1 Shash róchá rand, Issáyá Petros o Ákub o áiay brát Yuhanná hamráh kortant o borzén kóhéay sará bortant ke ódá dega kass mabit. 2 Ódá áyáni démá Issáay rang o dróshom badal but. Áiay dém chó róchá drapshnák o póshák chó nurá espét butant. 3 Hamé wahdá áyáni démá Mussá o Elyás záher butant o gón Issáyá habar kanagá laggetant. 4 Petrosá gón Issáyá gwasht: “Oo Hodáwand! May edá bayag sakk sharr ent, agan tai razá bebit, man hamedá say sáheg o kápára*17:4 Kápár, kápar, kapar. bandán, yakké pa taw, yakké pa Mussáyá o yakké pa Elyásá.” 5 Á hamé habarán at ke drapshnákén jambaré†17:5 Jambar, bezán abr. áyáni sará sáhél but. Cha jambará tawáré átk: “É mani dóstigén Bacch ent, cha eshiá man sakk wassh o razá án, eshiay habarán gósh bedárét.” 6 Moridán ke é tawár eshkot, deltrakk butant o dém pa chér kaptant. 7 Issá ayáni kerrá átk, dasti per kortant o gwashti: “Pád áét, matorsét!” 8 Wahdé áyán chamm chest kortant, abéd cha Issáyá dega kassesh nadist.

9 Cha kóhá ér kapagay wahdá Issáyá á hokm dátant: “Tán hamá wahdá ke Ensánay Chokká cha mordagán jáh najatag‡17:9 Jáh janag, bezán cha wati jáhá yakdam pád áyag, zendag bayag, chest bayag., wati é distagén chizzáni bárawá hechkasá hál madayét.” 10 Moridán jost kort: “Gorhá Sharyatay zánóger chéá gwashant ke Masihay áyagá pésar, báyad ent Elyás nabi byayt?” 11 Passawi dát: “Béshakk, Elyása kayt o sajjahén kárán gwam o géga kant. 12 Bale man shomárá gwashán, Elyás wa átk, bale áyán pajjáh nayáwort o harché ke áyáni delá lóthet, gón áiá kortesh. Hamé paymá Ensánay Chokká ham cha áyáni dastá sakki o sóri saggagi ent.” 13 Nun moridán zánt ke á pákshódi dayókén Yahyáay bárawá habará ent.

14 Wahdé Issá o sayén morid mardománi mocchiay kerrá átkant, mardé Issáay gwará átk, kóndhán kapt o gwashti: 15 “Oo wájah! Mani chokkay sará bazzag kan, áiá mariay nádráhi gón ent o sakk azábi kortag, báz bará ásá kapit o báz bará ápá. 16 Man tai moridáni kerrá áwort, bale áyán dráh kort nakort.” 17 Issáyá gwasht: “Oo bébáwar o gomráhén nasl o padréch! Man tán kadéná gón shomá bemánán? Tán chinchok wahdá shomárá besaggán? Chokká edá mani kerrá byárét.” 18 Issáyá jenn hakkal dát, jenn dar átk o bachakk hamá damáná dráh but.

19 Randá morid ehwatá§17:19 Ehwatá, bezán dega kasé mazánt. Issáay gwará átkant o cha áiá jostesh kort: “Má chéá á jenn kasshet nakort?” 20 Issáyá passaw dát: “Shomay imánay nezóriay sawabá. Shomárá rásténa gwashán, agan shomay imán arzonéay kesásá*17:20 Asligén Yunáni nebeshtánka gwashit: “thélkáhay tohmay kesásá.” Thélkáhay tohm báz gwandh ant. ham bebit, shomá gón é kóhá gwashta kanét ke cha edá bekenz o ódá beraw o kóha kenzit. Hecch chizz pa shomá nabutenia nabit. 21 Bale é dhawlén jenn, abéd cha dwá kanag o róchag dáragá dega warhá kasshaga nabant.”†17:21 Lahtén daznebeshtá band 21 néstent.

22 Wahdé morid Jalilá yakjáh butant, Issáyá gón áyán gwasht: “Ensánay Chokk dróhaga bit o anchén mardománi dastá dayaga bit 23 ke áiá koshant, bale sayomi róchá á zendaga bit o jáha jant.” Cha é habarán morid sakk gamig butant.

24 Wahdé Issá o áiay morid Kaparnáhumá átk o rasetant, gorhá mazanén parasteshgáhay songi o máliátgir Petrosay kerrá átkant o jostesh kort: “Shomay ostád mazanén parasteshgáhay songá nadant?” 25 Passawi dát: “Haw, dant.” Wahdé Petros lógá átk, Issáyá cha áiay gapp janagá pésar hamé jost kort: “Oo Shamun!‡17:25 Petros hamá Shamun ent; bechár Mattá 10:2. Donyáay bádsháh cha kayá song o máliáta gerant? Cha wati chokkán yá cha degarán?” 26 Passawi dát: “Cha degarán.” Issáyá gwasht: “Gorhá chokkán dayaga nalóthit. 27 Bale nun é kárá bekan ke á delá mayárant. Mazangwarmá beraw o nahigé§17:27 Nahig kasánokén ásené, kermé bandanti o pa máhigay geragá ápá dawria dayant. ápá dawr day, hamá máhig ke pésará nahigá jant, áiay dapá pach kan, yakk chárkaldári*17:27 Asligén Yunáni nebeshtánka gwashit: “stater”, bezán chár derham. zarré genday, hameshiá bezur o mani o wati songá porr kan.”