2
Mussáay pédáesh
1 Láwi kabilahay mardé shot o Láwi jenekké sángi kort. 2 Janén lápporr but o mardénchokké áworti. Janéná dist ke chokk sharrangé, tán say máhá chéri dát. 3 Wahdé áiá chokk cha ed o géshter chér dát nakort, pa áiá cha kalam o káshá gwaptagén sapté*2:3 Sapt, bezán sabad, mazanén challi, sáchi. zorti, sapti gir o dhámbar†2:3 Gir o dhámbar syáhén o lechnákén ápénké. jat, chokki saptá kort o Nillay kawray lambá kásháni tahá éri kort. 4 Chokkay gohár kammé dur óshtát o cháragá lagget ke bárén chokk chóna bit.
5 Perawnay jenekk jánay shódagá Nillay kawrá átk. Móled Nillay kawray kerrá gardagá laggetant. Perawnay jenekká kásháni nyámá sapt dist o wati móledé ráhi dát ke saptá byár. Áiá áwort. 6 Perawnay jenekká sapt pach kort o nonnok dist. Nonnok gréwagá at. Perawnay jenekká áiay sará bazzag but. Gwashti: “É cha Ebrániáni chokkán ent.” 7 Gorhá nonnokay gohárá cha Perawnay jenekká jost kort: “Berawán o Ebráni janéné tawár bekanán ke nonnoká pa taw shir beméchénit?” 8 Perawnay jenekká gwasht: “Beraw.” Jenekk shot o nonnokay máti tawár kort. 9 Perawnay jenekká gón áiá gwasht: “É nonnoká gón wat bar o pa man méchén. Man tai mozzá dayán.” Janéná nonnok zort o méchént.
10 Chokk ke rost o kammé master but, mátá Perawnay jenekkay kerrá áwort. Perawnay jenekká chokk zort o wati chokk kort. Áiay námi Mussá‡2:10 Mussáay labz balkén cha “dar kanagay” labzá jórh butag. kort, gwashti: “É man cha ápá kasshetag.”
Mussáay tachag
11 Wahdé Mussá rost o mazan but, yakk róché wati mardománi kerrá shot o áyáni bigári o gránén kári distant. Mussáyá Mesrié dist ke Ebrániéá, bezán cha Mussáay jenday mardomán yakkéá janagá at. 12 Mussáyá wati chapp o chágerd cháret o disti ke kass nést. Gorhá Mesrii kosht o rékáni tahá kall kort. 13 Domi róchá padá dhanná shot o disti ke do Ebráni merhagá ent. Gón mayárigén mardomá gwashti: “Chéá wati hamkawmá janagá ay?” 14 Áiá passaw dát: “Kayá tará may sará hákem o dádras kortag? Záná taw lóthay maná ham bekoshay anchó ke Mesriet kosht?” Mussáyá torset o delá gwashti: “Pakkáyá habar páshk butag.”
15 Perawn é habará sahig but o Mussáay koshagay erádahi kort. Bale Mussá cha Perawnay kerrá tatk o Midyánay molká shot o chátéay kerrá nesht. 16 Midyánay dini péshwáyá hapt janénchokk hastat. É jenekk átk o ápay kasshag o tagáray§2:16 Tagár, bezán mazanén johlén darp, hirán, lagan. porr kanagá laggetant ke petay ramagá áp bedayant. 17 Bale lahtén shepánk átk o jenekkesh galléntant*2:17 Gallénag, bezán táchénag, dar kanag, dur ráh dayag. . Mussá jenekkáni komakká pád átk o áyáni ramagi áp dát.
18 Jenekk ke wati pet Rawélay†2:18 Rawélay domi nám Yatrun butag, bechár 3:1. kerrá átkant, petá jost kortant: “Maróchi chéá chó zutt átkagét?” 19 Áyán gwasht: “Maróchi Mesriéá márá cha shepánkáni dastá rakként. Ápi ham kasshet o ramagi áp dát.” 20 Petá gón wati jenekkán gwasht: “Gorhá kojá ent? Shomá á mard chéá nayáwortag gón? Tawári kanét, belli kayt o nána wárt.”
21 Mussá marday kerrá jahmenend bayagá rázig but o mardá wati jenekk Sapurah gón Mussáyá sur dát. 22 Sapurahá mardénchokké áwort o Mussáyá áiay nám Gayrshám‡2:22 Gayrshámay máná ent: “Á, ódá darámadé”. kort, gwashti: “Man darmolká darámadé án.”
23 Máh o sál gwastant o hamé nyámá Mesray bádsháh mort. Esráili cha wati golámiá nálag o peryátá atant. Áyáni é nálag o peryát borzád shot o Hodáyá sar butant. 24 Hodáyá áyáni nálag eshkotant o wati hamá ahd o paymánay tránagá kapt ke gón Ebráhém o Esák o Ákubá bastagati. 25 Hodáyá Esráili distant o áyáni sará bazzagi but.
*2:3 2:3 Sapt, bezán sabad, mazanén challi, sáchi.
†2:3 2:3 Gir o dhámbar syáhén o lechnákén ápénké.
‡2:10 2:10 Mussáay labz balkén cha “dar kanagay” labzá jórh butag.
§2:16 2:16 Tagár, bezán mazanén johlén darp, hirán, lagan.
*2:17 2:17 Gallénag, bezán táchénag, dar kanag, dur ráh dayag.
†2:18 2:18 Rawélay domi nám Yatrun butag, bechár 3:1.
‡2:22 2:22 Gayrshámay máná ent: “Á, ódá darámadé”.