46
Hodá may kalát ent
Pa sázger o washáwázáni sálárá. Kórahay chokkáni Zabur. “Alámutay”*46:0 Alámutay máná “warnáén jenek” ent. Báwar esh ent ke Alámut muzikay yak gálé. tarzay sará. Sawté.
1 Hodá may panáhgáh o zór o wák ent,
madat kanóké ke sakkiáni wahdá tayár ent.
2 Paméshká natorsén, toré zemin bejombit o
kóh daryáay delá bekapant.
3 Toré áiay áp grumbán o kap o gajj bebant o
kóh cha áyáni grumbagá belarzant. Ósht...
4 Kawré hast ke jói Hodáay shahrá shádmána kanant,
borzén arshay Hodáay pákén jágahá.
5 Hodá shahray nyámá ent o shahra nasorit,
bámgwáhá Hodá madatia kant.
6 Kawm shóresha kanant o hokumat sarshakuna bant,
á wati tawárá borza kant o zemin ápa bit.
7 Lashkaráni Hodáwand gón má gón ent,
Ákubay Hodá may kalát ent. Ósht...
8 Byáét Hodáay kárán bechárét,
begendét ke áiá zeminá chónén béráni áwortag.
9 Zeminay chárén kondhán jangán halása kant,
kamáná próshit, nayzahá hurt hurta kant o
arrábahán ás mána dárit.
10 “Watá bedárét o bezánét ke man, Hodá án,
kawmáni sará hokmrán o
jaháná hákem.”
11 Lashkaráni Hodáwand gón má gón ent,
Ákubay Hodá may kalát ent. Ósht...