1 Namuturubi nirimagare babio, Godi ipusu owera urubia to na-waratigi-dumo neio duriomoro gabogabo ta-gororoburutai-rimo, abora neio toroho-dumo. Ina noudo ie urubia ro beda owera to imowauti-dumo nio ro modobo pua dorogora se kimibiria aboto. Ata dubu ro nio owera kimowauti ato nou nio ro mea se gi-emodobowauti-ri nou edi owera to na-waro, Tarena Urio aboudo ra o karasaubuti orora aboudo ra? 2 Ata dubu ro paea se na-imowauti ibo, ‘Iesu Keriso nedi duriomoro neito ta-gou-ro, paea dubu to gararapoi,’ io nedi owera ro morobise ie Tarena Urio aboudo ie. Nio ro umoro neito amadimo-oi-ri ibo nedi owera ro Tarena Urio aboudo osuruwo-die. 3 Ina ata dubu ro paea se na-imowauti ibo, ‘Iesu Keriso paea dubu to oroho pua nedi duriomoro ro nato,’ nedi owera ro Tarena Urio aboudo ou pua, Iesu nasa dubu aboudo ie. Nio ro keba se owera ta-girorowai-rimo ibo Iesu nasa dubu amadi-ou-ri ina abora nedi duriomoro nato toroho.

4 Merebusere nirimagare babio, nio Godi urubia ie. Kerematigi urubia nio ro keba se ta-giwororuwo-rimo mabu Tarena Urio nio abato na-omidiro nou imese auna ia ie, Satani nedi duriomoro ro nato na-woroho nou mutu modobo pua. 5 Nedi kerematigi urubia ro neio sopu duriomoro urubia ie, ina noudo ie neio ro edi owera ro na-imowauti-dumo neio ro duriomoro kimaragoidiro owera imowauti-dumo, ina duriomoro urubia ro aise irowidiro-dumo. 6 Ina nimo ia sapuwo to nimo Godi urubia ie, urubia etio ra umoro Godi, neio ro nimo owera tirowidiro-dumo. Nimo ro idaibo sosoro nieibimo-dumo Tarena Urio neio abato tomidiro. Kaupoti Godi umoro tato urubia io neio ro nimo owera kirowidiro pua. Nimo ro idaibo sosoro nieibimo-dumo Tarena Urio neio abato omidiro pua.

7 Namuturubi nirimagare babio, nimo nirimagare atu se keremati modobo ie mabu Godi nou nirimagare mabu dubu e. Nio abato etio ra urubia nirimagare na-imati-dumo neio Godi merebusere to ta-gararapoi-rimo ibose neio umoro ie Godi. 8 Etio ra urubia nirimagare imati tato, neio Godi umoro pua mabu Godi nou nirimagare mabu dubu e.

9 Nou simara ia mere gemeiriai-ro nedi duriomoro ro neito nimo keremiro gabo imodobura ri, nirimagare idaibo sosoro gowapotai-ro. 10 Morobise nirimagare tanaro ibo pua nimo ro Godi nirimagare beda sosoro nemati-dumo. Godi edi nirimagare na-iwawuti nimo aboto, io morobise nirimagare kimati ibo ie. Godi mere nou ri gemeiriai-ro araburai ri nou serawo adibiai ri miro edea rie, ibose nimo ubauba imatopeamuti ri.

11 Nou nirimagare idaibo sosoro gowapotai-ro nimo aboto, namuturubi nirimagare babio nimo atu se nirimagare keremati modobo ie. 12 Godi ata dubu ata ro owea pua. Kaupoti namabu nimo borubi kimibiria urubia mutu nirimagare keremati ato Godi nimo abato tateidirotiti, ina nou edi nirimagare ro imese iamo nimo niro turi ato.

13 Godi ro Tarena Urio ta-gemeiriai-ro nimo aboto, nimo idaibo sosoro to noi-rimo umoro ibo nimo Godi abato ti-niateidiro-dumo, ibose Godi nimo abato tateidiro. 14 Abera nou simara ia mere nedi duriomoro ro neito ta-gemeiriai-ro imese sirio urubia ubauba aboudo iapopo rie. Nimo ro nou mere ta-nemowea-rimo, ina urubia sirio nimo ro neito nimowauti-dumo. 15 Etio ro paea se na-imowauti-dumo ibo, ‘Iesu Godi mere ie,’ Godi neio abato tomidiro, ibose neio Godi abato tiateidiro-dumo. 16 Godi ro nimo nirimagare na-nimatiti-ro nimo umoro ta-noi-rimo ina abora nimo Godi nirimagare ato norodoromaidiro-dumo.

Godi nou nirimagare mabu dubu e. Etio ra arua urubia nirimagare na-imatiti-dumo neio Godi abato iateidiro-dumo, ibose Godi neio abato tateidiro. 17 Ina idaibo sosoro tanaro kororosioidiro ato nimo nirimagare imese ama-iamotiti-ri nimo niro turi ato, nimo tere mutu orowotoi-ri pua Godi sosoro gabo ato nou ro koto to nama-iwou-ri. Nimo ro Godi tere emati-ri pua mabu Iesu idaibo sosoro na-imidirotiti Abera mutu, nimo abora idaibo sosoro norowomidiro nedi duriomoro ro nato.

18 Morobise nirimagare keremati ato tere iamo-ri pua nimo abato, mabu Godi edi nirimagare ro imese kiamo ato nimo abato edi tere ro nou ro kiwatatuti ie. Tere mabu ibo ie, ata dubu ubauba tanaro na-wosioidiro ina na-imaragoidiro ubauba wisa nou sapuwo to ama-owea-ri, iedi dubu ro nou tere koi ie, nimo umoro ie nirimagare auna se nou abato owamo pua. 19 Arua urubia nimo ro nirimagare nimati-dumo mabu Godi ro keba se edi nirimagare ro ta-gaiwai-ro nimo aboto.

20 Nimo kimibiria borubi paea urubia ie, kaupoti Godi nimo ro kiauri pua. Kimibiria dubu ro nou kimibiria borubi nirimagare imati tato, nou ro modobo ia pua Godi nirimagare kemati. 21 Etio ro emati-dumo Godi nirimagare neio ro modobo ie borubi kimibiria urubia nirimagare kimati. Nedi owera ro Godi ro ibo nimowapotai-ro.