31
Tai mayár o báhóth án
Pa sázger o washáwázáni sálárá. Dáuday Zabur.
1 Oo Hodáwand! Tai mayár o báhóth butagán,
hechbar mayl ke sharmendag bebán,
wati adl o ensápay tahá maná neját beday.
2 Wati delgóshá gón man bedár o
maná zutt berakkén.
Pa man panáhay taláré bay o
pa mani rakkénagá mohrén kaláté.
3 Pa rásti mani talár o kalát ay,
pa wati námaygi maná ráh sója dayay o rahshónia kanay.
4 Maná cha á dámá dar byár ke pa man chér o andém ent,
chiá ke mani panáh taw ay.
5 Wati ruh o sáhá tai dastá dayán.
Oo Hodáwand, oo wapádárén Hodá! Taw maná rakkénay.
6 Tará cha áyán naprat ent ke delgóshesh gón béarzeshén botán ent,
bale man tai sará tawkala kanán, oo Hodáwand!
7 Tai mehrá gala bán o shádehia kanán,
chiá ke taw mani syahróchi distagant o
mani arwáhay sakkiáni némagá hayál gwar kortag.
8 Maná dozhmenáni dastá nadayay o
mani pádán práh o sháygánén jágahé éra kanay.
9 Oo Hodáwand! Mani sará rahm kan
chiá ke paréshán án,
chammon cha gam o andóhán nezór butagant,
jesm o arwáh ham.
10 Chiá ke zendon gamán wártag o
omr nálagán,
cha mani gonáhá,*31:10 Yá: cha mani syahróchiá. tágaté pa man pasht nakaptag o
haddh o bandon pussán ant.
11 Dozhmenáni sawabá sobakk o kalági butagán,
hás pa hamsáhegán,
pajjárók cha man torsán ant o
harkas maná kuchah o damkána gendit, tachit.
12 Mordagáni warhá cha yátá shotagán o
proshtagén kunzagéay paymá butagán.
13 Chiá ke bázénéay bohtámán eshkonagá án,
tors o dehshat cha har gwará,
gón yakdegará pandala jórhénant o
pa mani koshagá mandr o repka sázant.
14 Bale oo Hodáwand! Man tai sará tawkala kanán o
gwashán ke “taw mani Hodá ay.”
15 Mani wahd o damán tai dastá ant,
maná cha dozhmenán berakkén,
cha hamáyán ke mani randá kaptagant.
16 Démá pa wati hezmatkárá drapshán kan,
gón wati mehrá maná berakkén.
17 Hodáwandá! Mayl ke sharmendag bebán,
chiá ke tará tawáron per jatag,
bell ke sharur sarjahl o sharmendag bebant o
mordagáni jaháná bétawár.
18 Drógbandén lonthesh chopp bátant,
ke gón kebr o ér janag pahrézkáráni helápá pa gorunáki habara kanant.
19 Tai néki chenkadar báz ent,
ke pa Hodátorsán ambáret kortag o
bani ádamáni chammáni démá pa hamáyán purah o sarjam kortag
ke tai báhótha bant.
20 Eshán wati bárgáhay panáhá
cha mardománi pandalán chér o andéma dáray o
wati sáhegá cha bohtám janókén zobánán dur.
21 Hodáwandá satá bát,
chiá ke wati ajabén mehrá hamé wahdá pa man paddara kant
ke man dawrah butagén shahréay paymá angerr án.
22 Man cha wati torsá gwasht:
“Cha tai chammá sestag o dur kaptagán.”
Angat taw mani peryát o záriá eshkonay,
wahdé man pa madatá tará tawára kanán.
23 Oo Hodáwanday sajjahén dóstdárán! Áiá dóst bedárét,
Hodáwand wati wapádáráni negahpániá kant,
bale gorunákénán báz sezá dant.
24 Oo sajjahénán ke Hodáwanday wadárá ét!
Porzór bebét o delá dhaddh kanét.