1 Awawo urubia keremowagomea maumo ato neio ubi ta-goi-rimo Pauro dibura urubia mutu, Itari duriomoro to imeiriai ri, Roma sabowa gebari edi moro ato owamo. Ata boso dubu masiro Iuriasi, nu Sisa ia edi boso urubia ro nou ro emeaurititi 100 boso urubia. Ina Pauro arua dibura urubia mutu neio nou ro giauri. 2 Taie nimo atu se kiwadaudiro moro ato ata sawa pe Adorimitiamo sabowa rido na-gou-ro neito aise niora-rimo. Edi sawa pe ro ito abu rie arua sabowa na-iamo Eisia duriomoro ato neito ararairioidiro rie. Ina ata dubu Tesaronika sabowa dubu e Masedonia duriomoro ato na-owamo Arisitaka nou masiro ie, nu ibose ta-garadabuai-ro nimo mutu atu se niapere-rimo, 3 ina ata saiki ato norowateai-rimo Sidoni sabowa to. Ibose boso urubia kiauri dubu Iuriasi Pauro aboto nou ro meamea tanaro gisioidiro, gabo aise gemodobura Pauro namuturubi iraturio ri, neio ro nu mea mino to gowarebai-rimo.

4 Taie ata saiki Sidoni sabowa na-nemeserai-rimo imese niabu-rimo Saiporasi ura ro niwasiai, mabu gawia ubauba sapuwo rido gihuduti-ro. 5 Sirisia ra Pampiria ra duriomoro teibo se niwia-marimo, edi sawa pe ro na-gou-ro womu tato nimo ti-norowateai-rimo Mira sabowa to, Risia duriomoro ato owamo. 6 Edi sabowa ro iato ata sawa pe Arekesanidara sabowa rido gorowameai-ro ioudo abu ri Itari duriomoro to.

Nimo imese sirio se boso urubia kiauri dubu ro edi sawa pe ro neito aise niwasaudai. 7 Taie ioudo nasiriai-rimo sirio saiki ro gararahudirio-rimo umodi to na-niaubu-rimo. Modobo pua, nimo ro imese koko ia tau nowea-rimo womu tato Kinidasi sabowa to ti-norowateai-rimo. Mabu nimo sawa pe surama ro huru to aise gowioduti-ro, ina noudo ie modobo pua ito aise kou aboto. Taie ina ioudo aise niabu-rimo ata sapuwo to, ata ura towadaudiro masiro Kiriti, nou ro niwasiai. Saramoni ura kainai bato owadaudiro, edi turi ro neido keresia koko ia ie. 8 Ina ioudo na-nasiriai-rimo a-nou-rimo womu tato Mea Ibi sabowa ti-norobai-rimo Rasea sabowa gomo ato na-owamo. 9 Nimo ro mea tau ta-naraseperai-rimo sawa pe to koroho, mabu auna tau ta-noporeai-rimo ipi ato.

Taie neio Pauro ro umoro owera nato gimia, 10 ‘Urubia, nato morodiobo-rimo, nedi tau ro nato kaimai ato nedi sawa pe ro namabu, urubia mutu amadima-araraseperai-ri.’

11 Kaupoti sawa pe edi dubu ro na-giauri ina sawa pe abera ia neitiro ubi tato goi-rido, edi owera ro Pauro ro na-garo. Boso urubia kiauri dubu ro neitiro edi owera ro nou ro ubi to aise gomidai. 12 Neio sirio se ibo gimaragoidiro-rimo, sawa pe edi moro ato na-gowadaudiro mea moro pua kowadaudiro aboto kukamo tau ato. Modobo pua nato korobuti, ata mea moro to kaimai modobo ie. Taie neio ro ibo, ‘Nedi sawa pe ro kowatupia modobo ie Ponikisi sabowa to, kukamo tau iato kemasebidiro modobo ie.’

Ponikisi sabowa Kiriti ura ibi ato na-owamo gawia ra surama ra aboudo sawa pe ito iwopirotiti-dumo.

13 Sawa pe woko urubia ro na-gowea-rimo gawia kainai na-gihudurai-ro, neio ro ibo, ‘Nou modobo gawia ro ihudurai-die nimo idaibo tau ato masiriai-rimo, modobo ato namadimi-iapere-ri Ponikisi sabowa to.’

Taie woko urubia ro aga na-giwioro-rimo sawa kimobodorouti ioudo imese nasiriai-rimo. Iedi sawa pe ro Kiriti ura gomo ato gapere-ro. 14 Kaupoti tuturu to pua auna ia surama bubu nato giwomi-ro Kiriti ura sapuwo rido. 15 Iedi sawa pe ro ito kereisia modobo pua, surama ro ioudo aise gowioduti-ro. Nimo ro edi sawa pe ro aise noupiriai-rimo mabu surama kameai modobo pua, surama ro se nihuduti-ro 16-17 womu tato Kauda ura ti-norohodorai-rimo.

Nimo dinigi aupise gowamo bukopu ro keherai, auna koko tau nowea-rimo kowioro aboto. Ina woko urubia ro hodo to na-gemotohiti-rimo koko ti-gemowaititi-rimo. Taie sawa pe awawo hodo to iato gemotohiti-rimo, sapuwo bara rido sapuwo bara to imese koko kemowaititi sapuwo to. Neio nou tere ro giwati nedi sawa pe ro modobo pua Siritisi koriri to kotomuti iato bukopu ro kepeputi. Ina nou mabu ato ie neio ro sawa aise giwororuwoidiro-rimo, iedi sawa pe ro surama ro se gohuduti-ro.

18 Ina ata saiki ato surama auna ia se gaduduro-ro imese kainai se ihuduti pua. Sawa pe ato beda nakomu ro giamo pe woko urubia ro aise gihere-rimo obo to. 19 Ina ata saiki ato sawa pe woko namabu sirio, tu gabogabo aise geremerebai-rimo ina ibose to gihere-rimo obo to. 20 Nimo ro na-niaurititi-mo ibo saiki mea se idiawadotiti pua ibose kiboni toboro ato irowotoititi pua mabu buru oromo surama ro imese ubauba ia ta-gowai. Nimo a-nimaragoidirotiti-mo ibo nimo keremiro anamadimi-iaseperai-ri.

21 Nimo edi sawa pe ro nato tuturu tau to nirowomidiro kiho tato. Taie Pauro aise gotobowa neio turituri ato nou ro ibo, ‘Nio aboto mo ro keba se owera ta-naro ibo modobo pua nimo neido kaimai. Nio ro mo owera kirorowai rasiri ie nedi ubauba ro nimo ro owea-ri pua. 22 Kaupoti nio mo ro a-nimowapotai modobo ie koko se korowotoi, ina nio ata pamo owea-ri pua kaupoti nakomu, nimo ro nedi sawa pe ro nou se anamadima-aseperai-ri. 23 Mo ro Godi sowake nemoworohutititi, mo nou do ie. Nedi duwo ro nato mo hiwo na-norobu Godi sowake urio mo aboto ta-wou-ro. 24 Nou ro ibo, “Pauro oro tere na ie, oro ama-orowateai-ri Sisa aboto, ibose oro nou ro koto owera gare ama-emedea-ri. Godi ro ta-giapoi-ro nedi urubia ro oro aboto neio keremiro araraseperai-ri pua.”

25 Ina noudo ie nio modobo pua tere ro na-iwati, nio modobo ie koko se korowotoi. Mo Godi owera ti-nimibiria beda tanaro namadimo-ororosioidiro-ri io sowake urio owera gabo modobo ato amadimo-ororosioidiro-ri. 26 Kaupoti sawa pe ata ura to bukopu ro amadimo-owidiai-ri, taie iato aise amadime-eteamuti-ri.’

27 Nimo 14 duwo ro na-nirobai surama ro Meditereni buru oromo ato niworohuti. Sawa pe woko urubia a-gimaragoidiro-rimo duwo turi ato ibo etu umoro ra nimo sopu to aupise ie korowateai. 28 Taie neio redi hodo nou ri gehere-rimo obo mako na-godoburio-rimo, keba se na-geherai-rimo obo mako a-gowamo ibo 40 mita nou gowea-rimo. Ina iato na-geherai-rimo obo mako ta-gororumaidiro-ro 30 mita to. 29 Taie neio iato tere ro girobai mabu modobo pua sawa pe nadi ato kodoromuti. Taie neio aise gorowadoro-rimo netewa netewa aga iato giheruti-rimo wapo rido, taie Godi neio ro iato gararatoro-rimo saiki hio ito kowaroho sapuwo to.

30 Ibose arua sawa pe woko urubia ubi a-giamo korowadau, neio ro dinigi iato imese gowororuwo-rimo obo to. Neio bagea to garo-rimo, ‘Nimo aga wamea rido anamadimi-imudidiro-ri.’ 31 Pauro ta-geremasibai ibo sawa pe woko urubia orowadau rie. Nou ro boso urubia kiauri dubu nato gemowapotai arua boso urubia mutu ibo, ‘Nedi urubia ro sawa pe ato korowomidiro tato nimo atu se keremiro anamadimi-iaseperai-ri.’

32 Ina boso urubia umoro na-goi-rimo taie neio iato gorowadoro-rimo, dinigi hodo aise gemasiouti-rimo, edi dinigi ro obo ro imese gowadau.

33 Taie saiki kowaroho aupiaupi Pauro ro neio nato gimadowerai auna owera to ibo, ‘Nedi 14 saiki ro na-gororoporeai-dumo nio korowomidiro kawa irowomidirotiti ohona iho tato, norou tato, aise irarowotiti-rimo. 34 Abora nio mo ro a-nimowapotai ohona diho-mo keremiro sapuwo to. Nio ata keremiro aseperai-ri pua, ata nakomu ata ro iari-ri pua.’

35 Taie Pauro beredi na-gomidai-ro eso owera iato garo Godi aboto neio sosoro gabo ato taie aise gouho. 36 Pauro neio ro na-gowea-rimo nou ro edi tanaro ro na-gosioidiro neio nou ro pupuwo gimowai. Neio iato simara ohona na-gimade-rimo imese giho-rimo. 37 Iedi sawa pe ro nato 276 urubia neio ro gorowomidiro. 38 Kiho na-goroporeai taie, neio ro ata woko iato gemeiriai-rimo sawa pe toutou kowai sapuwo to. Neio ro woiti baiko iato gipedu-rimo obo to sawa pe toutou neito gowai-rimo.

39 Taie iato tuturu to pua saiki bani na-giwotowa-ro sawa pe woko urubia neido na-girarowea-rimo neio ro duriomoro se gowea-rimo. Ina nedi duriomoro ro neio ro eibimai pua, kaupoti neio ro koriri se gowea-rimo ibi ato na-gowamo-ro. Neio ubi ibo giamo nedi sawa pe ro nedi koriri ro neito owidiai ri, 40 ina aga neio ro iaubo pua, hodo aise giasiouti-rimo aga imese giroruwoidiro. Iedi atu tau ro nato kemohotidiro aibi teibo edi hodo teibo ro gorobidiro-rido neio ro aise giasiai-marimo, taie wamea ato edi sawa ro gotoi nou se gemobodorai-rimo.

Iedi sawa pe ro surama ro neido na-gohuduti imese imese, 41 womu tato wamea koriri to ti-gotomai. Koriri ato iato aise girimuba modobo pua ioudo karaubai aboto. Kaupoti bukopu eputa neido na-giarioidiro-rimo iedi sawa pe ro wapo rido aise geteamuti.

42 Ina Roma boso urubia ubi ie dibura urubia iopiauti ri, mabu neio ubi tato ie dibura urubia korowadau. 43 Ina boso urubia kiauri dubu Iuriasi nou ubi tato ie Pauro kopia, Pauro arua dibura urubia mutu nou ro a-giwairiai idaibo mino to. Taie urubia nou ro nato gimowapotai, ‘Nio etio ra pepeduo umoro ramutu nio ba-dererepeduti-mo ba-diairioidiro-mo keba se koriri to. 44 Nio arua pe kanakere to ba-diairioidiro-mo.’

Io urubia sirio idaibo sosoro giairioidiro-rimo koriri to neio ata keremiro araseperai pua.