89
اَدل و اِنساپ تئیی بادشاهیئے بُنیاد اَنت
ایتان اِزراهیئے شئیری گوَشتانک.
1 هُداوندئے مِهرا تان اَبدَ نازێنان
چه وتی زبانا، تئیی وپاداریئے کِسّها سجّهێن نسلان سرَ کنان.
2 من گوَشت که «تئیی مِهر اَبدمان اِنت و
تئو وتی وپاداری، آسمانا کاهِم کرتگ.»
3 تئو گوَشت: «من گۆن وتی گچێن کرتگێنا اَهد و کَرارے بستگ و
گۆن وتی هزمتکار داوودا په سئوگند کئول کرتگ:
4 ‹تئیی پدرێچا تان اَبد برجاهَ داران و
تئیی بادشاهی تَهتا نَسلانی نَسل.›» اۆشت...
5 او هُداوند! آسمان تئیی اجبێن کاران ستا کنت و
تئیی وپاداریا هم، پاکێنانی دیوانا.
6 آسمانان، کئے گۆن هُداوندئے مَٹّ بوتَ کنت؟
چُشێن آسمانی هستیے هست که هُداوندئے پئیما ببیت؟
7 هُدائے تُرس آسمانی هستیانی نیاما سکّ مزن اِنت،
آ چه وتی چَپّ و چاگردئے سجّهێنان باکَمالتِر اِنت.
8 او هُداوند، لشکرانی هُدا! کئے تئیی مَٹّ و دروَر اِنت؟
تئو زۆراک ائے، او هُداوند، و تئیی وپاداریا ترا چپّ و چاگرد کرتگ.
9 تئو مستێن دریایانی سرا هُکمرانیَ کنئے و
وهدے چئولِش چستَ بنت، تئو اێرِشَ کارئے.
10 تئو رهاب،*89:10 رَهاب، بزان گُروناک. ادا بلکێن په شئیتانی تاگتان گوَشگ بوتگ. لاشێئے پئیما درُشت و
گۆن وتی زۆرمندێن باسکا وتی دژمن شنگ و شانگ کرتنت.
11 آسمان تئیگ اِنت و زمین هم،
جهان و اِشیئے تها هرچے که هست، تئو اَڈّ کرتگ‌اَنت.
12 شمال و جنوب تئو اَڈّ کرتگ‌اَنت،
تابۆر و هِرمۆنئے کۆه تئیی ناما نازێننت.
13 تئیی باسک زۆرمند اِنت،
تئیی دست زۆراور اِنت،
تئیی راستێن دست پُرواک و سۆبێن اِنت.
14 اَدل و اِنساپ تئیی بادشاهیئے بُنیاد اَنت،
مِهر و وپاداری تئیی همراهیا، دێما گام جَنان اَنت.
15 او هُداوند! بَهتاور هما اَنت که شادمانیئے آوازا پجّاهَ کارنت و
تئیی بارگاهئے نورا گامَ جننت.
16 سجّهێن رۆچا تئیی نامئے سرا شادهیَ کننت و
چه تئیی اَدلا سربُلند اَنت.
17 چیا که تئو آیانی شان و شئوکت و آیانی واک و توان ائے و
چه وتی مهربانیا مئے کانٹا†89:17 کانٹئے مانا اِدا زۆر و کدرت اِنت. سرپرازَ کنئے.
18 بێشَکّ، مئے بادشاه هُداوندئیگ اِنت،
مئے اِسپر، اِسراییلئے پاکێنئے.
19 یک وهدے تئو، شُبێنا گۆن وتی وپاداران هبر کرت و گوَشت:
«من جنگۆلے مَدَت کرتگ و
چه کئوما گچێنی ورناے رۆدێنتگ.
20 من وتی هزمتکار، داوود شۆهاز کرتگ و
وتی پاکێن، رۆگن پِر مُشتگ‡89:20 رۆگن پِر مُشگ، بزان په بادشاهیا گچێن کنگ..
21 منی دست گۆن آییا گۆنَ بیت و
منی باسکی زۆرمندَ کنت.
22 دژمن چه آییا باجَ نبارت و
بدکار آییئے سرا سرزۆرَ نبیت.
23 دژمنان آییئے دێما پرۆشَ دئیان و
هرکَس که چه آییا نپرتَ کنت، پرۆشانی.
24 منی مِهر و وپاداری آییئے همراهَ بنت و
منی ناما آییئے کانٹ بُرزادَ بیت.
25 آییئے دستا تان دریایا سرَ کنان،
آییئے راستێن دستا تان کئوران.
26 آ منا گوانکَ جنت و گوَشیت: ‹تئو منی پت ائے،
منی هُدا و منی نجاتئے تلار.›
27 من هم آییا وتی مسترێن چُکَّ کنان،
جهانئے مسترێن بادشاه.
28 وتی مِهرا تان اَبد آییئے همراهَ کنان و
گۆن آییا وتی اَهد و کَرارا مُهرَ داران.
29 تان اَبد آییئے نسلا برجاهَ داران،
آییئے بادشاهیئے تَهتا آسمانئے رۆچانی هسابا.
30 «اگن آییئے چُک منی شَریَتا یله بکننت و
منی پرمانانی رَندگیریا مکننت،
31 اگن منی رهبندان بپرۆشنت و
منی هُکمان ممَنّنت،
32 آیانی گناهان په لَٹّ سزا دئیان،
ناپرمانیان، په هئیزَران،
33 بله آییئے دۆست دارگا بسَّ نکنان و
گۆن آییا وتی کرتگێن کئولا نپرۆشان.
34 وتی اَهد و پئیمانا نپرۆشان و
آ هبر که چه منی دپا در آتکگ، بدلیَ نکنان.
35 من یک برے مان وتی پاکیا سئوگندے وارتگ و
گۆن داوودا درۆگَ نبندان،
36 که آییئے نَسل تان اَبد برجاهَ مانیت و
آییئے تهت منی درگاها چۆ رۆچا اَبدی اِنت،
37 چۆ ماها تان اَبد برجاهَ مانیت،
که جمبرانی تها تچک و راستێن شاهدے.» اۆشت...
38 بله انّون تئو وتی دێم تَرّێنتگ و آ یله کرتگ،
وتی رۆگن پِر مُشتگێنئے سرا هِژم گپتگئے.
39 تئو گۆن وتی هزمتکارا بَستگێن اَهد و پئیمان پَد تَرّێنتگ و
آییئے تاج، زمینا دئور داتگ.
40 تئو آییئے سجّهێن دیوال کرۆتکگ‌اَنت و
آییئے مُهرێن کلات پرۆشتگ.
41 هرکَس که چه راها گوَزیت، آییا پُل و پانچَ§89:41 پُل و پانچَ، بزان زۆربُرد، لُٹّ و پُل. کنت و
آ وتی همساهگانی کَلاگی جۆڑ بوتگ.
42 تئو آییئے دژمنانی راستێن دست بُرزاد بُرتگ و
و سجّهێن بدواه شادمان کرتگ‌اَنت.
43 تئو آییئے زَهم کُنٹ کرتگ و
جنگا مَدَت نداتگ.
44 تئو آییئے شان بُرتگ و
تَهت هاکان دئور داتگ.
45 تئو آییئے ورناییئے رۆچ کمّ کرتگ‌اَنت و
شرمندگیئے کباهێا پۆشێنتگ. اۆشت...
46 تان کدێن، او هُداوند! وتا تان اَبد چێرَ دئیئے؟
تان کدێن تئیی هِژم چۆ آسا رۆکَ مانیت؟
47 هئیالا بکپ که منی اُمرئے رۆچ چۆن کمّ اَنت،
تئو بنی آدم ناکارێن چیزّے جۆڑ کرتگ.
48 کجام انسان اِنت که مرکَ نگندیت،
کئے چه کبرئے زۆرا رکِّتَ کنت؟ اۆشت...
49 او هُداوند! تئیی آ پێسریگێن مِهر کجا اِنت
که تئو گۆن داوودا سئوگند وارت و کئول کرت.
50 او هُداوند! هئیالا بکپ که تئیی هزمتکارا چۆن شِگانَ جننت،
سجّهێن کئومانی ریشکندان وتی دلا داران.
51 او هُداوند! تئیی دژمنان منی سرا ریشکند کرتگ و
هَمُک گاما تئیی رۆگن پِر مُشتگێنِش کَلاگ بستگ.
52 هُداوندا تان اَبد ستا بات.
اَنچش بات. آمین.