45
او هُدا! تئیی بادشاهی ابدمان اِنت
په سازگر و وش‌آوازانی سالارا. «سوسنانی» تَرزئے سرا. کۆرهئے چُکّانی شئیری گوَشتانک. اِشکی سئوت.
1 دلُن چه زێباێن گالان سررێچ اِنت،
شئیرے په بادشاها گوَشان،
زبان، زبردستێن نبیسۆکێئے کَلَمئے پئیما اِنت.
2 تئو آدمیانی نیاما زێباترێن ائے و
چه تئیی لُنٹان لال و گئوهرَ گواریت،
پمێشکا هُدایا ترا اَبدمانێن برکتے داتگ.
3 او تمردێن بادشاه! گۆن وتی شان و شئوکتا
زَهما لانکا بند.
4 گۆن هما شئوکتا پێرۆزیئے اسپا بتاچێن،
په راستی، بێکِبری و اِنساپئے دارگا،
بِلّ که راستێن دست ترا باکمالێن کار سۆج بدنت.
5 تئیی تیر تێز اَنت و بادشاهئے دژمنانی دلا نندنت،
کئوم تئیی پادانی چێرا کپنت.
6 او هُدا! تئیی بادشاهی تهت مُدامی و اَبدمان اِنت،
تئیی بادشاهی اَسا، اَدل و اِنساپئے اَسا اِنت.
7 تئو پاکی و راستی دۆست داشتگ و چه بدیا نَپرَت کرتگ،
پمێشکا هُدایا، تئیی هُدایا، ترا گێشتر چه تئیی همراهان
شادهیئے رۆگن پِر مُشتگ.*45:7 رۆگن پِر مُشگ، بزان په بادشاهیا گچێن کنگ.
8 سجّهێن جامگِت گۆن مُرّ و اَوود و تۆجا مُشتگ و وشبۆ بوتگ‌اَنت.
آجێن†45:8 آجێن، بزان چه آجا اَڈّ بوتگێن. آج چه پیلّئے دنتانان درَ کئیت. کَسرانی تها سیمّی سازانی زێمل ترا شادانَ کننت.
9 بادشاهانی جنک تئیی گرانازێن مهمان اَنت،
تئیی راستێن نێمگا، مَلکه گۆن اُپیرئے‡45:9 اُپیر جاگهے اَت که تلاهی باز اَت. تلاهانی سینگارا اۆشتاتگ.
10 او جنک! بِشکن و شَرّیا دلگۆش کن،
وتی کئوم و پتی لۆگا شمۆش،
11 بِلّ بادشاه تئیی زێباییئے شئیدا ببیت،
آییئے دێما په اَدب بۆشت که آ تئیی واجه اِنت.
12 سورئے شهرئے مردم§45:12 اَسلیگێن اِبرانی نبشتانکَ گوَشیت: «سورئے شهرئے جنک». سور بندنے اَت و مردمی هستۆمند اتنت. گۆن وتی ٹێکیا کئیت،
شهرئے هستۆمندێن مردم تئیی رزا و وشنۆدیئے رندا بنت.
13 شاهئے جنک وتی کَسرا سکّ زێبدار اِنت،
آییئے پۆشاک زَرگواپ اَنت.
14 گۆن پُردۆچێن جامگان بادشاهئے کِرّا برنتی،
نِشتگێن جنک، آییئے دَزگهار، آییئے پدا گۆن اَنت.
15 په شادهی دێم دئیگَ بنت و
بادشاهی کلاتا سرَ بنت.
16 تئیی پت و پیرُکانی جاگها، اۆبادگِتَ نندنت،
آیان سجّهێن مُلکئے کماش و مسترَ کنئے.
17 تئیی نامئے یاتا نَسلانی نَسل زندگَ داران،
پمێشکا سجّهێن کئوم ترا اَبد تان اَبدَ نازێننت.