1 شاوول، اَنگت هُداوندئے مریدان پاتراپ دئیان، آیانی کُشت و کۆشئے چِن و لانچا اَت. آ، مسترێن دینی پێشوائے کِرّا شت و 2 چه آییا لۆٹتی په دَمِشْکئے شهرئے کَنیسَهانی سرۆکان کاگدے بنبیسیت که شاوولا اے اِهتیار ببیت، اگن آییا اۆدا «اے راهئے»* 9‏:2 «اے راه» په ائولی باورمندانی پجّارێنگا هاسێن نامے اَت. هر منۆگرے دیست، مردێنے ببیت یا جنێنے، بندیگ بکنت و اورْشَلیما بیاریت. 3 وتی سات و سپرا، وهدے دَمِشْکئے شهرئے نزّیکا رَست، اَناگت آییئے چپّ و چاگردا چه آسمانا رُژنے دْرپشت.† 9‏:3 دْرپشگ، شهم جنَگ، رُژنا بئیگ، جلشکگ. 4 شاوول زمینا کپت و تئوارے اِشکتی: «شاوول، او شاوول! تئو چیا منا آزارَ دئیئے؟» 5 شاوولا جُست کرت: «او واجه! تئو کئے ائے؟» پَسّئوی دات: «من ایسّا آن، هما که تئو آییا آزارَ دئیئے. 6 نون پاد آ و شهرا برئو. همۆدا گوَشنت ترا چِه کار کنگی اِنت.» 7 شاوولئے همراه بێتئوار و مامانگ‡ 9‏:7 مامانگ، بزان چه تُرس یا دگه سئوَبێا اَنچێن هالتێا بئیگ که هبر هم در مئیئیت. بوتنت. آیان اے تئوار اِشکت بله هچکَسِش ندیست. 8 شاوول چه زمینا پاد آتک، بله وهدے چمّی پَچ کرتنت هچّی مئیم نکرت. همراهان دستا گپت و دَمِشْکا سر کرت. 9 تان سئے رۆچا کۆر بوت، نه آپی وارت و نه وراک.

10 دَمِشْکئے شهرا، هَنّانیا نامێن مریدے جهمنند اَت. شُبێن و اِلهامێا، هُداوند په آییا زاهر بوت و گوَشتی: «او هَنّانیا!» آییا جواب تَرّێنت: «جی، منی واجه!» 11 هُداوندا گوَشت: «پاد آ، هما دَمْک و کوچها برئو که آییا ‹تچکێن دَمْکَ› گوَشنت. اۆدا یَهودائے لۆگا برئو و شاوول تَرْسوسیا شۆهاز کن، که آ دْوا کنگا اِنت. 12 شاوولا وتی شُبێنا دیستگ که هَنّانیا نامێن مردے کئیت، آییا دست پِرَ مُشیت که پدا بگندیت.» 13 هَنّانیایا پَسّئو دات: «او هُداوند! من چه بازێنێا اِشکتگ که اورْشَلیما، شاوولا تئیی باورمند باز آزار داتگ‌اَنت. 14 اِدا هم گۆن مزنێن دینی پێشوایانی اِهتیارا آتکگ که سجّهێن هما مردمان بگیپت و بندیگ بکنت که تئیی ناما گرنت.» 15 بله هُداوندا گۆن هَنّانیایا گوَشت: «برئو، من په وتی هِزمتکاریا، آ گچێن کرتگ که درکئوم و آیانی بادشاه و اِسراییلیانی گوَرا برئوت و په منی ناما گواهی بدنت. 16 من آییا سهیگَ کنان که په منی ناما آییا چینچُک آزار سَگّگی اِنت.» 17 هَنّانیا شت و هما لۆگا رَست، شاوولی دست پِر مُشت و گوَشتی: «او منی براتێن شاوول! هما هُداوند بزان ایسّا، که راها په تئو زاهر بوت، منا راهی داتگ که تئو پدا بگندئے و چه هُدائے پاکێن روها پُرّ ببئے.» 18 هما دمانا، چه آییئے چمّان کُچَل‌پئیمێن چیزّے کپت و آییئے چمّانی رُژن پدا آتک. گڑا آ پاد آتک و پاکشۆدی‌ای کرت. 19 وَرد و وراکی وارت، زرنگ و زۆرمند بوت. لهتێن رۆچا دَمِشْکئے مریدانی کِرّا داشتی.

20 شاوول، همۆدا یَهودیانی کَنیسَها شت و جاریَ جت که ایسّا هُدائے چُکّ اِنت. 21 هرکَسا که آییئے هبرَ اِشکت، هئیرانَ بوت و جُستیَ گپت: «اے هما مرد نه‌اِنت که اورْشَلیما ایسّائے نام گْرۆکانی گار و گُمسار کنگئے رَندا اَت؟ اِدا هم پمێشکا نئیاتکگ که ایسّائے مَنّۆگران بگیپت و مزنێن دینی پێشوایانی کِرّا ببارت؟» 22 بله شاوول رۆچ په رۆچ زۆرمندترَ بوت و گۆن مُهرێن دَلیلان پێشیَ داشت که ایسّا، مَسیه اِنت و اے ڈئولا آییا دَمِشْکئے یَهودی سَربَتَگ و بێپَسّئو کرتنت. 23 بازێن رۆچان و رَند، یَهودیان آییئے کُشگئے شئور کرت، 24 بله شاوول چه آیانی پَندَلا سهیگ بوت. گڑا، آیان شپ و رۆچ شهرئے دروازگانی نگهپانیا کرت تان بگرنت و بکُشنتی. 25 بله آییئے شاگردان لَچێا§ 9‏:25 لَچ، بزان مزنێن سَپْتے که باری مانَ کننت و هرا لَڈَّنتی. کرت و شپا چه شهرئے دیوالا، جَهلا اێر دات.

26 وهدے شاوول اورْشَلیما رَست گۆن مریدان هۆر بئیگئے جُهدی کرت، بله سجّهێنان چه آییا تُرست. آیان باور نبوت که شاوول په راستی مریدے بوتگ. 27 بله بارنابایا وتی همراه کرت و کاسِدانی کِرّا برت، آ سهیگ کرتنت که چِه پئیما شاوولا دَمِشْکئے راها هُداوند دیستگ و هُداوندا گۆن آییا گپّ و تْران کرتگ. بارنابایا اے هال هم دات که شاوولا دَمِشْکئے شهرا چِه پئیما گۆن دِلێری په ایسّائے ناما واز کرتگ. 28 رَندا، شاوول اورْشَلیما گۆن کاسِدان هر کارا هۆر بوت و په نَتُرسی هُداوندئے ناما وازیَ کرت. 29 گۆن یونانی یَهودیانی هم گپّ و تْرانَ کرت. بله آ، شاوولئے کُشگئے رَندا اتنت. 30 وهدے باورمندێن برات چه اے پَندلا سهیگ بوتنت، شاوولِش کئیسَریَها برت و چه اۆدا دێم په تَرْسوسا راه دات. 31 گڑا یَهودیَه و جَلیل و سامِرَهئے سجّهێن دَمگان، کِلیسا اێمن و آسودگ بوت و رُست و رُدۆم کنان اَت. باورمندان، په هُداتُرسی زِندَ گوازێنت و گۆن پاکێن روهئے دِلبڈّیا رۆچ په رۆچ گێشترَ بوتنت.

32 پِتْرُس سات و سپر کنان اَت و لُدَّهئے شهرئے نندۆکێن هُدائے پَلگارتگێن* 9‏:32 «پَلگارتگێن» هما مردم اَنت که گۆن ایسّا مَسیهئے هۆنا چه وتی گناهان شۆدگ و پاک کنگ بوتگ و اے ڈئولا په هُدایا در چنَگ بوتگ‌اَنت. مردمانی گوَرا آتک. 33 اۆدا آییا اینیاس نامێن مردے دیست که لَنگ و مُنڈ اَت و هَشت سال اَت که تَهتئے باهۆٹ اَت. 34 پِتْرُسا گۆن آییا گوَشت: «او اینیاس! ایسّا مَسیه ترا دْراهَ کنت، پاد آ، وتی گندلان پێچ.» هما دمانا اینیاس پاد آتک و اۆشتات. 35 وهدے لُدَّه و شارونئے مردمان اینیاس دیست، آ هم دێم په هُداوندا آتکنت.

36 یاپائے شهرا، مریدے هست‌اَت که نامی تَبیتا اَت (یونانی زبانا «دُرکاس» گوَشگَ بیت، بزان «آسْک»). آ باز نێک‌کارێن جنێنے اَت و هر وهدا نێزگارێن مردمی کُمک و مَدَت کرتگ‌اتنت. 37 همے رۆچان ناجۆڑ بوت و مُرت. آییئے جۆنِش شُشت و لۆگئے بُرزادی بانا اێر کرت.

38 یاپائے شهر چه لُدَّها نزّیک اَت. وهدے یاپائے نندۆکێن مرید سهیگ بوتنت که پِتْرُس لُدَّهئے شهرا اِنت، آیان دو مردم راه دات و مِنّتگیری‌اِش کرت که پِتْرُس زوتّ آیانی کِرّا بیئیت. 39 پِتْرُس آیانی همراه بوت. وهدے اۆدا رَست، لۆگئے بُرزادی بانا برتِش. اۆدا سجّهێن جنۆزام آییئے چپّ و چاگردا مُچّ بوتنت و گرێوان هما پُچّ و جامگِش پێش داشتنت که دُرکاسا وتی زِندا دۆتکگ‌اتنت. 40 پِتْرُسا آ سجّهێن چه بانا در کرتنت، کۆنڈان کپت و دْوایی کرت. رَندا دێمی جۆنئے نێمگا تَرّێنت و گوَشتی: «او تَبیتا! پاد آ.» آییا وتی چمّ پَچ کرتنت، پِتْرُسئے نێمگا چارتی و نِشت. 41 پِتْرُسا آییئے دست گپت و اۆشتارێنت، باورمند و جنۆزامی تئوار کرتنت و تَبیتایی زِندکا آیانی دستا دات. 42 اے هال، سجّهێن یاپائے شهرا شِنگ بوت و بازێن مردمێا هُداوندئے سرا باور کرت. 43 پِتْرُس تان لهتێن وهدا همۆدا یاپائے شهرا گۆن شَمون نامێن پۆست رَجۆکێا† 9‏:43 پۆست رَجۆک، بزان هما اَنت که چه دَلوَتانی پۆستا مَشک و اے دگه چیزّ جۆڑَ کننت. نِشت.