59
Maná cha dozhmenán berakkén
Pa sázger o washáwázáni sálárá. “Barbád makanay” tarzay sará. Dáuday shayr, hamá wahdá ke Sháulá pa Dáuday kóshá, lahtén chárug áiay lógá rawán dát.
1 Oo mani Hodá! Maná cha dozhmenán berakkén o
cha áyán ke mani helápá jáha janant, mani negahpániá bekan.
2 Maná cha badkárán berakkén o
cha hónigán neját beday.
3 Bechár ke che paymá pa mani kóshá kaminesh kortag.
Oo Hodáwand! Zórákén mard mani helápá yakjáh butagant,
maná hech gonáh o mayáré ham nést.
4 Man hech gonáh o mayáré nakortag, bale é angat mani sará orosh kanagá tayár ant.
Pa mani komaká pád á o mani hálá bechár.
5 Oo Hodáwand, oo lashkaráni Hodá! Taw Esráilay Hodá ay,
ágáh bay, sajjahén kawmán sezá beday o
badkárén dróhókáni*59:5 Dróhók, bezán mardomé ke pa repk rada dant. Pársiá “khiánatkár”, Orduá “dhukábáz”. sará rahm makan. Ósht...
6 Shapá pera tarrant,
kochekáni paymá gorrant o
shahray chágerdá gardant.
7 Bechár ke cha dapá ché dara kanant,
zahmesh dapá ent,
gwashant: “Kass eshkonagá naent.”
8 Bale taw, oo Hodáwand, áyáni sará kanday,
sajjahén kawmáni sará rishkanda kanay.
9 Oo mani wák o zór! Tai rahchár án,
chiá ke taw mani kalát ay, oo Hodáwand!
10 Hodá pa man mehrabán ent o mani komaká kayt,
dozhmenáni sará wati péróziá gendán.
11 Oo Hodáwand ke may espar ay! Áyán makosh,
chosh mabit ke mani kawm beshamóshit.
Gón wati zórákiá eshán sargardán kan o ér byár.
12 Pa wati dapay gonáh o lontháni habarán
wati kebray tahá bandig bebant.
Esháni nálat o drógbandiay sawabá,
13 eshán wati hezhmay tahá gár o gomsár kan,
gár o gomsár kan ke hech pasht makapant,
tán zánag bebit
ke cha Ákubá beger tán zeminay har kondhá Hodá bádsháhia kant. Ósht...
14 Shapá pera tarrant,
kochekáni paymá gorrant o
shahray chágerdá gardant.
15 Warákay shóházá sar sar janána bant o
agan sér mabant wába nakapant.
16 Bale man tai kodratay tawsipá sawt o sáza janán,
sohbá tai mehray satáyá sawta janán o shádehia kanán,
chiá ke taw mani borzén kalát ay o
sakkiáni wahdá mani panáhgáh.
17 Oo mani wák o twán! Tará názénán.
Hodá mani borzén kalát ent,
mani Hodá ke gón man mehra kant.