1 Pauro sairo to aise gidiai-ro sabowa gabogabo goroho, ina ioudo godori-ro womu tato Epesesi sabowa to ti-gorowateai. Aporosi isana Korini sabowa ato gomidiro. Kowasoro urubia Epesesi sabowa ato Pauro ro nato giwia. 2 Neio nou ro iato gimodowa, ‘Nio na-gimibiria-rimo mea owera, Tarena Urio nio aboto nato a-gateai ra?’

Neio ro ibo, ‘Ee nimo ata umoro tato ie Tarena Urio, nou sapuwo to nimo ro owera ata irorowai pua.’

3 Neio Pauro ro ina iato gimodowa, ‘Nio obo to beda mabu ato giwarumiauti?’

Ina nu neio ro ibo gemowameai-rimo, ‘Mabu nimo ro Ioane kitamudiro owera nibodoro-dumo.’

4 Ina Pauro ro ibo, ‘Urubia morobise to ubauba aboudo na-erewesegeretiti-mo Ioane ro neio obo to nou mabu ato iwarumiautiti. Ina ibose Ioane ro ta-imowautiti morobise to imibiria ri, ata dubu sapuwo to etu ro amadi-ou-ri nou saro rido. Nedi dubu ro nou sapuwo to na-iarotiti Iesu nou se ie.’

5 Taie neio ro edi tau ato na-girorowai-rimo nedi owera ro, Pauro bi ro neio obo to aise giwarumiauti-birimo, Abera Naramu Iesu nou urubia to orowomidiro rie. 6 Pauro tu neio eputa to na-gitomo Tarena Urio aise gateai-ro neio aboto, neio ro umoro tato owera to neito aise garo-rimo, ibose Godi ipusu owera to gimowauti-rimo. 7 Nedi soirio ro nato neio 12 urubia ie, iedi tanaro ro neio aboto gororosioidiro-rimo.

8 Pauro Iu urubia karadabu moto to na-irohotiti nou ro urubia tere tato itomutiti, netewa didi sogomi peteibi ta-giporeai-bi. Ibose nou Iu urubia mutu na-irimowotoititi neio nou ro omuomu se imagegetiti Godi edi kiwaboi tanaro ro nou sapuwo to. 9 Kaupoti arua Iu urubia koko ie, neio ubi tato ie kimibiria aboto. Urubia sosoro gabo ato neio ro ubauba owera ta-garo-rimo Iesu kowasoro gabo sapuwo to. Ina Pauro ro neio nou ri gimeserai, kimibiria urubia se girobai-ro imese giwou ata dubu sikuru moto to, nou masiro Tairanasi. Pauro ro saiki gabogabo edi urubia ro nou ro ibo itamudirotiti, 10 womu tato netewa teibo kisimisi teibo ti-giporeai-ma. Ina noudo ie beda mutu Iu urubia ro gorowomidiro Eisia duriomoro ato, arua urubia mutu, Abera Naramu edi owera ro neio ro aise girowidiro-rimo.

11 Awawo ia pupuwo korosa tanaro Godi ro Pauro aboto giaiwai-ro isioidiro ri. 12 Idaibo Pauro edi eputa sakake ro, ina nu edi ohu sedo ro, urubia ro temeteme urubia aboto iato giworoho-rimo. Neio ro edi tanaro ro na-gisioidiro-rimo temeteme neio aboudo aise goroporeawado-rimo, ibose ubauba urio edi urubia abato gorowomidiro neio aboudo aise garagarewado-rimo.

13 Kaupoti arua Iu urubia sabowa gabogabo na-irohotiti-mo neio ro ata sosoro tanaro nato gatamuai-rimo. Abera Naramu Iesu edi masiro ro nou asorotiti-mo ubauba urio urubia aboudo neito imabodoidiro ri. Neio ro ibo kutura ie, ‘Oro beda ubauba urio ro omidiro iato, Pauro edi dubu owautititi Iesu, nou masiro nasoro-dumo oro ioudo dosuruwo-ro!’

14 Ina Sekeba 7 dubu mere iworohutititi, nu Godi ra urubia ra turituri auna dubu e, neio ro idaibo tanaro gisioidiro-rimo. 15 Kaupoti ata tau ato ubauba urio ro neibi aboto ibo gutura-ro, ‘Mo umoro ie Iesu, mo umoro ie Pauro, ina nibi otu bi ra?’

16 Ubauba urio edi dubu abato na-gomidiro neibi aboto aise gererepeduai-ro. Nou auna ia pupuwo mutu e, neibi ro kemowameai modobo pua. Neibi moto goro rido perepere se gorowosuwoduti-birimo porose se karima patupatu gorowararioidiro-birimo.

17 Iu urubia, Iu owera karo tato urubia iato na-gorowomidiro Epesesi sabowa ato, edi tanaro ro na-gororosioidiro nou sapuwo to na-girorowai-rimo, neio auna tere ro girobai. Ina Abera Naramu Iesu neio ro nou masiro ohu ato goworohuti-rimo. 18 Ibose orio kimibiria urubia ro beda ubauba tanaro isioidirotiti-mo, iato giwapotaidiro-rimo urubia sosoro gabo ato. 19 Neio arua pakani urubia ie, arua giwari urubia ie iato na-gorowomidiro. Neio pakani giwari buka tako sirio iato giwosuwoduti-rimo, urubia sosoro gabo ato era to aise gimatowouti-rimo. Iedi buka tako sirio ro neio wisa owamo ibo K250,000. 20 Iedi pupuwo korosa tanaro sirio ro iato gororosioidiro-rimo, ina noudo ie mea owera Abera Naramu sapuwo to iedi duriomoro ro nato aise gorobodorouti, ina urubia sirio ro aise gimibiria-rimo.

21 Iedi tanaro ro kororosioidiro na-gororoporeai-rimo Pauro kimaragoidiro nato giwia Masedonia duriomoro to abu ri ina ioudo apere rie Akaia duriomoro to, ina nato orowameai rie Ierusarema sabowa to.

Ina nou ro ibo, ‘Mo Ierusarema sabowa to nama-ou-ri, mo ro modobo ie Roma sabowa gebari ioudo karaturiomai.’

22 Nu edi dubu teibo mutu goroho Timoti ra Erasita ra, neitiro nou ro keba moro to gitiodorai-ma Masedonia duriomoro to. Kaupoti nou ia Eisia duriomoro ato egea mere se iato gomidiro.

23 Iedi tau ro nato Iesu kowasoro gabo sapuwo to, ata auna ubauba tanaro iato gororosioidiro Epesesi sabowa ato. 24 Ata dubu masiro Demetiri namabu nou ro siriba to isioidirotiti urubia ro mani to imade ri. Nou ro siriba rido Atemasi tarena moto kainakaina nou isioidirotiti. Urubia sirio ibo gimaragoidiro-rimo, Atemasi orobo orora ie, nou tarena moto gebari iato itoititi Epesesi sabowa ato. Demetiri edi urubia mutu isioidirotiti atu sosoro woko, neio ro auna mani neito iaurititi-mo. 25 Ata tau nedi dubu ro neio nou ro iato gidabuai arua siware woko urubia mutu. Demetiri ro ibo neio aboto, ‘Mo woko borubi, nio ro tiauri-dumo nimo ro edi besinisi ro na-nisioidiro-dumo auna mani ioudo nimadetiti-dumo. 26 Kaupoti nedi dubu ro Pauro edi tanaro ro na-isioidiro, sirio urubia nou ro itowouti-die nou sapuwo to, nou owera irowidiro-dumo. Sirio urubia Epesesi sabowa ato na-orowomidiro ibose Eisia duriomoro gebari ato na-orowomidiro nou ro itowouti-die nimo edi orobo orora ro nou kemowaibiti aboudo. Urubia nou ro ibo imowautiti “Urubia ro tu to edi asaso na-isioidirotiti-dumo ina orora to na-iasorotiti-dumo io neio bagea orora ie.”

27 Nedi owera ro urubia nouto na-imowautiti auna ubauba nato towamo, nimo edi woko ro ubauba masiro ama-imidiai-ri. Atemasi orobo orora nou edi masiro ro auna ia ie, sirio urubia Eisia duriomoro ato na-orowomidiro ina imese duriomoro gebari nou emowaibititi-dumo. Ina ibose Pauro owera ato ata ubauba towamo, urubia ro ibo amadimi-imaragoidiro-ri orobo orora Atemasi nou pupuwo tato orora ie, edi tarena moto gebari ro saruto ama-oi-ri, nou edi auna masiro ro imese ama-aratowouti-ri.’

28 Iedi woko urubia sirio ro Demetiri owera na-girowidiro-rimo neio serawo aise goi-rimo, neio ro iato kiaeauti gatamuai-rimo, ‘Atemasi nimo orobo orora ie! Nu auna ia ie! Nu gebari pere ie!’

29 Urubia sirio daradara goi-rimo, iato neio ro Gaiasi ra Arisitaka ra neitiro se girobai-marimo, neitiro Masedonia dubu teibo ie Pauro mutu wirohotiti-do. Neitiro urubia edi karadabu moro ro neito hio to giwou-marimo. 30 Pauro ubi a-gowamo edi karadabu moro ro neito ou ri, urubia owera iato imowauti rie. Kaupoti nou kimibiria urubia ro a-godiobuti-rimo, neio ubi tato ie nou ito kou. 31 Ibose nou arua namuturubi, neio awawo urubia ie nedi duriomoro ro nato, neio ro nou aboto owera se gemeiriai-rimo ibo, ‘Pauro, oro ito ou ate!’

32 Nedi topira ro nou maumo ato arua urubia ro ata owera garo-rimo, ina arua ro ata sosoro owera garo-rimo. Iedi karadabuai ro nato urubia imese daradara ta-goi-rimo, urubia sirio mea se umoro oi pua etou mabu ato garadabuti-rimo ito. 33 Iu urubia ro iato gohodowa-rimo ata dubu masiro Arekasanida keba moro ato otoi ri, owera mea se imabuti ri. Ina nu arua urubia ro iato gemowauti-rimo karo owera. Arekasanida ro urubia iato gimadohodai owera eremasiai ri. Nou ubi ie owera aro ri urubia aboto, mea se owawea ri tanaro beda sosoro ororosioidiro-dumo. 34 Kaupoti neio ro na-gowea-rimo ibo Arekasanida Iu dubu e, nou Atemasi emowaibititi pua, neio ro atu sosoro owera inaina aise giaeauti-rimo tuturu tau to, ‘Atemasi nimo orobo orora ie! Nu auna ia ie! Nu gebari pere ie!’

35 Taie, iedi topira ro neido kanisere auna woko dubu ro geribuwa owera mutu, urubia nou ro aise gimadohodai owera eremasiai ri. Nou ro ibo, ‘Epesesi urubia! Urubia sirio umoro ie, orobo orora Atemasi nu edi tarena moto ro nimo ro niauri-dumo. Ina ibose edi nadi ro nou asaso ie Adiri sabowa rido na-geretei-ro, urubia sirio umoro ie nu nimo ro niaurititi-dumo. 36 Ata dubu ata ro modobo pua ibo karo nedi owera ro morobise pua, arasaubuti. Ina noudo ie nio muro se ba-dorowomidiro. Tanaro kisioidiro maumo ato keba se mea se gi-imaragoidiro-ri, ido to gi-isioidiro-ri. 37 Nedi dubu teibo ro nio ro karadabu moro to na-iwou-madioumo, kaupoti neitiro ro ata ubauba owera ata aro pua nimo orora sapuwo to. Neitiro ro ata namabu ata omidai pua piro to, orobo orora edi tarena moto ro neido.

38 Demetiri nou atu woko urubia mutu neio abato ata mibo na-owamo arua urubia mutu, modobo ie nedi urubia ro neio ro koto aboto se kiwou. Ina neio koto ro simara se ama-iworohuti-ri. 39 Ata owera ata na-owamo nio abato, modobo ie nio ro morobise sabi maumo ato kisioidiro. 40 Nio aboto mo ro nou mabu ato nutura, abora nimo ubauba se na-naradabuai-dumo, etu umoro ra nimo ro ubauba wisa anamadimo-owea-ri gabamani aboudo. Mabu nio ro ata mabu tato osioidiro-dumo nedi ubauba karadabuai ro, owera mabu mea se kemabuti modobo pua.’

41 Kanisere auna woko dubu owera karo na-goporeai, urubia nou ro aise gimowapotai simara moto to orowame ri.