78
اِشیا په دێمی نَسلان سر کنێت
اَساپئے شئیری گوَشتانک.
1 او منی کئوم! منی سۆجان گۆش دار و
دلگۆشا گۆن منی هبران کن.
2 وتی دپا په بتل پچَ کنان و
کوَهنێن چاچ و چیستانان مانا کنان،
3 هما که ما اِشکتگ و زانتگ‌اَنت،
هما که مئے پیرێنان مارا گوَشتگ‌اَنت.
4 اِشان چه آیانی چُکّ و نُماسگان چێرَ ندئیێن،
گۆن آیۆکێن نسلا هُداوندئے پُرشئوکتێن کارانی کِسّها کارێن،
هُداوندئے زۆر و توانئے کِسّها کارێن و
آییئے کرتگێن اَجَبێن مۆجزهانی کِسّها.
5 آییا گواهیے په آکوبا اِشت،
شَریَتی په اِسراییلا آورت و
مئے پت و پیرێنی پرمان داتنت
که اِشان وتی چُکّ و نُماسگان سرپد بکنێت،
6 تان دێمی نسلِش بزاننت و
هما چُکّ هم که اَنگت پێدا نبوتگ‌اَنت،
وتی وهدا، گۆن وتی چُکّ و نماسگان اِشانی کسّها بکننت،
7 تانکه آ هم هُدائے سرا تئوکل بکننت و
هُدائے کاران مشَمۆشنت و
آییئے هُکمان بمنّنت.
8 وتی پت و پیرێنانی پئیما مبنت،
سَرکش و مانمئیاتک*78:8 مانمئیاتک، بزان هما که کَسّا نمَنّیت.
که دلِش گۆن هُدایا نبست و
اَرواهِش گۆن هُدایا وپادار نه‌اَت.
9 اِپراییمی، هرچُنت که گۆن کمانان سِلَهبند اتنت،
بله جنگئے رۆچا تَتکنت.
10 آیان هُدائے اَهد نداشت و
وتی دلا شئورِش کرت که «آییئے شَریَتئے سرا زندَ نگوازێنێن.»
11 آییئے کرتگێن کارِش شَمُشتنت،
هما اَجَبێن کار که آیانا پێشی داشتگ‌اتنت،
12 هما کار که آیانی پت و پیرێنانی دێما کرتگ‌اتنتی،
مِسرئے مُلکا، زۆهانئے گیابانا.
13 آیانی دێمئے دریایی نێم کرت و آیی گوازێنتنت،
آپی، دوێن دێمان چۆ دیوالا مِکّ کرت.
14 رۆچا، گۆن جمبرا رهشۆنی‌ای داتنت و
شپا گۆن آسئے رُژنا.
15 گیابانا، تلاری تَل کرتنت و
آیانا، جُهلێن زِرێئے کِساسا آپی دات.
16 چه تلاران چمّگی بۆتکنت و
آپی چۆ کئورا رُمبێنت.
17 بله آیان اَنگت گێشتر گناه کرت و
گیابانا بُرزێن اَرشئے هُدائے هلاپا شۆرشِش کرت.
18 هُدااِش په زانت هما وراکانی سرا چکّاسِت
که آیانی دلا لۆٹت.
19 هُدائے هلاپا هبرِش کرت و گوَشتِش:
«هُدا اے گیابانا پَرزۆنگے پَچ کرتَ کنت؟
20 تلاری وَه جت و چه آییا آپ رئوان بوت و
کئور سر رِچان بوتنت،
بله وتی مردمان نان هم داتَ کنت؟
یا په وتی کئوما گۆشت هم تئیار کرتَ کنت؟»
21 هُدایا که اِشکت، زَهر گپت،
آسے په آکوبا رۆکی کرت،
هِژمی په اِسراییلا چست بوت.
22 چیا که هُدائے سرا ایمانِش نێست‌اَت و
باورِش نبوت که هُدااِشَ رَکّێنیت.
23 آسمانی په پَچ بئیگا پرمان دات و
اَرشئے دروازگی پَچ کرتنت.
24 مَنّی†78:24 مَنّ هما آسمانی نگن اِنت که موسّائے زمانگا، هُدایا په بنی اِسراییلیان هما وهدا اێر آورت که آ بَرّ و گیابانان سَپَرا اتنت. په آیان چۆ هئورا گوَرت که بوَرنت،
آسمانی گندمی بَکشاتنت.
25 مردمان پرێشتگی وراک وارت،
په آیان بێکساس وراکی رئوان دات.
26 چه آسمانا رۆدراتکی گواتی سر دات و
گۆن وتی زۆرا جنوبی گواتی چست کرت.
27 دنزانی پئیما په آیان گۆشتی گوارێنت،
دریائے رێکانی کِساسا، بالی مُرگ،
28 آیانی اُردگاها‡78:28 اُردگاه هما جاگه اِنت که مردم په کسانێن وهدێا گدانَ بندنت و نندنت. اێری آورتنت،
آیانی گدانانی کِرّ و گوَران.
29 وارت و سێرِش کرت،
په هر چیزّا که آیان هِرس اَت، داتنتی.
30 بله چه آیانی هِرسئے پوره بئیگا پێسر،
که وراکِش اَنگت دپا اَت،
31 هُدائے هِژم آیانی سرا پاد آتک،
آیانی زۆرمندترێن مردمی کُشتنت و
اِسراییلئے ورنایی جُکّێنتنت.
32 اے سجّهێن کارِش دیستنت و اَنگت هم گناهِشَ کرت و
آییئے اجبێن کارانی سرا باورِشَ نکرت.
33 گڑا آیانی رۆچی په ناهودگی هلاس کرتنت و
سال په تُرس.
34 هُدایا که آیانی کُشگ بِندات کرت، نون آییئے شۆهازا در کپتنت.
دێم په هُدایا پِر تَرّتنت و په سِتک و دل هُدائے شۆهازا بوتنت.
35 هئیالا کپتنت که هُدا آیانی تلار اِنت،
هما بُرزێن اَرشئے هُدا، آیانی پُشت و پناه.
36 بله گۆن وتی دپا، گۆن آییا چرپ‌زبانی‌اِشَ کرت و
گۆن زبانا درۆگِشَ بَست.
37 دلِش گۆن آییا وپادار نه‌اَت و
آییئے بستگێن اَهدِش نداشت.
38 بله آ اَنگت مهربان اَت و آیانی گناهی بَکشِتنت و
سجّهێنی نکُشتنت.
رند په رندا وتی هِژمیَ داشت و
وتی سجّهێن گزبی درشانَ نکرت.
39 زانتی که اے هاکیێن انسان اَنت،
رئوۆکێن گواتے که پدا پِرَ نترّیت.
40 گیابانا چینچک رندا چه هُدایا سرکشی‌اِش کرت،
اۆدا آاِش گَمیگ کرت.
41 رند په رندا هُدااِش چکّاست،
اِسراییلئے پاکێنِش آزار دات.
42 آییئے دستئے زۆرِش یات نکرت
که آ رۆچا چۆن چه دژمنانی دستا رَکّێنتنتی،
43 هما وهدا که مِسرا وتی نشانی‌ای پدّر کرتنت و
زۆهانئے گیابانا اجبێن کاری کرت.
44 آیانی کئوری هۆنا بدل کرتنت
که کَسّا چه وتی جۆان آپ وارتَ نکرت.
45 مکسکانی رُمبی آیانی نیاما راه داتنت که مکسکِش بورنت و
پُگلانی رُمب، که بربادِش بکننت.
46 آیانی کِشاری مَدَگانا داتنت و
بَر و سَمر کَٹَگان§78:46 کَٹَگ مَدَگئے زاتے. وارتنت.
47 آیانی انگوری گۆن ترۆنگلا زئوال کرتنت و
انجیرانی درچک، گۆن هار و توپّانان.
48 آیانی رمگی په ترۆنگل کُشتنت و
دَلوَت، په گْرند و گْرۆک.
49 وتی سۆچۆکێن کَهر و گزبی آیانی سرا رئوان دات،
کهر و گَزب و اَزاب،
گار و گُمسار کنۆکێن پرێشتگانی ٹۆلیے آیانی سرا.
50 راهی په وتی هِژما راست و تچک کرت،
چه مرکا نرَکّێنتنتی، وبایانی دپاای داتنت.
51 مِسرئے سجّهێن ائولی چُکّی جتنت،
مِسرئے*78:51 اَسلیگێن اِبرانی سیاهگَ گوَشیت «هامئے» که په مِسرا اِشارهے. گدان‌نِندانی مردانگیئے ائولی بَر و سَمر.
52 بله وتی مردمی رمگئے پئیما سر دات و برتنت،
پسانی ڈئولا گیابانان رهشۆنی‌ای کرتنت.
53 آیی په اێمنی رهشۆنی کرتنت که متُرسنت
بله آیانی دژمن دریایا مان پتاتنت.
54 گڑا آیی وتی پاکێن زمینا سر کرتنت،
هما کۆهستگێن مُلکا که گۆن وتی راستێن دستا گپتگ‌اَتی.
55 آیانی دێما کئومی چه اۆدا در کرتنت،
کئومانی زمینی آیانی میراس کرتنت و
اِسراییلئے کَبیله‌ای گدانانی تها جهمنند کرتنت.
56 بله اَنگت آیان بُرزێن اَرشئے هُدا چکّاست و
آییئے هلاپا سرکشی‌اِشَ کرت،
آییئے هُکمِشَ نمنّت.
57 وتی پیرێنانی پئیما راستێن راهِش یلهَ دات و بێوَپا بوتنت،
چۆ سُست و ناباورێن کمانا منتنت.
58 بُرزێن جاهان بُتهانه‌اِشَ بَست و هُدااِش زَهرَ بَراێنت،
بُتِشَ جۆڑێنت و هُدااِش هسدّیگَ کرت.
59 هُدایا که دیست†78:59 اَسلیگێن اِبرانی نبشتانکَ گوَشیت: «هُدایا که اِشکت...»، سکّ هِژم گپت و
اِسراییلی سَرجمیا یله کرت.
60 وتی شیلوهئے منندجاهی یله کرت،
هما تَمبو که هُدا اۆدا مردمانی نیاما جهمنند اَت.
61 وتی زۆر و واکئے پێتی‌ای‡78:61 پێتی، بزان سندوک. بندیگ کناێنت،
وتی شان و شئوکتئے نِشانی‌ای دژمنانی دستا دات.
62 وتی کئومی زهمانی دپا دات،
وتی میراسئے سرا سکّ هِژمناک بوت.
63 ورناێن بچک، آسا وارتنت و
جنک، په سوری نازێنکان سر نبوتنت.
64 دینی پێشوا زهمانی دپا کپتنت و
جنۆزامان گرێتَ نکرت.
65 نون هُدایا اَنچش جاه جت که یکّے چه وابا بُستَ کنت،
چۆ که جنگۆلے چه شرابئے بێهۆشیا جاه بجنت.
66 وتی دژمنی جت و پُشتا کنزێنت و
اَبدی رُسواییێا دئور داتنت.
67 بله ایسُّپئے تمبویی نادۆست کرت و
اِپراییمئے کَبیلهی نزُرت،
68 یَهودائے کَبیلهی گچێن کرت،
سَهیونئے کۆه، که دۆست اَتی.
69 وتی پاکێن جاگهی، بُرزَگانی پئیما اڈّ کرت،
زمینئے پئیما نمیران، جۆڑی کرت.
70 وتی هزمتکارێن داوودی گچێن کرت و
چه پسانی گواشا دری کرت،
71 چه اِدا و رند، آیی چه مێشانی شپانکیا در کرت و
وتی کئوم، آکوبئے شپانکی کرت،
وتی میراس، اِسراییلئے.
72 داوودا گۆن ساپێن دلے آیانی شپانکی کرت و
گۆن هُنَرمَندێن دستے آیانی رهشۆن بوت.
*78:8 78:8 مانمئیاتک، بزان هما که کَسّا نمَنّیت.
†78:24 78:24 مَنّ هما آسمانی نگن اِنت که موسّائے زمانگا، هُدایا په بنی اِسراییلیان هما وهدا اێر آورت که آ بَرّ و گیابانان سَپَرا اتنت.
‡78:28 78:28 اُردگاه هما جاگه اِنت که مردم په کسانێن وهدێا گدانَ بندنت و نندنت.
§78:46 78:46 کَٹَگ مَدَگئے زاتے.
*78:51 78:51 اَسلیگێن اِبرانی سیاهگَ گوَشیت «هامئے» که په مِسرا اِشارهے.
†78:59 78:59 اَسلیگێن اِبرانی نبشتانکَ گوَشیت: «هُدایا که اِشکت...»
‡78:61 78:61 پێتی، بزان سندوک.