1-2 Godi beda sosoro muro to imidirotiti nio modobo ie idaibo muro to korowomidiro. Mabu nio nou merebusere ie, nirimagare nou ro auna se imatiti. Nio ro tanaro sirio na-isioidiro-dumo, iedi tanaro kisioidiro maumo ro nato, nio ro modobo ie urubia nirimagare kimati. Iesu Keriso ro nirimagare beda mino to giwawuti-ro nimo aboto, ibose nimo sapuwo to simara keremiro aise gadodorai pamo kowea aboto, io urubia nirimagare idaibo mino to ba-dimati-mo. Nou keremiro na-gaiwai nimo sapuwo to mea nibo dehoro sosoro ie Godi aboto aiwai rie. Idaibo Godi ra urubia ra turituri urubia ro sipisipi dawade na-imatowotiti-mo Godi aboto, io ibo ie.

3 Nio Godi urubia ie. Ina noudo ie piro tanaro isioidiro mamo, idaibo arua mamio dubu mutu oroho mamo, siripo tanaro isioidiro mamo. Ibose namabu sirio sogoi ro iwati mamo. Mabu Godi edi tarena urubia ro modobo ie idaibo tanaro kisioidiro tato korowomidiro. 4 Siripo mareamarea owera to eremowauti mamo, ubauba sete owera aro mamo. Owera karo tau ato kimaragoidiro tato owera to aro mamo. Mabu Godi urubia ro idaibo tanaro kisioidiro imese tuputupu tato ie. Modobo ie sirio tau eso owera kamade mutu aise gi-aro-ri Godi aboto.

5 Nio morobise to umoro ta-goi-rimo ibo upo tanaro kisioidiro urubia, siripo tanaro kisioidiro urubia, namabu sogoi urubia, neio modobo pua Keriso Godi mutu neitiro edi kiwaboi maumo ro neito kodoro. Namabu sogoi urubia neio idaibo sosoro ie orora kiroru.

6 Nio ata dubu ata ro modobo pua kisaubuti, iedi ubauba tanaro kisioidiro sapuwo to. Mabu Godi owera inaina etio ro ibeiouti-dumo, nedi ubauba tanaro sirio ro etio ro isioidiro-dumo, Godi serawo neio aboto tou-die neio ubauba wisa imio ri. 7 Ina noudo ie nedi ubauba tanaro ro etio ro isioidiro-dumo, neio aboto aise aradabu mamo. 8 Mabu nio keba se Godi edi morobise owera ro umoro mea se oititi pua, duwoduwo maumo ato ta-waratowoutiti-mo. Kaupoti nio abora Abera Naramu urubia ie, nou edi pina woroworo ro nou ato toroho-dumo. Ina noudo ie urubia Godi edi woroworo ro nato beda sosoro korowomidiro ra, nio idaibo sosoro ba-dirowomidiro. 9 Kimaragoidiro modobo ie ibo, urubia etio ra Godi edi woroworo ro nato na-oroho-dumo, neio mea se korowomidiro, idaibo meamea tanaro kisioidiro, tuputupu tanaro kisioidiro, morobise tanaro kisioidiro.

10 Umoro ba-doititi-mo Godi kamade beda tanaro to kowaititi ra. 11 Ubauba tanaro urubia ro duwoduwo maumo ato na-isioidiro-dumo, neio aboto aise aradabu mamo. Neio ro iedi dadudadu tanaro ro na-isioidiro-dumo, nio ro paeapaea ba-diwaititi-mo. 12 Iedi ubauba tanaro ro iedi kimibiria tato urubia ro piro se na-isioidiro-dumo, nio kimibiria urubia ro idaibo tanaro sapuwo to keremowauti ato, io nio siripo koi modobo ie. 13 Iedi ubauba tanaro sirio ro woroworo ro paeapaea kiwaititi ato, urubia umoro nato koi ie ibo ubauba tanaro ie. 14 Mabu imese tanaro sirio duwoduwo maumo rido kiwosuruwo ato, woroworo to neio paea se imese kiamo ie.

Ina noudo ie nimo kimibiria urubia ro, urubia etio ra keremasibawado tato ibo neio ubauba mutu e, neio sapuwo to nimo ro ohare kainai kiwati ie. ‘Nio norou na-irobu, direribua-rimo! Nio pamo na-irobu, dorowameai-rimo! Ina Keriso edi pina ro nio abato ama-imewia-ri.’

15 Ina noudo ie nio komidiro keremiro mea se deremododiai-mo. Muro tato urubia beda tanaro isioidirotiti-dumo, idaibo mino to orowomidiro mamo, muro urubia tanaro gi-isioidiro-ri. 16 Tau mea se gi-owaboi-ri meamea tanaro se gi-isioidiro-ri, mabu nedi saiki ro nato urubia ro awawo ubauba tanaro aise isioidiro-dumo. 17 Ina nedi mabu ro noudo ie karatai tanaro aise isioidiro mamo. Modobo ie Abera Naramu ubi tanaro nio ro umoro koi ina nou kisioidiro. 18 Koko obo auna se idio mamo, mabu arua urubia neio koko obo kidio ato neio ro siripo tanaro aise kisioidiro ie. Kaupoti sirio tau Godi edi Tarena Urio ro nio ro ba-demaidodorawado-mo nio nou ro kiworohuti aboto. 19 Borubi kimibiria urubia mutu Ohare Tarena Buka ato na-iamo edi owera ro neito gi-eremowagomea-ri. Ibose Godi kemowabu ohare, arua ohare Tarena Urio ro na-imiotiti-ro, nio neito gi-eremowagomea-ri. Arua ohare Abera Naramu nouto gi-emowabu-ri morobise giropu mutu. 20 Nio abato beda tanaro ro kororosioidiro ra nio keremiro maumo ato, eso owera nimo Abera Godi aboto aise gi-aro-ri, Abera Naramu Iesu Keriso edi pupuwo masiro ro nouto.

21 Nio komidiro maumo ato kimibiria urubia keba to gi-aremo-ri, nio marasio saro to kerewesiauti modobo ie, Keriso masiro auna kowaititi sapuwo to.

22 Upi simara uramio ubi tanaro keba to gi-aremo-ri, nio marasio saro to kerewesiauti modobo ie, nio ro Abera Naramu ubi tanaro keba to beda sosoro iaremotiti-dumo. 23-24 Mabu uramio nio eputa sosoro ie, nio neio ro iauri-dumo. Iesu Keriso nou simara urubia eputa ie, neio nou durupi ie. Mamio, Iesu Keriso edi urubia sirio ro nou ubi tanaro keba to beda sosoro iaremotiti-dumo, nio ro imese tanaro sapuwo to simara uramio ubi tanaro keba to ba-diaremo-mo. Kimibiria urubia nimo Iesu durupi ie, nimo ubauba aboudo kiapopo dubu Iesu nou se ie.

25 Uramio ina ata owera nio aboto ibo ie mo ro nou nama-imowapotai-ri, nio simara upi nirimagare ba-dimati-mo, idaibo Iesu Keriso ro simara urubia nirimagare beda sosoro imatiti. Neio sapuwo to simara keremiro orobidiro pua, aise gadodorai pamo kowea aboto, 26 neio tarena iwai ri. Keriso ro simara urubia Godi edi owera ro nouto marea tato ta-giwai, ibose obo to ta-giwiouti. 27 Keriso simara keremiro nou ri gadodorai nou pamo kowea aboto, nou edi urubia ro nou mea marete orobo to ararapoi ri, ina nou ia aboto owateai ri. Iedi marete orobo ro nou imese tarena ia ie, ata ubauba tato ie. 28 Ina idaibo sosoro ie nio simara upi nirimagare aise gi-imati-ri, simara durupi nirimagare beda sosoro eremati-dumo. Nio upi nirimagare na-imati-dumo, nio nirimagare nakara se ibo eremati-dumo. 29 Ata dubu simara durupi ubauba keremowai pua, nou ro mea mino to kemododiai ie, nou ro meamea ohona kiho ie, meamea obotama kiroiti ie. Idaibo sosoro ie Iesu Keriso ro nu simara urubia mea mino to iworohutititi. 30 Mabu nimo kimibiria urubia sirio, Keriso durupi atemo ie.

31 Owera kebase Tarena Buka ato ta-gisioidiro-rimo ibo, Urubia dubu nu simara mamu ra abera ra kimeserai-ma ie orobo kedea ato, neitiro kaupoti to kararapoi ie. 32 Nedi tanaro maumo ro Godi ro urubia aboto kebase owapotai pua, piro se ta-owamotiti. Kaupoti nedi owera maumo ro mo ro a-nowapotai Keriso sapuwo to na-owamotiti, nou urubia mutu. 33 Owera koporeai aboto, uramio, nio simara upi nirimagare aise gi-imati-ri, nio simara durupi nirimagare beda sosoro erematiti-dumo. Ibose upi, nio simara uramio owera aise gi-irowidiro-ri.