62
Arwáhon Hodáay rahchár ent
Pa sázger o washáwázáni sálárá. “Yedutunay”*62:0 Yedutun cha mazanén parasteshgáhay washáwázán yakké at. tarzay sará. Dáuday Zabur.
1 Mani arwáh pa émeni tahná Hodáay rahchár ent,
chiá ke mani rakkénag cha hamáiay némagá ent.
2 Mani talár o mani rakkénók tahná hamá ent,
mani kalát ent, hechbara nalarzán.
3 Tán kadén mardéay sará orosha kanét
tánke sarjamiá bekoshéti,
chosh ke proshtagén diwál o kaptagén shank o pallé?
4 Albat pandala sázant ke áiá cha borzád sarshakun bekanant.
Cha dróg bandagá lezzata barant,
gón wati dapá barkata dayant,
bale delay tahá nálata kanant. Ósht...
5 Oo mani arwáh! Pa émeni tahná Hodáay rahchár bay,
chiá ke mani omét gón hamáiá ent.
6 Mani talár o mani rakkénók tahná hamá ent,
mani kalát ent, mana nalarzán.
7 Mani neját o ezzat gón Hodáyá ent,
hamá mani mohrén talár ent, mani panáhgáh ent.
8 Oo mardomán! Hodáay sará tawkal kanét o
delay hálán hamáiay démá darshán kanét,
Hodá may panáhgáh ent. Ósht...
9 Pa rásti ke ensán cha daméá géshter naent,
bani ádam prébé,
agan sháhémá tóresh bekanant hech naant.
É sajjahén, yakjáh cha damé géshter naant.
10 Pa zolm o zórá tawkal makanét o
pa dozziá omét mabandét,
harchont ke shomay mál géshtera bit,
pa áiá del mabandét.
11 Hodáyá yak habaré gwashtag o
man do eshkotag,
ke zór o kodrat Hodáayg ent o
12 mehr o rahm ham taig ent, oo Hodáwand!
Taw harkasá áiay kortagén káráni hesábá, mozza dayay.