1 Nikudimus námén Parisié, ke cha Yahudiáni sarók o diwánay báskán*3:1 Básk, bezán ozw, membar. yakké at, 2 shapéá Issáay kerrá átk o gón áiá gwashti: “Oo ostád! Má zánén taw ostádé ay ke cha Hodáay némagá átkagay, chiá ke tán Hodá gón kaséá gón mabit, á é dhawlén ajabbatén nesháni pésh dáshta nakant ke taw pésh dáragá ay.” 3 Issáyá áiay passawá gwasht: “Tará rásténa gwashán, tán kasé padá nóksará†3:3 Yá: cha borzá, cha ásmáná. pédá mabit, Hodáay bádsháhiá dista nakant.” 4 Nikudimusá gwasht: “Chón buta kant ke piréné padá cha mátá pédá bebit? Buta kant ke á padá mátay lápá berawt o pédá bebit?” 5 Issáyá passaw dát: “Tará rásténa gwashán, tán kasé cha áp o Ruhá pédá mabit, Hodáay bádsháhiá pád ér korta nakant. 6 Á chizz ke cha jesmá pédá bit, jesm ent o á chizz ke cha Ruhá bit, ruh ent. 7 Hayrán mabay ke tará gwashán shomá sajjahén báyad ent nóksará pédá bebét.

8 “Gwát har jáh ke belóthit, kasshit. Taw áiay tawárá eshkonay, bale nazánay cha kojá kayt o kojá rawt. Á kas ke cha Ruhá pédá bit, á ham anchosh ent.” 9 Nikudimusá gwasht: “É chón buta kant?” 10 Issáyá gwasht: “Taw wat Esráiliáni ostádé ay, é chizzá nazánay? 11 Báwar kan, má hamá chizzáni habará kanén ke áyáni bárawá zánén o hamá chizz ke distagant, áyáni sháhediá dayén. Bale shomá may sháhediá namannét. 12 Wahdé zemini chizzáni bárawá habara kanán báwara nakanét, agan ásmáni chizzáni bárawá habar bekanán gorhá che paymá báwara kanét? 13 Hechkas ásmáná borzád nashotag, abéd cha‡3:13 Abéd cha, bezán gayr cha. hamá kasá ke cha ásmáná ér átk, bezán man ke Ensánay Chokk án. 14 Hamá dhawlá ke Mussáyá, gyábáná á már dáray sará dratk,§3:14 É kessah Tawrátay tahá átkag. Ensánay Chokk ham báyad ent chest kanag bebit, 15 tán harkas ke pa áiá imána kárit, namiránén zenday wáhond bebit.” 16 Chiá ke Hodáyá jahánay mardom haminchok dóst atant ke wati yakk o yakdánagén Chokki ham nadr kort tán harkas ke áiay sará báwar bekant gár o zyán mabit o tán abad zendag bemánit. 17 Hodáyá wati Chokk pa mardománi ér janag o mayárig kanagá jaháná rawán nadát. Rawáni dát ke áyán neját bedant o berakkénit.*3:17 Rakkénag, bezán neját dayag, bacchénag. 18 Harkas ke áiay sará báwar bekant mayáriga nabit, bale harkas ke báwar makant, hamé annun mayárig ent, chiá ke Hodáay yakdánagén Chokkay námay sará báwari nakortag. 19 Hodáay dádrasi†3:19 Dádrasi, bezán hakkén paysalah, hamá shawr ke cha dádgáhána kayt, dáwari. hamesh ent: Rozhn o nur jaháná átk, bale rozhnay badalá, mardomán taháróki dóst at, parchá ke áyáni kár sell atant. 20 Chiá ke á mardom ke sellén káráni ráh o keshká zurit cha rozhnáiá bézára bit o watá cha rozhná dura dárit, tánke áiay badén kerd páshk o paddar mabant. 21 Bale á ke rástiá gechéna kant o zurit dém pa rozhnáiá kayt, tán pakká bebit ke áiay kár Hodái butagant.

22 Randá, Issá gón wati moridán Yahudiahay métag o kallagán shot o gón áyán hamódá mant o pákshódia dáti. 23 Yahyá ham Sálemay nazziká, Aynuná, mardománi pákshódiá goláésh at. Á chágerdá áp báz at o mardom pa pákshódiá átkant. 24 Chiá ke Yahyá angat jélá bandi nabutagat.

25 Pákizagiay sará, Yahyáay morid o yak Yahudiéay nyámá kassh o chillé but. 26 Gorhá á, Yahyáay kerrá átkant o gwashtesh: “Oo ostád! Hamá mard ke Ordonay kawray á dastá gón taw gón at o taw áiay bárawá gwáhi dát, á edá pákshódi dayagá ent o sajjahén mardom hamáiay kerrá rawagá ant.” 27 Yahyáyá áyáni passawá gwasht: “Cha Hodáay dátagéná abéd, mardom dega chizzé kattheta‡3:27 Katthag, bezán nap o sutt kanag, dastá árag. nakant. 28 Shomá wat sháhed ét gwashton ke ‘Man Masih naán, bale cha áiá pésar rawán dayag butagán.’ 29 Bánóray hodábond,§3:29 Hodábond, bezán wájah, wáhond, málek, sáheb. sálónk ent. Sálónkay dóst ke óshtátag o áiay tawárá eshkont, gal o shádána bit. Hamé dhawlá, mani shádehi annun pa kamál rasetag o sarréch butag. 30 Á báyad ent démá berawt o man pad bekenzán.”

31 Á kas ke cha borzáda kayt, cha sajjahénán master ent o á ke cha é hákién donyáyá ent zemini mardomé o donyái chizzáni bárawá habara kant. Bale á ke cha ásmáná kayt cha sajjahénán master ent. 32 Har chizzé ke distag o eshkotagi, pa áyán gwáhia dant, bale hechkas áiay gwáhiá namannit. 33 Harkasá ke áiay gwáhi mannetag, Hodáay rástiay gwáhii dátag.

34 Á kas ke cha Hodáay némagá rawán dayag butag, Hodáay habarána kant, chiá ke Hodá wati Ruhá pa áiá békesása*3:34 Békesás, bezán sakk báz, béandázah, béhesáb. bakshit. 35 Petá Chokk dóst ent o sajjahén chizzi hamáiay dastá dátagant. 36 Á kas ke Chokkay sará imán byárit namiránén zenday wáhonda bit, bale á kas ke Chokkay habarán mamannit, zenday wáhonda nabit o Hodáay nárazáiay tahá gereptára bit.