8
پُرشئوکت اِنت تئیی نام
په سازگر و وش‌آوازانی سالارا. «گیتّیتئے»*8:0 باور اِش اِنت که گیتّیت موزیکئے یک گالے. تَرزئے سرا. داوودئے زَبور.
1 او هُداوند، مئے هُداوند!
چِنکدر پُرشئوکت اِنت تئیی نام جهانئے چارێن کُنڈان.
تئو وتی شان و مزنی آسمانانی سربرا شِنگ و تالان کرتگ.
2 په وت ستا و سنا، چُکّ و شیرمِچێن نُنُّکانی دپا هم داتگ
که تئیی دژمنانی سئوَبا ترا ستا بکننت،
تانکه دژمن و بێرگیران چُپّ و بێتئوار بکنئے.
3 وهدے تئیی آسمانانی نێمگا چاران
که تئیی لنکُکانی اِزم و هنر اَنت
ماه و اِستارانی نێمگا،
که تئو برجاه داشتگ‌اَنت،
4 انسان چیے که تئو آییئے گَموار ببئے و
بنی آدم کئے اِنت که آییئے دلگۆشا بدارئے؟
5 بله اَنگت تئو چه پرێشتگان†8:5 یا: چه هُدایا. بسّ کَمُّکے کمتر کرت و
مزنی و اِزّتئے تاج سرا دات.
6 وتی دستئے سجّهێن کارانی سرا هاکم کرت و
هر چیزّ آییئے پادانی چێرا اِشت.
7 سجّهێن رَمَگ و گۆرُّم‡8:7 گۆرُّم، بزان گۆکانی رُمب.
گیابان و سهرایی جانوَر
8 آسمانئے بالی مُرگ و
دریائے ماهیگ و
هر چے که چه زِرئے§8:8 زِر، بزان دریا. راها گوَزیت.
9 او هُداوند، مئے هُداوند!
چِنکدر پُرشئوکت اِنت تئیی نام جهانئے چارێن کُنڈان.