48
May Hodáay shahr
Kórahay chokkáni Zabur.
1 Hodáwand mazan o satáay báz láhek ent,
may Hodáay shahray tahá.
Áiay pákén kóh,
2 Sahyunay kóh, zébá gón wati borziá,
sajjahén jahánay shádehi,
shomálay borzterén bolandi,
mazanshánén bádsháhay shahr ent.
3 Hodá áiay borján ent,
watá mohrén kaláté pajjáréntagi.
4 Bádsháh yakjáh butant o
hóriá démá shotant,
5 bale anchosh ke shahresh dist,
hayrán o habakkah mantant o torsáná jestant.
6 Larzagesh delá kapt,
dardé trondén chó ke janénéay chellag o zanká.
7 Taw gón ródarátki gwátá
Tarshishay bandenay bójig*48:7 Bójig, bezán lánch, yakdár, kashti. próshtant.
8 Hamá dábá ke eshkotag nun gón wati chammána gendén,
lashkaráni Hodáwanday shahray tahá,
may Hodáay shahrá
ke Hodá tán abad pádária kant. Ósht...
9 Oo Hodáwand! Tai parasteshgáhay tahá
may johlánkén pegr o hayál gón tai mehrá ent.
10 Oo Hodá! Tai námay paymá,
tai satá zeminay chárén kondhán sara bit.
tai rástén dast adl o rástiá porr ent.
11 Cha tai dadrasiá Yahudáay métag shádmán bátant o
Sahyunay kóh shádán.
12 Sahyuná zyárat kanét, áiay chágerdá begardét o
borján hesáb kanét,
13 áiay mohrén diwáláni némagá sharriá hayál gwar dayét o
sajjahén kalátáni bechárét,
tánke gón nókén naslá begwashét
14 ke Hodá hamesh ent, may Hodá, abad tán abad,
hamá ent ke tán marká may rahshóna bit.