diwálá bandagá ent, bale har bánband báyad ent wati kárá pa delgósh bekant. 11 Bonred Issá Masih ent o é bonred ér kanag butag. Kass dega bonredé ér korta nakant. 12 Nun agan kasé é bonreday sará cha teláh o nograh o gránkimatén sengán lógé bandit yá cha dár o pog o palárá†3:12 Pog o palár, bezán dánay póst o hoshk butagén káh o sabzag., 13 áiay kár záhera bit. Chéá ke hamá róch ke gón ásá kayt, é kárá záhera kant. Ás wat harkasay kárá chakkásit ke chón ent. 14 Hamá mardom ke áiay bastagén lóga nasochit, á mardomá wati mozza rasit. 15 Agan lóg sotk o por but, bandóká mozzé narasit. Jendia rakkit‡3:15 Rakkag, bezán neját rasag, bacchag., bale chó hamá mardomá bit ke ásá kaptag o dar átkag.
16 Nazánét ke shomá Hodáay lóg ét o Hodáay Ruh shomay tahá jahmenend ent? 17 Harkas ke Hodáay lógá tabáh bekant, Hodá áiay jendá tabáha kant, chéá ke Hodáay lóg pák ent o é lóg shomá ét.
18 Kass watá rad madant. Agan cha shomá kasé watá donyáay hesábá dáná sarpada bit, á bezánt ke pa dáná bayagá allami ent ke pésará nádán bebit. 19 Chéá ke Hodáay chammán donyái dánái nádánié. Anchó ke nebeshtah ent:
“Á, dánáyán cha áyáni jenday repk o honarán gipt.”§3:19 Ayyubay Ketáb 5:13.
20 É ham nebeshtah ent: “Hodáwanda zánt ke dánáyáni hayál náhudag*3:20 Náhudag, bezán bépáedag.o nákár ant.”†3:20 Zabur 94:11.
21 Gorhá kass mardománi sará pahr mabandit, chéá ke sajjahén chizz pa shomá ant, 22 toré Pulos bebit yá Apulos yá Képá yá jahán yá zend yá mark yá annugén wahd yá áyókén wahd, sajjahén pa shomá ant o 23 shomá pa Masihá ét o Masih pa Hodáyá.