1 Oo brátán! Zalurat naent ke má wahd o rócháni bárawá pa shomá nebeshtah bekanén. 2 Chéá ke shomá sharriá zánét ke Hodáwanday róch chó shapi dozzéá kayt. 3 Hamá wahdá ke mardoma gwashant “amn o amán ent”, áyáni sará anágat*5:3 Anágat, bezán yabbará, achának, nágahán. tabáhié kayt, anchó ke lápporrén janénéay chellagi dard anágat káyant, o á tatka nakanant.

4 Bale, oo brátán! Shomá taháriá naét ke á róch chó dozzéá byayt o shomárá jáh beserrénit. 5 Chéá ke shomá drost rozhnay chokk ét, róchay chokk ét. Má shapay chokk naén, taháriay chokk naén. 6 Gorhá byáét máshomá é degaráni dhawlá nakanén o wába nakapén, ágaha mánén o hozzhára bén. 7 Chéá ke hamá ke wapsant, shapá wapsant o hamá ke sharába warant, shapá sharába warant o bésára bant. 8 Bale má ke róchay chokk én, má hozzhár bebén, imán o mehrá chó sénagpóshá bebandén o nejátay ométá chó jangi koláhá sará bekanén. 9 Chéá ke Hodáyá márá pa gazabay saggagá gechén nakortag, márá gechéni kortag ke wati Hodáwandén Issá Masihay barkatá berakkén†5:9 Rakkag, bezán neját rasag, bacchag.. 10 Á pa má mort ke má, toré zendag bebén yá marká wáb, gón áiá zendag bemánén. 11 Paméshká yakdomiá delbaddhi bedayét o wati imánay rost o rodómá yakdegará komakk bekanét, anchó ke shomá annun kanagá ét.

12 Oo brátán! Nun má cha shomá dazbandia kanén, hamá mardomán ezzat bedayét ke shomay nyámá zahmat kasshagá ant o Hodáwanday ráhá shomay master ant o shomárá sar o sój kanagá ant. 13 Áyáni káray sawabá áyán báz ezzat bedayét o dóst bedárét. Gón yakdomiá pa émeni zend begwázénét. 14 Brátán! Má cha shomá dazbandia kanén, hamá ke tambal o jándozz ant, áyán sarpad bekanét, hamá ke delprósh ant, áyán delbaddhi bedayét, hamá ke nezór ant, áyán komakk bekanét o sajjahénáni bardáshtá bekanét. 15 Hayálá bedárét ke kass badiay badalá badi makant. Badi makanét o modám pa yakdegará o pa harkasá sharriay randá bebét. 16 Modám gal o shádán bebét. 17 Har wahdá dwá bekanét. 18 Har paymén jáwaráni‡5:18 Jáwar, bezán hálat. tahá Hodáay shográ begerét, chéá ke pa shomá Hodáay razá hamesh ent, shomá ke Issá Masihayg ét. 19 Pákén Ruhay ásá makoshét. 20 Péshgóián kamsharap makanét, 21 bale har chizzá bechakkásét o hamá ke sharr ent, hamáiá wati kerrá bedárét. 22 Cha har dhawlén badiá dur bebét.

23 Hodáay jend, émeniay Hodá shomárá sarjamiá pák o palgár bekanát. Tán may Hodáwandén Issá Masihay wátarr bayagá shomay arwáh o sáh o badan sarjamiá béayb bemánátant. 24 Hamá Hodá ke shomárá tawára kant, wati kawlay sará óshtátag o é kárá kant.

25 Brátán! Pa má dwá kanét. 26 Sajjahén brátán pa pákdeli bechokkét o salám sar kanét. 27 Man shomárá Hodáwanday námá hokma dayán ke é kágad pa sajjahén brátán wánag bebit. 28 May Hodáwandén Issá Masihay rahmat gón shomá gón bát.