51
Cha mani gonáhán sar gwaz
Pa sázger o washáwázáni sálárá, Dáuday Zabur, wahdé Nátán Nabi, cha Dáud o Batshebahay wapt o wábá rand, áiay kerrá átk.
1 Oo Hodá! Pa wati mehrá bechár o
mani sará rahm kan!
Cha wati békesásén rahmatán
náparmániánon gár kan.
2 Pa sarjami maná cha mayárbárián beshód o
cha gonáhánon pák kan!
3 Chiá ke wati náparmániána zánán o
mani gonáh modám chammáni démá ent.
4 Man tai helápá, tahná tai helápá gonáh kortag o
hamá káron kortag ke tai chammá bad ent.
Paméshká, taw ke habara kanay barhakk ay o
dádrasiay wahdá béayb ay.
5 Pa rásti man mayárbár pédá butagán o
cha hamá wahdá ke mátay lápá kaptán, gonahkár.
6 Nun deljam án ke taw cha mani del o jabiná*51:6 Jabin, bezán wajud, darun, zamir, wejdán. rástiay lóthók ay o
chér o panáhén daruná maná hekmata bakshay.
7 Gón zupáay lambán†51:7 Zupáay lamb Esráiliáni korbánigáni rasmán pa palgár kanagá kár bandaga butant. Zupá kasánén drachké. pákon kan ke pákizaga bán,
maná beshód ke cha barpá espéttera bán.
8 Bell ke shádehi o shádmániá beshkonán,
bell á haddh ke taw droshtagant gal o bál bebant.
9 Cha mani gonáhán sar gwaz o
sajjahén mayárbáriánon gár kan.
10 Oo Hodá! Mani daruná pákén delé bejórhén o
mani del o jabiná padá mohrén ruhé byár.
11 Maná cha wati bárgáhá dur maperrén o
wati Pákén Ruhá cha man pach mager.
12 Wati dátagén rakkénagay shádehiá padá beday o
maná morádigén ruhé bebaksh.
13 Gorhá sarkashén mardomán tai ráhán tálima dayán o
gonahkár tai kerrá wátarra kanant.
14 Oo Hodá! Oo mani rakkénókén Hodá!
Maná cha hón o kóshay gonáhá berakkén o
zobánon tai adl o rástiá názénit.
15 Hodáwandá! Mani lonthán pach kan,
tánke mani dap tará satá bekant.
16 Tará pa korbánigá wáhagé nést,
agan na, mana áwort,
sóchagi korbánig tará washnóda nakant.
17 Hodáay delpasondén korbánig, proshtagén arwáh ent.
Oo Hodá! Proshtag o tawbahkárén deléa taw jahla najanay.
18 Pa wati washnódiá bechár o gón Sahyuná mehrabán bay,
Urshalimay diwálán padá addh kan.
19 Gorhá cha rást o ádelén korbánigán shádána bay,
cha sóchagi korbánigá ke sarjamá sóchaga bit,
tai korbánjáhá gwask pésh kanaga bant.