25
Pa tambuay addh kanagá shogránah
1 Hodáwandá gón Mussáyá gwasht: 2 “Gón Esráilián begwash ke pa man shogránah byárét. Cha hamá sajjahén mardomán shogránah bezurét ke delesha parmáit. 3 Cha mardomán é shogránahán begerét: teláh, nograh, brenj, 4 ásmáni o jamu o sohrén pazhm, sharrén lilom*25:4 Lilom, goday tahré ke Engréziá “linen” gwashaga bit., bozay mud, 5 gwarándhay ratkagén†25:5 Ratkagén, bezán rajetagén, rang dátagén. sohrén póst, dega paymén mohrén póst, chegerday dár, 6 pa cherágán thél, pa per moshagi rógen o washbóén sóchokiá masálah o 7 pa épód‡25:7 Épód Esráili masterén dini péshwáay pósháké at. o sénagpóshá senge solaymán o dega gránkimmatén seng. 8 Pa man pákén jágahé addh bekanant ke man áyáni nyámá jahmenend bebán. 9 Tambu§25:9 Tambu, bezán haymah, gedán. o tambuay tahay sajjahén sámánán hamá paymá addh bekanant ke man tará pésha dárán.
Sháhediay péti
10 Cha chegerday dárá pétié*25:10 Péti, bezán sanduk. addh bekanant ke drájiá do o ném dast†25:10 Yakk dast do bechill ent, bezán ném mitar. bebit, práhiá yakk o ném dast o borziá ham yakk o ném dast. 11 Pétiá cha dhanná o tahá gón zagrén‡25:11 Zagr, bezán asil, háles. teláhá sarpósh kan. Gerdágerd teláhén patthié peri kan. 12 Pa pétiá teláhay chár karhi addh kan o pétiay chárén pádagán lecchénesh, do karhi yakk némagéá o do á dega némagá. 13 Cha chegerday dárá do gwarbásk§25:13 Gwarbásk, bezán tahtay kashay drájén dár. addh kan o gón teláhá sarpóshesh kan. 14 Pa pétiay chest kanagá gwarbáskán cha pétiay kashay karhián begwázén. 15 Gwarbásk pétiay karhián bebant o cha karhián dar kanag mabant. 16 Sháhediay wánekán*25:16 Wánek, bezán mazanén patanén seng, wánag. Sháhediay wánekáni sará Hodáay dahén parmán nebeshtah atant. ke man tará dayán, hamé pétiá mánesh kan.
17 Cha zagrén teláhá kapáraté†25:17 Ebráni zobáná kapáratay máná sarpósh ent. Edá pa gonáháni shódag o sarpósh kanagá kármarz butag, bezán pa chizzéay mókagá. Gonáháni shódag dega káré o sarpóshi dega káré, bale kapáratay tahá doén máná hawár ant. addh kan o pétiá sarpósh kan. Drájiá do o ném dast bebit o práhiá yakk o ném dast. 18 Teláhay do karrubi‡25:18 Karrubi, ásmáni mahluké ke bánzolesh per o Hodáay tahtay chapp o chágerdá ant. addh kan, teláhá bezur o thapp o addhesh kan. É karrubián sarpóshay doén sarán addh kan, 19 yakk karrubié sarpóshay yakk saréá addh kan o á dega karrubiá domi sará. Sarpósh o doén saráni karrubián jetá jetá addh makan, é yakthokkor bebant. 20 Karrubiáni dém gón yakdomiá bebit o chammesh gón sarpóshá. Bánzolesh borzádiá pach bebant o sarpóshá sáhél bekanant. 21 Sarpóshá pétiay sará ér kan o hamá sháhediay wánekán ke man tará dayán, áyán pétiay tahá kan. 22 Man hamódá tai démá záhera bán o gón taw habara kanán, cha sarpóshay borzá, cha sháhediay pétiay saray doén karrubiáni nyámá Esráiliáni bárawá har parmáné ke hast, tará gwashánesh gón.
Thébal
23 Cha chegerday dárá thébalé addh kan. Drájiá do dast bebit, práhiá yakk dast o borziá yakk o ném dast. 24 Gón zagrén teláhá sarpóshi kan o teláhay patthié addh kan o chárén némagán peri kan. 25 Thébalay sarbori tahtagá, chárén némagán teláhay patthié per kan o tahtagay chérá chárén némagán yakk panjagéay práhiay kaddén kábé§25:25 Káb, bezán chárchóbah, chárchóbag, chárkondhén chókáth ke chizzéay chárén némagán per kanaga bit. per kan. 26 Pa thébalá teláhay chár karhi addh kan o karhián chárén kondhán, pádagán per kan. 27 É karhi báyad ent kábay nazzikká bebant chéá ke thébalay chest kanagay wahdá gwarbáskána dárant. 28 Thébalay chest kanagay gwarbáskán cha chegerday dárá addh kan o gón teláhá sarpóshesh kan. 29 É thébalay tál*25:29 Tál, bezán tár, hamé razán ke eshiay tahá waraga warant. o tásán cha zagrén teláhá addh kan. Thébalay jag o hamá kásagán ham ke pa réchagi korbánigay ér réchagá kár bandaga bant, cha zagrén teláhá addh kan. 30 ‘Pákwandhén naganán’†25:30 Pákwandén nagan, asligén Ebránia gwashit “chehragáni nagan, démáni nagan”. É nán modám Hodáwanday bárgáhá ér kanagi atant o é gappay nesháni atant ke Hodá wati mardománi rózirasán ent. modám hamé thébalay sará, mani démá ér kan.
Cherágdán
31 Cha zagrén teláhá cherágdáné addh kan. Cherágdáná, bezán bon o bonsháh o pyálah o golbon‡25:31 Golbon, bezán golay bon, pollay hamá jágah ke tákáni boná ent. o pollán thapp o addh kan, jetá jetá addhesh makan, é yakthokkor bebant. 32 Cha bonsháhay kashán shash sháharh dar byayt, say sháharh cha yakk kashéá o say sháharh cha á dega kashá. 33 Har sháharhá say pyálah per bebit, pyálaháni sarborá bádámay pollay warhén golbon o pollé per bebit. Cherágdánay har shashén sháharh hamé paymá bebant. 34 Cherágdánay bonsháhá chár pyálah per bebit, gón bádámay pollay warhén golbon o pollán. 35 Cha bonsháhá dar áyókén shashén sháharháni boná golbon bebit, yakk golboné awali doén sháharháni boná bebit, cha hamá jágahá kammé jahlter ke sháharh cha bonsháhá dara káyant, domi golbon domi doén sháharháni boná o sayomi golbon sayomi doén sháharháni boná bebit. 36 Golbon o sháharh o cherágdán yakthokkor bebant. É sajjahénán cha yakkén thappetagén zagrén teláhá addh kan.
37 Hapt cherág addh kan o cherágdáná peresh kan ke cherágdánay démay jágahá rozhná bekanant. 38 Cherágdánay sambálagay awzár o sámánán cha zagrén teláhá addh kan. 39 Pa cherágdán o eshiay sajjahén sámánáni addh kanagá yakk tálánté§25:39 Yakk tálánté kesás si o panch kilu ent. zagrén teláh kármarz kan.
40 Bechár, é sajjahén chizzán hamá paymá addh kan ke man tará kóhay sará pésh dásht.
*25:4 25:4 Lilom, goday tahré ke Engréziá “linen” gwashaga bit.
†25:5 25:5 Ratkagén, bezán rajetagén, rang dátagén.
‡25:7 25:7 Épód Esráili masterén dini péshwáay pósháké at.
§25:9 25:9 Tambu, bezán haymah, gedán.
*25:10 25:10 Péti, bezán sanduk.
†25:10 25:10 Yakk dast do bechill ent, bezán ném mitar.
‡25:11 25:11 Zagr, bezán asil, háles.
§25:13 25:13 Gwarbásk, bezán tahtay kashay drájén dár.
*25:16 25:16 Wánek, bezán mazanén patanén seng, wánag. Sháhediay wánekáni sará Hodáay dahén parmán nebeshtah atant.
†25:17 25:17 Ebráni zobáná kapáratay máná sarpósh ent. Edá pa gonáháni shódag o sarpósh kanagá kármarz butag, bezán pa chizzéay mókagá. Gonáháni shódag dega káré o sarpóshi dega káré, bale kapáratay tahá doén máná hawár ant.
‡25:18 25:18 Karrubi, ásmáni mahluké ke bánzolesh per o Hodáay tahtay chapp o chágerdá ant.
§25:25 25:25 Káb, bezán chárchóbah, chárchóbag, chárkondhén chókáth ke chizzéay chárén némagán per kanaga bit.
*25:29 25:29 Tál, bezán tár, hamé razán ke eshiay tahá waraga warant.
†25:30 25:30 Pákwandén nagan, asligén Ebránia gwashit “chehragáni nagan, démáni nagan”. É nán modám Hodáwanday bárgáhá ér kanagi atant o é gappay nesháni atant ke Hodá wati mardománi rózirasán ent.
‡25:31 25:31 Golbon, bezán golay bon, pollay hamá jágah ke tákáni boná ent.
§25:39 25:39 Yakk tálánté kesás si o panch kilu ent.