1 Ata dubu masiro Ananaia nou orobo mutu Sapaira neitiro goto kere iato gaiwai-rido mani na, iedi goto kere ro na-giwomidai-marimo 2 neitiro ro mani sapuwo aise gowatateai-rido neitiro ro iwapotai pua. Ananaia abato edi sapuwo mani ro na-geremeserai nou ro aise gowou kitiodorai urubia aboto, iato gimowapotai ibo, ‘Mani goto kere sapuwo to momuo se noti nowou-die nio aboto.’ Neitiro piro se ta-geremowapotai-rido ibo sapuwo mani owatateai ri neitiro simara sapuwo to.

3 Taie Pita ro ibo Ananaia aboto, ‘Mabu boira oro ro Satani ubi tanaro na-osioidiro? Mabu boira oro ro karasaubuti owera na-waro Tarena Urio aboto? 4 Iedi goto kere ro oro ro na-gapoi urubia ro na-gowomidai-dumo, io iedi goto kere ro oro do ie, ina oro ro na-waiwai mani na iedi mani ro oro ro modobo ie simara ubi ato koworohuti. Oro ro idaibo sosoro tanaro etou mabu ato osioidiro, a? Oro ro urubia isaubuti pua, Godi asaubuti oro ro.’

5-6 Ananaia ro edi owera ro na-girorowai nou iato pamo aise garaweuti imese gorobu goto ato. Taie amia domere iato godoro-rimo nou pamo durupi obotama to na-goupiriamuti-rimo iato gowosuruwo-rimo imese gedea-rimo bobo to. Taie urubia umoro na-goi-rimo ibo Ananaia pamo ie neio auna tere aise goi-rimo.

7 Adimo sapuwo to nou orobo Sapaira na-gorowateai-ro nu umoro oi pua ibo etou tanaro ro ororosioidiro nou uramu aboto. 8 Pita ro nu nato gemodowa ibo, ‘Ei Sapaira mo ma-demowapotai-ro morobise owera, nedi mani ro nou se ra goto kere neito a-giwomidai-madumo?’

Ina Sapaira ro ibo, ‘Io mani nou se ie nou nimia-madumo.’

9 Taie Pita ro ibo, ‘Nitiro ro etou mabu ato owaibia-do Abera Naramu edi Tarena Urio ro? Oro uramu edi urubia ro pamo durupi na-emoba-dumo abora torowotoi-die magere damo ato, oro pamo neido neio ro amadimo-owosuruwo-ri. Oro bobo neio ro amadime-emasiai-ri uramu gomo ato.’

10 Sapaira ro iedi owera ro na-girorowai iato nou aise garaweuti Pita sairo mabu ato. Uramu beda urubia ro goumai-rimo pamo neio na-godoro-rimo nato Sapaira pamo se gowea-rimo na-gorobu, iato nou durupi neio ro obotama to koupiriamuti taie, imese gowosuruwo-rimo uramu gomo ato aise gedea-rimo. 11 Kimibiria urubia amia urubia mutu na-girorowai-rimo edi tanaro ro na-gororosioidiro-rimo neio imese auna tere ro girobai.

12 Kitiodorai urubia ro sirio awawo ia korosa tanaro aise gisioidiro-rimo, urubia umoro kiwaititi aboto ibo neio ro edi owera ro na-gimowauti-rimo Iesu sapuwo to io morobise ie. Kimibiria urubia sirio Soromoni edi Tarena Moto tamu ro nou maumo ato iato iradabutiti-mo. 13 Arua urubia neio meamea owera iarotiti-mo ibose neio kamade ro iwatititi kimibiria urubia sapuwo to, kaupoti neio mutu iradabutiti pua mabu neio tere ro iwatititi. 14 Idaibo tanaro iedi urubia ro gisioidiro-rimo, ina upi dubu sirio se kimibiria urubia to aise gararapoi-rimo, imese sirio ta-goi-rimo. 15 Temeteme urubia namuturubi ro aise wiworohotiti-mo gabo bara to arua keta to iwotodotiti-mo, arua patapata mutu iworohotiti-mo. Pita abato edi pupuwo korosa ro auna ia se gowamo, nou gabo ato na-irohotiti nou edi durupi duwoduwo ro modobo ie temeteme urubia meana kiwaititi. Taie neio nou ri iworohotiti-mo edi temeteme urubia ro gabo bara to. 16 Ina edio temeteme urubia sirio ro namuturubi ro muso moro rido aise giworoho-rimo. Amia urubia Ierusarema sabowa gomo ato beda sabowa ro irobutiti temeteme urubia ioudo aise giworoho-rimo, ibose arua urubia ubauba urio ro na-giworohuti-rimo neio sirio se Godi ro meana aise giwaititi.

17 Godi ra urubia ra turituri auna dubu, nou borubi Sadusi urubia mutu, neio auna masawe goi-rimo edi kitiodorai urubia ro neio aboto. 18 Taie neio ro kitiodorai urubia na-girobai-rimo dibura to aise giedea-rimo. 19 Neio dibura moto ato na-gorowomidiro Godi edi sowake urio ro duwo ato nato gou-ro neio aboto, taie nou ro dibura moto magere iato gimodobura neio ioudo aise giwosuruwo-ro. 20 Sowake urio ro ibo, ‘Nio abora ito dou-mo Tarena Moto to, urubia sirio iato auna se ba-dimowauti-mo nedi orio komidiro keremiro ro nou sapuwo to.’

21 Neio ro edi owera ro na-girorowai-rimo sowake urio aboudo neio iato imese gemibiria Tarena Moto to, kowaroho duwoduwo ato neio ro urubia kimowauti nato gatamuai-rimo.

Ina iedi tau ro nato Godi ra urubia ra turituri auna dubu nou namuturubi mutu neio ro arua koto kiauri urubia iato girumai-rimo ibo neio mutu aradabuai ri. Taie neio keremowagomea na-gatamuai-rimo, arua woko urubia iato gitiodorai-rimo dibura moto to, kitiodorai urubia neio ro iwameai ri koto aboto. 22 Neio irobai ri na-gou-rimo dibura moto to kitiodorai urubia nato iwia pua, egea se giosora-rimo, taie aise gorowameai-rimo Iu awawo urubia aboto. Neio ro ibo gimowauti-rimo, 23 ‘Dibura moto magere kopai ie, kemakoko ie, edi urubia ro emotoi-dumo dibura moto, neio torowotoi magere gomo ato, kaupoti magere na-nodobura-dumo dibura moto goro ato ata dubu ata owea pua nimo ro!’

24 Tarena Moto kemotoi auna dubu, Godi ra urubia ra turituri awawo urubia mutu neio ro na-girorowai-rimo, neio kimaragoidiro ro giopia. Neio ro ibo, ‘Ai nedi tanaro ro na-wororosioidiro womu to beda sosoro to ama-ereredea-ri?’

25 Taie ata dubu na-godoro-ro neio wisana a-geremowagomea-rimo. Nou ro ibo, ‘Neito ma-dirorowai-rimo owera. Dutu adimo odio urubia ro dibura to nio ro na-giedea-dumo, neio ina abora Tarena Moto ato urubia titamudiro-dumo.’

26 Tarena Moto kemotoi auna dubu nu arua woko urubia mutu neibi iato gorowarario-birimo Tarena Moto to, pua ie kitiodorai urubia nato a-gorowotoi, urubia mea owera kimowauti moro ato giwiai-ibirimo. Taie edi kitiodorai urubia ro neibi ro aise giwameai-ibirimo. Woko urubia tere ro giwati-bi mabu neibi nadi to kibo-ibi rie sabowa urubia ro, ina noudo ie neibi ro ipi gabo ato ata ubauba tanaro ata osioidiro pua kitiodorai urubia aboto. 27 Taie woko urubia ro kitiodorai urubia na-giwou-birimo koto kiauri urubia sosoro gabo ato iato giwotobowa-ibirimo, taie iato Godi ra urubia ra turituri auna dubu nou ro neio iato gimodoruti. 28 Nou ro ibo, ‘Nio nimo ro keba se koko owera ta-nimowapotai-rimo ibo modobo pua nio ro nedi dubu ro Iesu nou sapuwo to urubia kitamudiro. Kaupoti nio ro abora ma-diauri-mo Ierusarema sabowa gebari ato etou tanaro ro gororosioidiro-dumo, Iesu sapuwo to owera imese ta-gorobodorouti boroboro ia se oworohuti-dumo. Iesu pamo na-gowea nio ro nou mabu ato a-emowamedei-dioumo ra nimo aboto?’

29 Pita arua kitiodorai urubia mutu neio ro awawo urubia ibo gimowameai-rimo, ‘Nimo ro modobo ie Godi owera se kibodoro, arua urubia owera ibodoro-ri pua. 30 Iesu nio ro gopia-rimo, ota kemowotowa ato nio ro gowioro-rimo nu ioudo gororidiro-ro. Kaupoti nimo Iu urubia abeamio nasaio ro edi na emowabutiti-mo nou ro gowameai-ro nedi dubu ro pamo rido, 31 ina nu tumodi sapuwo ato Godi ro ta-gowomi gabamani to nou gapoi, ibose nu nimo kiapopo dubu e. Godi ro nou mabu ato gosioidiro imese Iu urubia neio erewesegerai ri, neio ubauba nato imatopeamuti rie. 32 Nimo ro simara idomari to ta-niauri-rimo nedi tanaro ro na-gororosioidiro-rimo. Tarena Urio ro ibose ta-giwapotaidiro-ro etou tanaro ro gororosioidiro-rimo. Etio ro isioidiro-dumo Godi ubi tanaro Tarena Urio nou ro neio aboto se gemeiriai-ro.’

33 Koto kiauri urubia ro owera na-girorowai-rimo neio serawo mutu ta-giroruho-rimo kitiodorai urubia aboto. Neio ubi a-giamo kitiodorai urubia iopiauti ri 34 kaupoti ata Parasi dubu masiro Gamariere owera mutu nedi topira maumo ro neido aise geribua-ro. Nedi dubu ro nou ata Mose sabi kitamudiro dubu e, urubia auna ubi ie nou owera kirowidiro aboto. Taie nou ro edi kitiodorai urubia ro egea mere se iato gimeiriai-bi osuruwo ri.

35 Taie nu iato aise gerewesegerai borubi koto kiauri urubia aboto nou ro ibo, ‘Isiraere urubia, nimo etou tanaro nisioidiro-dumo modobo ie tanaro kimaragoidiro mutu kisioidiro nedi urubia ro neio aboto. 36 Nio ro a-imaragoidiro-dumo ra keba se Teuda abato etou tanaro ro gororosioidiro? Nou ro ibo garo, “Mo auna dubu e.” Taie nou ro urubia sirio iato gidabuti-ro 400 dubu nou aboto neio ro garadabuti-rimo. Kaupoti nou Roma boso urubia ro aise gopia-rimo. Nou aboto edi urubia ro garadabuti-rimo neio erere moro to aise gorowadaudiro, neio ro modobo pua ata tanaro ata kosioidiro. 37 Ina nou saro gabo ato atu sosoro tanaro ibose to gororosioidiro ata dubu masiro Iudasi nou Gariri duriomoro rido gou-ro. Iedi tau ro nato neio masiro iaremuti ri goroho-rimo simara sabowa to. Nedi dubu ro nou ro ibose urubia sirio ta-gidabuti, urubia nou ro gimudo Roma boso urubia iaipirio ri, ina nou aboto atu sosoro tanaro ibose to gororosioidiro, Roma boso urubia ro nou aise gopia-rimo. Ina Iudasi ro edi urubia ro gidabuti neio ibose to gorowadaudiro tere ri erere moro to.

38 Abora nio mo ro nou ri nimowapotai umoro owera, nedi urubia ro dimeserai-mo daragareawado-mo neio aboudo, nakara se moroho-mo, etou tanaro isioidiro-dumo misioidiro-mo. Neio ro edi tanaro ro na-isioidiro-dumo urubia aboudo kou ato io owamo-ri pua, karaseperai ie. 39 Ina Godi aboudo kou ato nio ro modobo pua kodiobo nedi tanaro ro. Etu umoro ra nimo ro idaibo tanaro kisioidiro ato nimo ro idaibo Godi gabo kowasiai ie.’

40 Koto kiauri urubia ro Gamariere edi owera ro na-garo neio ubi aise goi-rimo. Taie neio ro kitiodorai urubia iato giramairiai-rimo orowameai ri koto aboto. Neio na-godoro-rimo taie iato gimowapotai-rimo woko urubia ro iado ri, ‘Nio dou-mo nedi kitiodorai urubia ro kerei to ba-diado-mo!’

Taie neio aise giriribua-rimo kitiodorai urubia iato giado-rimo kerei to.

Koto kiauri urubia ro kitiodorai urubia iato gimowapotai-rimo, ‘Abora nedi tau ro noudo Iesu sapuwo to nio ro urubia imowauti ate!’ Taie neio ro nedi kitiodorai urubia ro ioudo aise gitiodorai-rimo osuruwo ri.

41 Taie iedi kitiodorai urubia ro ioudo auna ia kamade mutu gosuruwo-rimo, mabu neio Godi ro modobo ta-giwaititi siripo tanaro neio aboto ororosioidiro ri Iesu masiro kowoubua aboto. 42 Edi kitamudiro tanaro ro neio ro idiobuti pua aise gitamudiro-rimo, sirio saiki imese aise irohotiti-mo Tarena Moto to, ibose erere moto to, urubia Iesu sapuwo to iato imowautiti-mo. Neio ro inaina aise imogutiti-mo mea owera korowauti Iesu sapuwo to. Neio ro ibo imowautiti-mo, ‘Godi ro kohodowa dubu to na-gapoi-ro Iesu kaupoti nou se ie.’