1 Masihá márá ázát kort ke má ázát bebén. Gorhá mohr bóshtét, watárá padá golámiay jogay*5:1 Jog dáré ke pa zeminay nangár kanagá do gókay gardená bandanti. chérá rawagá maylét. 2 Gósh dárét! Mane Pulos shomárá gwashán ke agan shomá wati sonnat kanag esht, gorhá shomárá cha Masihay némagá hecch paymén páedagé narasit. 3 Á mardom ke wati sonnat kanaga kellit, man pa deljami gón áiá gwashán ke pa taw allam ent ke sajjahén Sharyatá bedáray. 4 Shomá ke gón Sharyatay dáragá Hodáay chammán watá pák o palgára zánét, bezán shomá cha Masihá sendag butagét. Shomá cha Hodáay rahmatán dur butagét. 5 Bale imánay sawabá, má cha Pákén Ruhay barkatá hamá páki o palgáriay wadárá én ke márá áiay omét hast. 6 Chéá ke Issá Masihay ráhá sonnat bayag o nabayagay máná yakk ent, tahná hamá imáná máná hast ke cha mehray ráhá watá záhera kant.

7 Shomá sharr démá rawán atét. Kayá shomárá cha rástiay parmánbardáriá dásht? 8 Shomay gwánk janóká, bezán Hodáyá wa shomárá nadásht. 9 Toshoké homir sajjahén ártá homiréna kant. 10 Maná Hodáwanday sará setk†5:10 Setk, bezán báwar, yakin. ent o deljam án ke shomay delá dega hayála nayayt. Á mardom ke shomárá mán gisshénagá ent, á wati malámá porra kant, harkas ke bebit. 11 Oo brátán! Man wa nun sonnat kanagay wázá kanagá naán o paméshká ázár dayag bayagá án. Agan man sonnat kanagay wáz bekortén, gorhá cha salibay paygámá kassá bad nabortagat. 12 Hamá ke shomárá janjála kanant, watá gwahtag‡5:12 Gwahtag, bezán hamá ke áiay narénagi dar kanag butag. kanátant.

13 Oo brátán! Shomá gwánk janag butagét ke ázát bebét, bale chó mabit ke é ázáti pa shomay gonahkárén tab o sareshtá§5:13 Saresht, bezán pédáeshi tab, zát, báten, jawhar. móhé bebit. Eshiay badalá pa mehr yakdomiay hezmatá bekanét. 14 Chéá ke sajjahén Sharyatay majg hamé yakkén hokm ent: “Wati hamsáhegá wati jenday paymá dóst bedár.” 15 Shomá yakdomiá chillénag o waragá ét, bechárét, yakdomiay dastá tabáh mabét.

16 Nun mana gwashán, gón Pákén Ruhá hamgám bebét. É paymá shomá gonahkárén tab o sareshtay lóth o wáhagáni randá nakapét. 17 Chéá ke gonahkárén tab o sareshtay wáhag Pákén Ruhay heláp ant o Pákén Ruhay wáhag gonahkárén tab o sareshtay heláp ant. É gón yakdomiá jangá ant o paméshká shomá á kárána nakanét ke kanagesha lóthét. 18 Bale agan Pákén Ruh shomay rahshóniá*5:18 Rahshóni, bezán rahbari, saróki, rahdarbari. bekant, gorhá shomá Sharyatay páband naét. 19 Gonahkárén tab o sareshtay kár záher ant: syahkári, nápáki, waylánki†5:19 Waylánki, bezán badkári, kahbagi., 20 botparasti, sehr o jádugeri, naprat, jang o jadal, hasadd, hezhm‡5:20 Hezhm, bezán gaynz, zahr gerag., watwáhi, sest o séd, goróhbandi, 21 kénag, mast o malári, ayyáshi o hamé paymén chizz. Anchó ke man pésará shomárá habardár kortag, annun padá habardára kanán, harkas ke é paymén kára kant, áiá Hodáay bádsháhiá hecch mirása narasit.

22 Bale Pákén Ruhay bar o samar esh ant: mehr, shádeh, émeni, sabr o ópár, mehrabáni, sharri, wapádári, 23 narmtabi o dásht§5:23 Dásht, bezán wati napsay dárag, wati ger o dár, wati kanthról.. Choshén chizzáni helápá hecch Sharyat o kánun nést. 24 Hamá ke Issá Masihayg ant, áyán wati gonahkárén tab o saresht gón áiay hawas o sellén wáhagán yakjáh salib kasshetag. 25 Nun ke má Pákén Ruhay redá zenda gwázénén, gorhá gón Pákén Ruhá hamgám bebén. 26 Má báyad ent watgalá o watpasond mabén, yakdomiá sókaló madárén*5:26 Sókaló dárag, bezán zahr baráénag, gottok o sollok kanag, aziat o ázár kanag. o gón yakdomiá hasadd madárén.