Yuhannáay Domi Kágad
Yuhannáay Domi Kágaday Pajjár
Yuhannáay domi kágad gón kágaday nebeshtah kanók o hamá mardománi pajjárá bendáta bit ke áyáni námá kágad nebeshtah kanag butag. Nebeshtah kanók, é kágadá watá “kamásha” gwashit. Kamáshay gál pa kelisáay hásén sarók o ostádán kármarz butag. É kágad gón Yuhannáay awli kágadá sakk hamrang ent, paméshká Pákén Ketábay géshterén zántkára gwashant ke é kágad ham Issáay kásed Yuhannáyá nebeshtah kortag.
É kágad “dóstén bánok o áiay chokkáni” námá nebeshtah kanag butag. Zánaga nabit ke “bánok” hakk o delá yakk janéné yá báwarmandáni rombé, chéá ke “dósténay” gálay máná “gechéni” ham buta kant o modám pa kelisáyá kármarz butag. Kelisá janén yá bánok ham gwashag butag.
Yuhannáay Domi Kágaday ehmén gappé esh ent ke Issá, Masih ent o áiay sará imán árók yakdomiá allam dóst bedárant. Báwarmand habardár kanag butagant ke radén sar o sójáni randgiriá makanant. Yuhanná démay mardomán hál dayaga lóthit ke man eráda kortag ke shomay némagá byáyán o shomárá rástén sar o sój bekanán.
1
Salám o drót
1 Cha kelisáay kamáshay némagá,
pa gechén kortagén bánok o áiay chokkán*1:1 Bázén zántkáréay báwar esh ent ke “bánok” dega kelisáéá gwashag butag o “bánokay chokk”, á kelisáay báwarmand ant. ke pa del maná sakk dóst ant. Tahná maná na, hamá sajjahénán ham dóst ant ke rástiá zánant. 2 Paméshká márá dóst ant ke may delá rástiá jágah kortag o tán abad gón má hamráh ent. 3 Hodái mehr o rahmat o sohl o ásudagi, cha Petén Hodá o áiay Chokk Issá Masihay némagá, pa rásti o mehr gón má góna bit.
Rásti o mehr
4 Gal o shádán bután wahdé zánton tai lahtén chokk rástiay sará zenda gwázénit, hamá dhawlá ke Petá márá hokm kortag. 5 Nun, oo bánok! Man nókén hokmé nebisagá naán, é hamá hokm ent ke cha bongéjá†1:5 Bongéj, bezán bendát, shoru. márá gón butag, bale cha taw dazbandia kanán, máshomá gón yakdomiá mehr bekanén. 6 Mehr hamesh ent ke áiay hokm o parmánáni sará zend begwázénén. Áiay hokm hamesh ent ke shomá cha bongéjá eshkotag. Hamé mehray hokmay sará zend begwázénét.
7 Chéá ke bázén rad dayóké donyáyá potertag o tálán ent o é habará namannant ke Issá Masih ensáni jesm o jánéá ér átkag. É paymén mardom rad dayók o Masihay dozhmen ant. 8 Hósh o sár bét ke may‡1:8 Lahtén kwahnén syáhaga gwashit: “wati”. káray bar o samará barbád o zawál makanét, sarréchén mozzé pa wat bekatthét. 9 Harkas ke Masihay tálimay sará mohr maóshtit o watsará démáter berawt, Hodá áiayg naent, bale harkas ke Masihay tálimay sará mohr bóshtit, ham Pet áiayg ent, ham Chokk. 10 Agan kasé shomay gwará byayt o é tálimá mayárit, áiá wati lógá maylét o wasshátki magwashét. 11 Parchá ke é dhawlén mardoméay wasshátk kanag, gón áiay radén kárán sharikdár bayag ent.
Goddhi habar
12 Bázén chizzé hast ke pa taw benebisán, bale nalóthán gón kalam o kágadá bebant. Ométwár án ke shomay kerrá byáyán o dém pa dém gapp o trán bekanén tán mayshomay shádmáni sarréch bebit. 13 Tai gechénién goháray chokk§1:13 “Tai gechénién goháray chokk”, bezán Yuhannáay kelisáay báwarmand. tará baddhé drót o drahbáta*1:13 Drót o drahbát, bezán salám o alayk. gwashant.
*1:1 1:1 Bázén zántkáréay báwar esh ent ke “bánok” dega kelisáéá gwashag butag o “bánokay chokk”, á kelisáay báwarmand ant.
†1:5 1:5 Bongéj, bezán bendát, shoru.
‡1:8 1:8 Lahtén kwahnén syáhaga gwashit: “wati”.
§1:13 1:13 “Tai gechénién goháray chokk”, bezán Yuhannáay kelisáay báwarmand.
*1:13 1:13 Drót o drahbát, bezán salám o alayk.