12
Hodádósté pasht nakaptag
Pa sázger o washáwázáni sálárá. “Sheminitay”*12:0 Sheminitay máná “hashtomi” ent. Báwar esh ent ke edá muzikay yak gálé. tarzay sará. Dáuday Zabur.
1 Oo Hodáwand! Berakkén, chiá ke hech Hodádósté pasht nakaptag o
wapádár cha mardománi nyámá gár o bégwáh butagant.
2 Harkas gón hamsáhegá dróga bandit,
cháplusén dapesh pa préb habara kanant.
3 Hodáwand har cháplusén dapá próshát o
har bathák janókén zobáná borrát.
4 Gwashant: “Má gón wati zobáná kámyáb o sóbéna bén,
may dap o lonth ham gón má ant, may wájah o master kay ent?”
5 Hodáwanda gwashit: “Cha nezórén mardománi lagatmáli o
hájatmandáni nálagáni sawabá
nun jáha janán†12:5 Jáh janag, bezán cha wati jáhá anágatén pád áyag, Arabi o Pársiá “qiám, rastákhiz”..
Man eshán hamá paymá émenia bakshán ke esháni armán ent.”
6 Hodáwanday habar asil o béayb ant,
nograhay paymá ke cha kurahá dar átkag o
hapt randá pák o sallah kanag butag.
7 Oo Hodáwand! Taw eshán negahpánia kanay,
taw é dábén mardománi nyámá esháni posht o panáha bay.
8 Badkár har némagá tarr o tába kanant,
á wahdi ke mardom palitiá ezzata dayant.