Pákén Enjil cha
Lukáay
kalamá
Lukáay Enjilay pajjár
É ketábay nebisókay nám Luká ent. Á baladén dáktaré butag. Luká wat Esráilié nabutag. Cha áiay é ketáb o anchosh ham cha áiay domi ketáb, Kásedáni Kárá, zánaga bit ke Yunáni zobánay zántkárén nebisóké butag.
Lukáyá é Enjil pa Tiupilos námén Rumay bádsháhiay kárendahéá nebeshtag. Wati ketábay bongéj o shoruhátá, “sharapdárén Tiupilosay” námá gipt, ke á Issáay sará báwarmandé butag o pa wati báwarmandiay mohrter kanagá wáhagdár butag.
Luká, Hodáwandén Issá Masihá sajjahén donyáay rakkénók o yak sarjamén ensánéay shekl o dróshomá pésha dárit. Wati é ketábá cha Issá Masihay mátay lápá kapag o pédá bayagá bongéja kant. Jalilay damagá, Issá Masihay Hodái hezmatkári o padá dém pa Urshalimá áiay sát o saparay sargwastá, pa red o banda gisshénit o kárit. Godhsará, Hodáwandén Issá Masihay mark o padá zendag bayag o gón wati moridán hór bayagay bárawá nebisit.
1
Bongéj
1-3 Sharapdárén wájah Tiupilos! Anchén sargwast may nyámá*1:1–3 Nyámá, bezán myáná, darnyámá, tahá, tóká. sarjam butagant ke Enjilay awali hezmatkárán cha bongéjá,†1:1–3 Bongéj, bezán bendát, shoru. hamé sargwast gón wati chammán distagant o randá pa má raséntagant. Bázénéá áyáni bárawá nebeshtag o annun man johlánkén patth o pólé kortag o pa wat gehter distag ke áyán pa taw gón sharrén red o bandé benebisán, 4 tán hamá tálim ke taw geptagant, áyáni rástiay bárawá tai báwar mohr o mohkamter bebit.
Yahyáay pédá bayagay péshgói
5 Yahudiahay damagay bádsháh, Hirudisay zamánagá, Zakaryá námén dini péshwáé hastat ke cha Abiáay dini péshwáyáni thóliá at. Áiay jan, cha Hárunay nasl o padréchá at o námi Elizábet at.
6 Á, har doén, Hodáay chamm o nezará nék o pahrézkár atant o Hodáwanday sajjahén hokm o rahbandáni sará pa bémayári zendesha gwázént. 7 Bale chokkesh néstat, chiá ke Elizábet santh o béchokk at o doénáni omr ham mazan at.
8 Yak randé ke hezmatkáriay bárig pa Zakaryáay thóliá kapt o á, Hodáay bárgáhá dini péshwái kanagá at, 9 gón dini péshwáiay rahbandáni randgiriá, Zakaryá pálay‡1:9 Pál, bezán láthari, bay o shartbandi. sará gechén kanag but ke á, Hodáwanday mazanén parasteshgáhá berawt o sóchoki dutt bedant. 10 Wahdé Zakaryá sóchoki dutt dayagá at, é dega sajjahén mardom dhanná dwá kanagá atant.
11 Anágat,§1:11 Anágat, bezán yak anágat, achának, nágahán. Hodáwanday préshtagé, bósóchay*1:11 Bósóch, bezán jágah yá darpé ke áiay sará yá tahá sóchoki dutta dayant. rástén némagá, Zakaryáay démá záher but. 12 Gón préshtagay gendagá, Zakaryá bah mant†1:12 Bah mánag, bezán sakk hayrán bayag, boh bayag. o áiay jesm o jáná torsé kapt. 13 Bale préshtagá gón áiá gwasht: “Oo Zakaryá! Mators. Tai dwá mannag but, tai jan Elizábet mardénchokkéay sará chellaga bit o báyad ent taw áiay námá Yahyá bekanay. 14 Á, pa taw shádehi o wasshia kárit o cha áiay butená bázéné ham shádána bit, 15 chiá ke á, Hodáwanday chammá mazanén mardomé bit. Nabáyad ent sharáb o dega hanósh o bésár kanókén chizzán dap per bekant o bwárt. Á, mátay lápá cha Hodáay Pákén Ruhá‡1:15 Hodáay Pákén Ruh, bezán Ruholkodos. porra bit. 16 Bázén Bani Esráiliáni delán dém pa Hodáwandá tarrénit, ke áyáni Hodá ent. 17 Á, gón Elyás nabiay ruh o kodratá, cha Hodáwandá pésara kayt, tánke petáni delán chokkáni némagá betarrénit o namannókán ham pahrézkáráni hekmatay némagá chahr bedant, tánke pa Hodáwandá kawmé tayár bekant.”
18 Zakaryáyá cha préshtagá jost kort: “Eshiá chón bezánán o báwar bekanán? Man pir án o mani jan ham mazanomr ent.” 19 Préshtagá passaw§1:19 Passaw, bezán jwáb. dát: “Man Jebráil án o Hodáay bárgáhá óshtók án. Annun rawán dayag butagán, gón taw habar bekanán o tará é mestágá*1:19 Mestág, bezán wasshén hál, bashárat. bedayán. 20 É wahdá, nun taw lell o gonga bay o tán á róchá ke é habaráni rásti allama bit, habar korta nakanay. Chiá ke taw, mani é habar ke kawl dátagén wahdá rást o paddara†1:20 Paddar, bezán záher, áshkár. bant báwar nakortant.”
21 Hamé wahdá, mardom dhanná Zakaryáay entezár o wadárá atant. Hayrán atant ke á chiá mazanén parasteshgáhá inkadar mahtal butagat. 22 Wahdé Zakaryá dhanná dar átk, áiá gón mardomán habar kort nakort. Gorhá zántesh áiá parasteshgáhá elhámé rasetag o shobéné distagi. Chiá ke áiá gón mardomán esháraha kort o habar kanagay wáki néstat.
23 Zakaryá cha hezmatkáriay halásiá rand, wati lógá per tarret. 24 Chizzé wahdá rand, áiay jan, Elizábetá chokkéay ométwári but o tán panch máhá, démgir but o cha lógá dara nakapt. 25 Áiá gón wat gwasht: “Hodáwandá pa man choshén káré kortag, é róchán wati mehri mani sará gwáréntag o mardománi chammá é kamezzatii cha man dur kortag.”
Issá Masihay pédáeshay péshgói
26-27 Shashomi máhá, Hodáyá wati préshtag Jebráil, Jalilay damagay shahr Náserahá, Maryam námén neshtagén jenekéay kerrá ráh dát ke áiay sáng gón Issop námén mardéá butagat. Issop, cha Dáuday nasl o padréchá at. 28 Préshtag, Maryamay kerrá átk o gwashti: “Gal o shádán bay ke Hodáay nékén wáhagay sáhegá ay o Hodáwand gón taw gón ent.” 29 Cha é habaray eshkonagá, Maryam báz paréshán but o delá gwashti: “Bárén, é dhawlén hál o hawál kanagay máná chi ent?!” 30 Préshtagá gwasht: “Oo Maryam! Mators, chiá ke Hodáay mehr o rahmat tai hamráh ent. 31 Nun taw pa chokká ométwára bay o tará mardénchokké bit, ke báyad ent áiay námá Issá bekanay. 32 Á, mazanén mardomé bit o borzén arshay Hodáay Chokk zánaga bit o Hodáwandén Hodá, áiay pet o piroki, bezán Dáuday bádsháhiay tahtá áiá bakshit. 33 Á, Ákubay padréchay sará modám bádsháhia kant o áiay bádsháhi hechbara nakotthit.” 34 Maryamá cha préshtagá jost kort: “É chón buta kant ke man taningah sur nakortag o janénchokké án?!” 35 Préshtagá passaw dát: “Hodáay Pákén Ruh tai sará éra kayt o borzén arshay Hodáay zór o kodrat tai sará sáhéla bit. Paméshká á, pák o Hodáay Chokk zánaga bit. 36 Elizábet ham ke tai syád ent, piránsariá pa mardénchokkéá ométwár ent. Hamá ke gwashtagatesh santh o bérand ent, nun shash máh ent ke lápi porr ent. 37 Chiá ke pa Hodáyá, hech káré nabuteni naent.” 38 Maryamá gwasht: “Man Hodáwanday móled án, hamé dhawlá ke taw gwashtag, anchosh bát.” Randá préshtag cha áiay kerrá shot.
Maryam Elizábetay gendagá rawt
39 Hamá róchán, Maryam eshtápiá sar gept o Yahudiahay kóhestáni hand o damagay shahréá shot. 40 Ódá Zakaryáay lógá shot o Elizábeti hál o hawál kort. 41 Anchosh ke Maryamay tawár Elizábetay góshán kapt, áiay lápá, chokká serr bast o Elizábet cha Pákén Ruhá porr but. 42 Gón borzén tawáré gwashti: “Taw, janénáni nyámá bahtáwar ay! Bahtáwar ent hamá chokk ke tai lápá ent. 43 Man kay án ke mani Hodáwanday mát mani gendagá byayt? 44 Wahdé tai tayárjórhiay tawár mani góshán kapt, chokk cha galá lápay tahá soret. 45 Bahtáwar ay taw ke báwaret kortag, chiá ke Hodáwanday hamá habar ke gón taw gwashag butagant, sarjama bant.”
Pa Hodáyá Maryamay saná o satá
46 Maryamá, áiay passawá gwasht:
“Mani sáh o ján, Hodáwandá satá o saná kant.
47 Mani ruh gal o bál ent, ke Hodá mani rakkénók‡1:47 Rakkénók, bezán neját dayók. ent.
48 Chiá ke wati móleday nezórii cháretag.
Cha ed o rand, sajjahén nasl o padréch maná bahtáwara zánant.
49 Chiá ke á Páknámén Zóráká pa man mazanén kár kortag.
50 Áiay mehr o rahmat, hamá sajjahénáni posht dar poshtá mánit
ke áiay torsesh delá hastent.
51 Áiá gón wati zórákén báská, mazanén kár o kerd pésh dáshtag o
hamá ke wati delá bázén pahresh§1:51 Pahr, bezán takabbor, gorur. bastag, áiá sheng o sháng kortagant.
52 Áiá, hokmrán cha wati tahtán sarshakun o
garib, borz o sarperáz kortagant.
53 Shodig, gón wasshén chizzán sérláp o
séréni dast hórk o hálig rahádag kortagant.
54 Á wati mehr o rahmatáni yát o tránagá kaptag o
pa wati hezmatkárén Bani Esráili kawmá mehrabán butag,
55 bezán pa Ebráhém o áiay chokk o óbádagán abadi mehri bakshetag,
hamá paymá ke gón may pet o pirokán labzi kortagat.”
56 Maryam, say máhay kesásá Elizábetay lógá mant o randá per tarret o wati lógá shot.
Yahyáay pédáesh
57 Wahdé Elizábetay máh o róch sarjam butant, áiá mardénchokké but. 58 Áiay chellagiay hál ke syád o hamsáhegán sar but o eshkotesh Hodáwandá áiay sará mazanén mehr o rahmaté kortag, gorhá gón áiay wasshiá hór o sharikdár butant.
59 Wahdé nonnoká hasht róch but, pa áiay sonnat kanagá átkant. Áyán nonnokay nám petay námay sará, Zakaryá per bandagi at. 60 Bale nonnokay mátá gwasht: “Na, áiay nám báyad ent Yahyá bebit.” 61 Mardomán gwasht: “Tai kothom o hándáná, é námén mardom kass nabutag.” 62 Gorhá áyán chokkay pet, Zakaryá pa eshárah jost kort ke á wati chokká chónén námé pera bandit? 63 Zakaryáyá nebisagi dártahtagé lóthet o áiay sará nebeshti: “Chokkay nám Yahyá ent.” Gorhá sajjahén mardom hayrán butant. 64 Hamá damáná Zakaryáay gongén zobán pach but o habará lagget o Hodáay satá o sanái bongéj kort. 65 Cha é habará, hamsáhegán tors delá kapt o Yahudiahay damagay kóhestagáni sajjahén mardomán é bárawá habara kort. 66 Harkasá ke é hál eshkot wati del o hayálá chosh gwashti: “Bárén, é chokk chónén mardomé bit?” Chiá ke Hodáwanday dast gón áiá gón at.
Issáay pédáeshay bárawá Zakaryáay péshgói
67 Gorhá, Yahyáay pet Zakaryá, cha Pákén Ruhá porr but o péshgói kort o gwashti:
68 “Hodáwand, Esráilay Hodáyá satá o saná bát,
chiá ke pa wati kawmay madat kanagá átkag o kawmi rakkéntag.*1:68 Rakkénag, bezán neját dayag, bacchénag.
69 Áiá cha wati hezmatkárén Dáuday lóg o bonjáhá,
kánthé†1:69 Kánthay máná edá zór o kodrat ent. pa may rakkénagá jórhéntag,
70 anchosh ke áiá bázén wahdéá pésar,
cha wati pákén nabiáni zobáná kawl dátag.
71 Áiá, cha may sajjahén dozhmen o badwáhán ke cha má naprata kanant,
márá rakkéntag,
72 may pet o pirokáni sará mehr o rahmati kortag o
wati pákén hamá ahd o karáray yát o tránagi dáshtag.
73 Gón may pet Ebráhémá sawgendi ham kortagat,
74 ke márá cha dozhmenáni dastá berakkénit,
tánke bé tors o bimmá pa áiá hezmat bekanén o
75 áiay chamm o nezará wati sarjamén zendá
nék o pák bebén.
76 Taw, oo mani chokk!
Borzén arshay Hodáay nabi zánaga bay,
chiá ke taw cha Hodáwanday áyagá pésar,
áiay ráh o keshká tachk o tayára kanay.
77 Taw áiay kawmá é zántá dayay
ke gón áyáni gonáháni pahelliá,
Hodá áyána rakkénit.
78 Chiá ke may Hodá mehrabán ent o
cha áiay békesásén‡1:78 Békesás, bezán sakk báz, béandázah, béhesáb. rahmatán róch cha borzén arshá,
may zendmáná sara kasshit,
79 tán pa áyán ke taháróki o markay sáhegá neshtagant,
rozhnái bebakshit o
márá dém pa sohl o ásudagiay ráhá rahshóni bekant.”
80 Á chokk, rodán o mán Pákén Ruhá zórmand bayán at. Cha Bani Esráiliáni nyámá záher bayagá pésar, gyábánána mant.
*1:1-3 1:1–3 Nyámá, bezán myáná, darnyámá, tahá, tóká.
†1:1-3 1:1–3 Bongéj, bezán bendát, shoru.
‡1:9 1:9 Pál, bezán láthari, bay o shartbandi.
§1:11 1:11 Anágat, bezán yak anágat, achának, nágahán.
*1:11 1:11 Bósóch, bezán jágah yá darpé ke áiay sará yá tahá sóchoki dutta dayant.
†1:12 1:12 Bah mánag, bezán sakk hayrán bayag, boh bayag.
‡1:15 1:15 Hodáay Pákén Ruh, bezán Ruholkodos.
§1:19 1:19 Passaw, bezán jwáb.
*1:19 1:19 Mestág, bezán wasshén hál, bashárat.
†1:20 1:20 Paddar, bezán záher, áshkár.
‡1:47 1:47 Rakkénók, bezán neját dayók.
§1:51 1:51 Pahr, bezán takabbor, gorur.
*1:68 1:68 Rakkénag, bezán neját dayag, bacchénag.
†1:69 1:69 Kánthay máná edá zór o kodrat ent.
‡1:78 1:78 Békesás, bezán sakk báz, béandázah, béhesáb.