2
Masihay békebriá bezurét
1 Nun agan shomárá gón Masihá hór bayagay sawabá delbaddhia rasit, agan shomárá cha áiay mehrá ásudagia rasit, agan shomárá cha Pákén Ruhá hamdelia rasit o agan shomárá hamdardi o rahm hast, 2 gorhá tepák bebét, bégarazén mehréay wáhond bebét, arwáhá yakk bebét, hampegr bebét o é paymá mani shádmániá sarjam o kámel bekanét. 3 Hecch káré pa watwáhi o watpasondi makanét. Pa békebri o darbéshi degarán cha wat borzter sarpad bebét. 4 Harkas wati nap o suttáni badalá, degaráni nap o suttáni hayálá bedárit.
5 Shomay hayál kanagay warh o paym hamá bebit ke Issá Masihay butag.
6 Á, Hodáay zátay dróshomá at,
bale gón Hodáyá é hamdróshomi, áiá pa wat katth o páedagé hesáb nakort o
7 wati shán o shawkati yalah dát o
goláméay dróshomi zort o
ensánéay sheklá pédá but.
8 Jendi ke ensánay sheklá at,
watá békebr o darbeshi kort o
tán marká parmánbardár at,
tán salibay saray marká ham.
9 Paméshká Hodáyá á, sarperáz kort o
anchén námé áiárá dát ke cha har námá borzter ent,
10 ke harkas Issáay námá kóndhán bekapit,
ásmáná ham, zeminay sará ham o zeminay chérá ham,
11 o har zobán bemannit o begwashit:
“Issá Masih Hodáwand ent”
ke Hodáén Petá shán o shawkat berasit.
Chó estárá bedrapshét
12 Paméshká mani dordánagán! Anchosh ke shomá modám parmánbardár butagét, na tahná á wahdá ke man shomay kerrá atán, annun ham ke man ódá naán, angat géshter parmánbardár ét. Gorhá pa tors o larz wati nejátay rost o rodómay johdá bekanét. 13 Chéá ke é Hodá ent ke shomay deláni tahá kár kanagá ent ke shomay erádahán o shomay kárán pa wati nékén maksadá sarjam bekant. 14 Harché ke kanét, bé norondhag o bé dapjáká bekanéti 15-16 ke shomá pák o béayb bemánét. Chóth o kajráhén padréchéay nyámá Hodáay bémayárén chokk bebét o “Zenday Gálá”*2:15–16 Zenday Gál, bezán hamá gál ke zenda bakshit. Issá Masihay wasshén mestág. mohr bedárét o chó estárá jaháná bedrapshét. Á wahdá, Mashiay áyagay róchá pahr basta kanán ke man moptén tach o tágé o béásarén johdé nakortag. 17 Bale hamá hezmat o korbánig ke shomay báwaray bar o samar ant, agan áyáni sará mani hón ham réchagi korbánigéay†2:17 Réchagi korbánig: Kwahnén Ahdnámagay zamánagá réchagi korbánig korbánigáni yakk tahré butag ke réchagi chizzesh korbánig kortag. Edá Pulosay markay némagá eshárahé. paymá réchag bebit, man gala bán o gón shomá sajjahénán shádkámia kanán. 18 Gorhá shomá ham hamé dhawlá gón man gal bebét o shádehi bekanét.
Káseday rawán dayag
19 Bale man Hodáwand Issáay ométá Timutáusá zutt pa shomá rawána dayán ke maná ham gón shomay hálay rasagá delbaddhi berasit. 20 Chéá ke maná dega choshén hamdelén mardomé nést ke pa del o setk shomay hayálá bebit. 21 É dega sajjahénán Issá Masihay kár eshtag o wati jenday nap o suttáni randá kaptagant. 22 Bale shomá wata zánét ke Timutáusá láheki pésh dáshtag. Á pa wasshén mestágay sheng kanagá gón man anchosh hamkópag butag ke chokké gón petá. 23 Paméshká, anchosh ke man sahiga bán ke mani hál ché bit, maná omét ent ke áiá zutt dém dáta kanán. 24 Man deljam án ke Hodáwand ráhé pacha kant o mani jend ham zutta kayt.
25 Bale mana gwashán zaluri ent ke man Epapróditusá padá shomay kerrá dém bedayán ke á, mani brát o hamkár o hamkopagén johdkár o shomay kásed ent ke shomá pa mani zaluratáni purah kanagá dém dátag. 26 Chéá ke á, pa shomá sajjahénáni didárá hodónák ent. Paréshán ent ke shomá áiay nádráhiay hálá sahig butagét. 27 É rást ent ke nádráh at, markig at, bale Hodáyá áiay sará rahm kort. Tahná áiay sará na, mani sará ham rahmi kort ke maná gamay chakká gamé marasit. 28 Paméshká man áiay wátarr dém dayagá sakk hodónák án ke wahdé shomá padá gendéti, gal bebét o mani parésháni kamter bebit. 29 Gorhá pa Hodáwandaygi áiá pa galé wasshátk bekanét o áiay dhawlén mardomán ezzat bedayét. 30 Chéá ke á pa Masihay kárá meragi butag. Wati sáhay parwáhi nadásht tánke shomay hamá hezmatáni kammiá purah bekant ke shomá pa man kort nakortagant.