5
Bahtáwari
(Luká 6:20–23)
1 Mardománi mazanén mocchiay gendagá rand, Issá kóhéay sará sar kapt. Wahdé borzagá nesht, morid ham áiay kerrá átkant. 2 Gorhá é dhawlá áyáni tálim dayagá lagget:
3 “Bahtáwar ant hamá ke áyáni ruh wár o bazzag ent, chiá ke ásmáni bádsháhi hamáyánig ent.
4 “Bahtáwar ant hamá ke gamig o porsig ant, chiá ke áyán tasallá o delbaddhia*5:4 Delbaddhi, bezán tasallá, ométwári. rasit.
5 “Bahtáwar ant hamá ke narmdel o mehrabán ant, chiá ke zeminay mirás barók hamá bant.
6 “Bahtáwar ant hamá ke hakk o ensápay shodig o tonnig ant, chiá ke á séra bant.
7 “Bahtáwar ant hamá ke pa degarán rahma kanant, chiá ke áyáni sará ham rahm kanaga bit.
8 “Bahtáwar ant hamá ke delesh pák o sáp ent, chiá ke á Hodáyá gendant.
9 “Bahtáwar ant hamá ke sohl o émenia kárant, chiá ke á Hodáay chokk náménaga bant.
10 “Bahtáwar ant hamá ke pa Hodáay ráhay geragá bohtám†5:10 Bohtám, bezán malámat, tohmat. janag o ázár dayaga bant, chiá ke ásmáni bádsháhi hamáyánig ent.
11 “Bahtáwar ét shomá ke pa manigi mardom shomárá dozhmána dayant o ázára rasénant, shomay poshtá dróga bandant o bada gwashant. 12 Gal o washdel bebét o shádehi bekanét, chiá ke ásmáná shomay mozz sakk báz ent. Pésarigén nabiáni sará ham é dhawlén ázáresh raséntag.
Wád o rozhn
13 “Shomá jahánay wád ét, bale agan wáday tám berawt, gorhá chón padá wádók buta kant? Abéd cha‡5:13 Abéd cha, bezán gayr cha. dur réchag o mardománi pádmáliá nun dega hech kárá nayayt.
14 “Shomá jahánay nur o rozhn ét, shahré ke kóhéay sará ent, chér o andém buta nakant. 15 Hechkas rókén cherágá tagáréay§5:15 Tagár, bezán mazanén johlén darp, hirán, lagan. chérá éra nakant, cherágdánay sará éria kant tán áiay rozhnái pa lógay sajjahén mardomán berasit. 16 Hamé dhawlá shomay rozhn, mardománi démá shahm bedant tán shomay nékén kárán begendant o shomay ásmáni Petá satá bedayant o besárháyant.*5:16 Sárháyag, bezán satá kanag.
Sharyatay sarjami
17 “Gomán makanét ke man pa Tawrát o nabiáni habaráni kár nabandag o nákár kanagá átkagán. Man pa áyáni kár nabandag o nákár kanagá nayátkagán, pa áyáni sarjam kanagá átkagán. 18 Shomárá rásténa gwashán, zemin o ásmánay gár o bérán bayagá pésar, Sharyatay yak áb†5:18 Áb, bezán harp, Engrézi: letter in the alphabet. o thekké ham gára nabit tán sajjahén sarjam mabant. 19 Paméshká agan kasé cha Sharyatay parmánán gwandhteréné sost begipt o kár mabandit o degarán ham anchosh dars o sabak bedant, á, ásmáni bádsháhiá kasterén zánaga bit. Bale kasé ke é parmánáni sará kára kant o degarán ham sója dant, ásmáni bádsháhiá mazan zánaga bit. 20 Paméshká shomárá gwashán, agan shomay pahrézkári o sharkerdi cha Parisi o Sharyatay zánógeráni kerdá géshter mabit, hechbar ásmáni bádsháhiay darwázagá poterta nakanét.
Kosht o kósh
(Luká 12:58–59)
21 “Shomá eshkotag ke gón péshigén mardomán gwashag butag: ‘hón o kósh makan,‡5:21 Dargwaz 20:13. harkas hóna kant, áiay dádrasi§5:21 Dádrasi, bezán hakkén paysalah, hamá shawr ke cha dádgáhána kayt, dáwari. o dáwaria bit o mayárig kanaga bit.’ 22 Bale man shomárá gwashán, harkas wati brátay sará zahra gipt, á ham hakdiwánay*5:22 Hakdiwán, bezán ámidges, dádgáh. démá mayárig kanaga bit. Kasé ke wati brátá zá o zakat bekant, hakdiwáná mayárig kanaga bit, kasé ke wati brátá ‘hódh’ o ‘ahmaka’ gwashit, tahtarunay†5:22 Tahtarun, bezán jahannam, dózah. ásay sezáwára bit. 23 Paméshká agan korbánjáhá, korbánig kanagay wahdá yát o tránagá kaptay ke tai brátá gón taw gelagé hastent, 24 wati korbánigá hamódá korbánjáhá bell o beraw pésará gón wati brátá sohl kan, gorhá byá korbánig bekan. 25 Agan kaséá gón taw arh o dáwáé hast o tará hakdiwáná bárt, gorhá rasagá pésar, ráhá gón áiá wati arhá begisshén o sohl bekan. Chosh mabit káziay démá barag bebay, á tará apsaray dastá bedant o apsar tará bandijáhá bebárt o jél bekant. 26 Tará rásténa gwashán, tán zarráni goddhi pai o paysahá porra nakanay, cha ódá ázáta nabay.
Zená o talák
27 “Shomá eshkotag ke gwashag butag: ‘zená makan’.‡5:27 Dargwaz 20:14. 28 Bale man shomárá gwashán, agan kasé pa badchammi o deldozzi janénéá bechárit, bezán wati delá, gón hamá janéná zenái kort. 29 Paméshká agan tai rástén chamm tará dém pa gonáhá bebárt, áiá kassh o dawr beday, chiá ke cha sarjamén jánay tahtaruná kapagá pa taw sharter hamesh ent ke tai jesmay yak band o bógé cha taw jetá bebit. 30 Hamé dhawlá, agan tai rástén dast tará dém pa gonáhá bebárt, gorhá áiá borr o dawr beday, chiá ke cha sarjamén jánay tahtaruná rawagá pa taw sharter esh ent ke tai jesmay yak band o bógé cha taw jetá bebit.
31 “É ham gwashag butag: ‘agan kasé wati janá yalah bekant, gorhá báyad áiá taláknámahé bedant’.§5:31 Sharyatay Domi Rahband 24:1. 32 Bale man shomárá gwashán, agan janénéá zená nakortag o mard áiay sawn o talákán bedant, bezán áiay zenahkáriay sawaba bit o agan kasé hamá janózámén janéná sur o sáng bekant, gorhá bezán gón áiá zená kant.
Sawgend
33 “Shomá é ham eshkotag ke gón péshigén mardomán gwashag butag: ‘wati sawgendá maprósh, Hodáwanday démá wati sawgendá purah bekan’.*5:33 Bechár: Láwián 19:12; Sharyatay Domi Rahband 23:21. 34 Bale man shomárá gwashán, hechbar sawgend mawarét, na pa ásmáná, chiá ke Hodáay taht ent, 35 na pa zeminá, chiá ke Hodáay pádáni chéray padag o chárchóbah ent, na pa Urshalimá chiá ke ‘Mazanén Bádsháhay’ shahr ent. 36 Pa wati sará ham sawgend mawar, chiá ke saray mudáni yak tháléá syáh o espét korta nakanay. 37 Paméshká ódá ke ‘haw’ gwashagi ent, begwashét ‘haw’ o ódá ke ‘enna’ gwashagi ent, begwashét ‘enna’. Cha eshiá géshter Shaytánay kár ent.
Bérgiri
38 “Shomá eshkotag ke gwashag butag: ‘pa chammá chamm o pa dantáná dantán’.†5:38 Dargwaz 21:24. 39 Bale man shomárá gwashán, radkárén mardománi káráni démá maóshtét, agan kaséá tai rástén gobbá‡5:39 Gobb, bezán gónag. shahmáté jat, domiá ham áiay némagá betarrén. 40 Agan kasé pa tai jámagay kasshagá tará hakdiwáná bebárt, wati kabáhá§5:40 Kabáh, bezán jobbah. ham áiá beday. 41 Agan kasé tará pa zór o bigári hazár gámay*5:41 Asligén Yunáni nebeshtánka gwashit: “milion”, bezán kesás yak o ném kilumitar. pand janaga parmáit, do hazár gám áiay hamráhiá beraw. 42 Kasé ke cha taw lóthit, áiá beday o agan yakké wáma lóthit, chak o pad mabay.
Masihi mehr
(Luká 6:27–36)
43 “Shomá eshkotag ke gwashag butag: ‘Gón wati hamsáhegá mehr bekan†5:43 Láwián 19:18. o gón wati dozhmená naprat’. 44 Bale man shomárá gwashán, gón wati dozhmená mehr bekanét o pa hamáyán ke shomárá ázára dayant nékén dwá belóthét, 45 tán wati ásmáni Petay chokk bebét, chiá ke á wati róchá pa nék o badána drapshénit‡5:45 Drapshénag, bezán shahm dayag, rozhná kanag, jalashkénag. o wati hawrá pa pahrézkár o radkárána gwárénit. 46 Agan tahná gón hamá mardomán mehr kanét ke gón shomá mehra kanant, gorhá shomárá chónén mozzé rasit? Songi§5:46 Song, bezán máliát, thayks. o máliátgir*5:46 Bani Esráilián, songi o máliátgirén mardom nádóst atant, chiá ke á Rumay hokumatay kárendah atant o bázénéá pa wati nap o suttá cha mardomán géshén song o bája gept. hamé dhawlá nakanant? 47 Agan éwaká wati brátán drud o drahbát†5:47 Drud o drahbát, bezán salám o alayk. begwashét, gorhá cha degarán shomay sharteri chi ent? Záná, á Hodánábáwarén darkawm ham anchosha nakanant? 48 Paméshká shomá báyad tamán o béayb bebét, anchosh ke shomay ásmáni Pet wati jáhá tamán o béayb ent.
*5:4 5:4 Delbaddhi, bezán tasallá, ométwári.
†5:10 5:10 Bohtám, bezán malámat, tohmat.
‡5:13 5:13 Abéd cha, bezán gayr cha.
§5:15 5:15 Tagár, bezán mazanén johlén darp, hirán, lagan.
*5:16 5:16 Sárháyag, bezán satá kanag.
†5:18 5:18 Áb, bezán harp, Engrézi: letter in the alphabet.
‡5:21 5:21 Dargwaz 20:13.
§5:21 5:21 Dádrasi, bezán hakkén paysalah, hamá shawr ke cha dádgáhána kayt, dáwari.
*5:22 5:22 Hakdiwán, bezán ámidges, dádgáh.
†5:22 5:22 Tahtarun, bezán jahannam, dózah.
‡5:27 5:27 Dargwaz 20:14.
§5:31 5:31 Sharyatay Domi Rahband 24:1.
*5:33 5:33 Bechár: Láwián 19:12; Sharyatay Domi Rahband 23:21.
†5:38 5:38 Dargwaz 21:24.
‡5:39 5:39 Gobb, bezán gónag.
§5:40 5:40 Kabáh, bezán jobbah.
*5:41 5:41 Asligén Yunáni nebeshtánka gwashit: “milion”, bezán kesás yak o ném kilumitar.
†5:43 5:43 Láwián 19:18.
‡5:45 5:45 Drapshénag, bezán shahm dayag, rozhná kanag, jalashkénag.
§5:46 5:46 Song, bezán máliát, thayks.
*5:46 5:46 Bani Esráilián, songi o máliátgirén mardom nádóst atant, chiá ke á Rumay hokumatay kárendah atant o bázénéá pa wati nap o suttá cha mardomán géshén song o bája gept.
†5:47 5:47 Drud o drahbát, bezán salám o alayk.