3
Gonáh o sezá
1 Már cha Hodáwandén Hodáay jórh kortagén á dega wakshién haywánán thagter o chálákter at. Áiá gón janéná gwasht: “É rást ent ke Hodáyá gwashtag bágay hecch drachkay bará mawarét?” 2 Janéná gwasht: “Má bágay drachkáni bar o samarán wárta kanén, 3 bale Hodáyá gwashtag ke hamá drachkay bará mawarét ke bágay nyámá ent. Áiá dast ham per makanét. Agan na, merét.” 4 Márá gwasht: “Shomá pakká namerét. 5 Bale Hodá zánt, hamá róchá ke shomá á drachkay bará warét, shomay chamm pacha bant, shomá Hodáay paymá bét o nék o badá zánét.”
6 Nun janéná cháret ke á drachkay bar gwashay pa waragá wassh o gendagá zébá ent o pa zántkár bayagá delwáh. Gorhá áiá cha drachkay barán zort o wárt o wati mardárá ham dáti, ke hamráh ati. Mardá ham wárt. 7 Nun doénáni chamm pach butant o zántesh ke má jándar én. Cha enjiray tákán pa wat póshákesh dótk.
8 Gwátá ke sar kort, áyán Hodáwandén Hodáay pádbramsh*3:8 Pádbramsh, bezán pádtawár. eshkot ke bágá gám janagá at. Mard o áiay janá, watá bágay drachkáni poshtá cha Hodáwandén Hodáyá chér dát. 9 Hodáwandén Hodáyá mard gwánk jat o gwasht: “Kojá ay?” 10 Áiá passaw dát: “Man bágá tai pádbramsh eshkot o maná torset chéá ke jándar atán, paméshká man watá chér dát.” 11 Hodáyá gwasht: “Kayá tará gwasht ke taw jándar ay? Taw hamá drachkay bar wártag ke man tará gwashtag mawari?” 12 Mardá gwasht: “Hamá janén ke taw maná dátag, hamáiá á drachkay bar maná dát o man wárt.” 13 Gorhá Hodáwandén Hodáyá gón janéná gwasht: “É che káré ke taw kort?” Janéná gwasht: “Márá maná rad dát o man wárt.”
14 Hodáwandén Hodáyá gón márá gwasht:
“Taw ke é kár kortag,
nun taw sajjahén dalwat o
sajjahén wakshién haywánáni nyámá masterén nálati ay.
Taw wati zenday sajjahén róchán
pa lápkasshokái raway o
tai warák hák o danza bit.
15 Man taig o janénay nyámá,
tai nasl o janénay naslay nyámá
dozhmeni pédá kanán.
Eshiay nasl tai saragá jant o
taw áiay páday punzá†3:15 Páday punz, bezán páday kunzok. janay.”
16 Hodáyá gón janéná gwasht:
“Man tai chellagiay dardán sakk báza kanán,
taw gón dard chokk pédá kanay.
Tai wáhag pa wati mardá bit o
á, tai sará wájahia kant.”
17 Hodáyá gón Ádamá gwasht:
“Taw wati janay habar gósh dásht o
hamá drachkay bar wárt
ke man tará hokm dátagat ke cha eshiá mawar,
paméshká tai sawabá zemin nálati ent.
Taw wati zenday sajjahén róchán
pa sakki o sóri cha zeminá wati waráká kasshay.
18 Zemin pa taw konthag o dhangara kárit o
taw zeminay sabzagána waray.
19 Gón hédén péshánigé wati naganá waray
tán hamá wahdá ke háká pera tarray,
chéá ke cha hameshiá zurag butagay.
Taw háké ay o
padá háká pera tarray.”
20 Ádamá wati janay nám Hawá‡3:20 Hawáay máná “zend” ent. kort, chéá ke á, sajjahén mardománi mát ent. 21 Hodáwandén Hodáyá, pa Ádam o áiay janá, cha póstá póshák jórh kort o gwará dátant.
22 Hodáwandén Hodáyá gwasht: “Nun ensán may payméné jórh butag o nék o badá zánt, chó mabit ke wati dastá shahár bedant o zenday drachkay bará bezurit o bwárt o tán abad zendag bebit.” 23 Gorhá Hodáwandén Hodáyá á cha Adanay bágá dar kort ke zeminay sará kesht o keshár bekant, hamá zemin ke cha áiay háká á jórh kanag butagat. 24 Ensánay gallénagá rand, pa zenday drachkay ráhay bandagá, Hodáyá Adanay bágay ródarátki némagá karrubi§3:24 Karrubi, ásmáni mahluké ke bánzolesh per o Hodáay tahtay chapp o chágerdá ant. óshtáréntant o anchén ásgwárén zahmé ham éri kort ke har némagá chahria wárt.