5
Zendá pa mehr begwázénét
1 Gorhá shomá ke Hodáay dóstigén chokk ét, Hodáay randgiriá bekanét o 2 zendá pa mehr begwázénét, hamá paymá ke Masihá gón má mehr kort o watárá pa maygi washbóén shogránah o korbánigay paymá Hodáay démá nadri kort. 3 Bénangi o har paymén nápáki o lálech*5:3 Lálech, bezán tamáh, hers. o tamáhay námá ham magerét, chéá ke é chizz Hodáay palgártagénán zéba nadayant. 4 Cha shomay dapá bénangén kessah o sobakkén gapp o bépardagén maskaráé dar mayayt ke é paymén habar shomárá zéba nadayant. Modám shogrgozári bekanét. 5 É gappá deljam bebét ke na bénangá Masih o Hodáay bádsháhiá mirása rasit, na nápáká o na tamahkárá ke botparasté. 6 Chó mabit ke kasé shomárá gón náhudagén habarán rad bedant, chéá ke anchén káráni sawabá náparmánén mardománi sará Hodáay kahr o gazaba kapit. 7 Gorhá gón é paymén mardomán gón makapét.
8 Yakk wahdé shomay del tahár at, bale nun Hodáwanday barkatá rozhná ent. Gorhá shomay zend pésh bedárit ke shomá rozhnay chokk ét, 9 chéá ke rozhnay bar o samar har paymén néki o pahrézkári o rásti ent. 10 Bezánét ke kojám kár Hodáwandá wassh o razá kant. 11 Taháriay bépáedagén kárán gón makapét, choshén kárán páshk o paddar bekanét. 12 Hamá kárán ke náparmánén mardom chérokáia kanant, á káráni námay gerag ham ayb ent. 13 Bale rozhn har chizzay sará ke kapit, áiá záhera kant. 14 Chéá ke har chizz ke záhera kanaga bit, rozhná kanaga bit. Paméshká gwashant:
“Oo wábén mardom! Pád á
cha mordagán jáh jan,
nun Masih tai sará drapshit†5:14 Drapshag, bezán shahm janag, jalashkag..”
15 Gorhá sharr bechárét ke shomá wati zendá chón gwázenagá ét. Nádán mabét, dáná bebét. 16 Wati wahdá zawál makanét ke zamánag haráb ent. 17 Gorhá nádán mabét, bezánét ke Hodáwanday wáhag o razá ché ent. 18 Sharábá mast o malár mabét ke eshiay ásar béhayái ent, sharábay badalá cha Pákén Ruhá sarréch bebét o 19 watmánwatá Zabur o hamd o Ruhi názénk bejanét. Cha delay johlánkiá sáz o sawt bejanét o Hodáwandá benázénét. 20 May Hodáwandén Issá Masihay námay sará modám pa har chizzá Hodáén Petay shográ begerét. 21 Masihay ezzat dayagay háterá yakdomiay parmánbardáriá bekanét.
Jan o mard
22 Oo janénán! Cha shomá harkas wati marday parmánbardáriá hamá paymá bekant ke Hodáwanday parmánbardáriá kant. 23 Chéá ke mard wati janay sar ent, anchó ke Masih kelisáay sar ent. Kelisá Masihay badan ent o Masih é badanay rakkénók ent. 24 Gorhá hamá paymá ke kelisá Masihay parmánbardáriá kant, jan ham báyad ent har káray tahá wati marday parmánbardáriá bekant.
25 Oo mardénán! Cha shomá harkas gón wati janá mehr bekant, hamá paymá ke Masihá gón kelisáyá mehr kort o wati sáhi pa áiá nadr kort 26 ke Hodáay habaray barkatá kelisáyá gón ápá beshódit o pák o palgár bekant o 27 pa wat porshawkatén kelisáé bekanti ke hecch póleng o krechk o é paymén chizzé peri mabit o pák o béayb bebit. 28 Hamé paymá mard báyad ent gón wati janá anchó mehr bekant ke gón wati jendá kant. Á ke gón wati janá mehra kant, gón wati jendá mehra kant. 29 Kass cha wati jenday badaná hechbar naprata nakant, wati jesmá sáthit‡5:29 Sáthag, bezán hayáldári kanag, sambálag. o sambálit, anchó ke Masih kelisáyá sambálit. 30 Chéá ke má áiay badanay ázá én.
31 “Paméshká mard wati pet o mátá yalaha kant o gón janá hawára bit, gorhá á doén, yakk jesm o jána bant.”§5:31 Pédáesh 2:24. 32 É gapp mazanén rázé, bale man é wahdi Masih o kelisáay habará án. 33 Gorhá cha shomá harkas báyad ent gón wati janá anchó mehr bekant ke gón wati jendá mehra kant o jan báyad ent wati marday ezzatá bekant.