1 Gorhá Hodáwandá gón Mussáyá gwasht: “Bechár, man tará pa Perawná chó Hodáyá kortag o tai brát Hárun tai nabia bit. 2 Harché ke tará hokma kanán, hamá paym gwashán kan. Tai brát Hárun báyad ent gón Perawná begwashit ke Esráilián cha wati molká rawagá bell. 3 Bale man Perawnay delá senga kanán. Man Mesray molká bázén ajabbatén nesháni o mójezahé pésha dárán, 4 bale Perawn shomay habarán gósha nadárit. Man wati dastá Mesray helápá chesta kanán, Mesrián gránén sezá dayán o wati Esráili kawmá romb rombá cha Mesrá kasshán. 5 Wahdé wati dastá Mesray helápá chesta kanán o Bani Esráilá cha Mesriáni nyámá kasshán, nun Mesria zánant ke man Hodáwand án.”

6 Mussá o Háruná anchosh kort. Hamá paymá ke Hodáwandá hokm dátagatant, áyán hamá paymá kort. 7 É wahdá ke áyán gón Perawná habar kort, Mussáay omr hashtád sál at o Hárunay hashtád o say.

8 Hodáwandá gón Mussá o Háruná gwasht: 9 “Perawn ke shomárá gwashit: ‘Mójezahé pésh bedárét’ gorhá taw Háruná begwash: ‘Wati asáyá bezur o Perawnay démá zeminá dawri day.’ Asá maré bit.”

10 Mussá o Hárun Perawnay kerrá shotant o hamá paymá ke Hodáwandá hokm dátagatant, hamá paymá kortesh. Háruná wati asá Perawn o áiay hezmatkáráni démá zeminá dawr dát o asá maré but. 11 Gorhá Perawná dáná o sáher lótháéntant o é Mesri jádugerán gón wati jáduá hamé kár kort. 12 Cha áyán har yakkéá wati asá zeminá dawr dát o áyáni asá már butant. Hárunay asáyá áyáni asá wárt o ér bortant. 13 Bale anchó ke Hodáwandá gwashtagat, Perawnay del angat seng at o áyáni habari gósh nadáshtant.

14 Hodáwandá gón Mussáyá gwasht: “Perawnay del seng ent o mardomán rawagá naylit. 15 Sohbá ke Perawn ápay kerrá rawt, taw beraw o Nillay kawray lambá áiay ráhay sará bósht o már butagén asáyá dastá kan. 16 Gón Perawná begwash: ‘Hodáwandá, bezán Ebrániáni Hodáyá maná tai kerrá ráh dátag ke tará begwashán: “Mani mahluká bell ke gyábáná rawt o maná parastesha kant,” bale taw angat gósh dáragá naay. 17 Hodáwand chosha gwashit ke tawe Perawn cha é neshániá zánay ke man Hodáwand án: Bechár, é asá ke mane Mussáay dastá ent, man eshiá kawray ápá janán o áp hón jórha bant. 18 Kawray máhiga merant, kawr bóa kant o Mesri kawray ápá wárta nakanant.’ ”

19 Hodáwandá gón Mussáyá gwasht: “Háruná begwash: ‘Wati asáyá dastá kan o dastá Mesray ápáni sará shahár day, áyáni kawráni sará, áyáni jóáni sará, áyáni taláwagáni*7:19 Taláwag bandé ke pa ápay jam kanag o dáragá addh kanaga bit. sará o áyáni sajjahén ápjalláni sará. Esháni tahay sajjahén áp hón jórha bant. Sajjahén Mesray molk hóná porra bit, ápdán ham cha hóná porra bant.’ ”

20 Mussá o Háruná hamá paymá kort ke Hodáwandá hokm dátagatant. Háruná†7:20 Asligén Ebráni nebeshtánka gwashit: Áiá Perawn o hezmatkáráni chammáni démá wati asá chest kort... Pakká zánaga nabit ke á kay at, Hárun at yá Mussá. Perawn o hezmatkáráni chammáni démá wati asá chest kort o kawray ápáni sará jat. Kawray sajjahén áp hón jórh butant. 21 Kawray máhig mortant, kawrá bó kort o Mesrián kawray áp wárt nakort. Sajjahén Mesray molká hón tachagá at.

22 Bale Mesri jádugerán ham gón wati jáduá hamé kár kort o hamá paymá ke Hodáwandá gwashtagat, Perawnay del seng at o Mussá o Hárunay habari gósh nadáshtant. 23 Perawná posht mán dát o wati kalátá shot o é gappi hecch mán nayáwort. 24 Sajjahén Mesrián pa waragi ápá kawray kash o kerrán kánig‡7:24 Kánig kasánén kandhé ke pa ápay dar kanagá jananti. janag bendát kort, chéá ke kawray ápesh wárta nakort.

25 Cha á wahdá ke Hodáwandá Nillay kawray sará é kahr dawr dát, hapt róch gwast.