1 Mo Iesu urubia kemeauri dubu e, mo ro nou ri nisioidiro nedi peba owera ro. Oro Godi ro kohodowa orobo ie merebusere mutu. Nio mo ro morobise ia nirimagare nimatititi, ibose imese urubia etio ra morobise umoro na-iworohuti-dumo neio ro nio nirimagare timatititi-dumo. 2 Morobise umoro nimo abato tiamotiti ina ibose ama-iamotiti-ri womu tato womu tato, nou mabu ato ie nio mo ro nirimagare kimati. 3 Wisa tato kiwarebai, natonato, miro Abera Godi aboudo ie ibose nou mere Iesu Keriso nou aboudo ie nimo abato ama-iamotiti-ri, morobise umoro daro nirimagare mutu.

4 Mo ro owera ta-nirowai oro arua merebusere morobise gabo ato toroho-dumo Abera ro beda sosoro nimowapotai aise oroho-ri. Edi owera ro na-nirowai mo auna ia kamade ro norobai.

5 Nirimagare babio nio mo ro a-niraratoro nimo nirimagare keremati, nedi owera ro orio owera pua keba ia se ta-nirorowai-rimo. 6 Nirimagare maumo owamo ibo nimo ro isioidiro-ri Abera ro beda sosoro owera nimowapotai-ro. Modobo ie urubia nio ro nirimagare kimati, nedi owera ro nio ro keba ia se ta-girowai-rimo Abera aboudo.

7 Karasaubuti urubia sirio abora toroho-dumo neio ibo titamudiro-dumo Iesu Keriso nou paea dubu to oroho pua, kaupoti neio morobise urubia pua neio Iesu nasa urubia ie. 8 Ba-diraroweauti-mo, modobo pua idaibo sosoro bagea owera neio aboudo kirowidiro. Mabu nimo ro awawo woko ta-nisioidiro-rimo modobo pua nio ro kiasoperai, modobo ie nio ro Godi aboudo mea wisa momuo se kimade. 9 Etio ro emasaudo-dumo Iesu Keriso morobise kitamudiro tanaro, Godi neio abato omidiro pua. Ibose etio ra Iesu Keriso kitamudiro tanaro na-ibodoro-dumo Abera nou mere mutu neio abato timidiro-do.

10 Ina ibose amia urubia nio sabowa to kou ato, Iesu Keriso kitamudiro tanaro kibodoro tato, nedi urubia ro nio ro nato iramairiai mamo. 11 Mabu idaibo sosoro urubia nio ro kiramairiai ato, nio ro ubi to komidai ie neio edi ubauba kitamudiro ro.

12 Mo owera sirio ie nio kimowauti aboto kaupoti modobo pua mo ro kisioidiro peba to, mo modobo ie nakara se durupi to kou nio imowauti ri. Nimo ro idaibo tanaro atu moro ato namadimo-osioidiro-ri auna kamade anamadimo-owea-ri.

13 Godi ro ta-gohodowa nio edi mabira ro, nou edi merebusere ro neio ro emeiriai-dumo kamade owera nio aboto. Nou se ie.