1 Mo Pauro ie mo Iesu ro kotiodorai dubu e, ina ibose mo abera Godi ro kotiodorai dubu e. Mo urubia ro aubai pua ina urubia ro emeiriai pua nou kotiodorai dubu to ararasoro ri. Keriso Godi ro ta-gowoubua-ro pamo rido, ina mo Iesu Keriso ro narapoi-ro nou woko emesioidiro ri. Nedi peba titi ro mo aboudo ie 2 ibose mo abato edi kimibiria naminiramio ro na-orowomidiro neio mutu e. Nimo ro nisioidiro-dumo nedi peba owera ro nio kimibiria urubia aboto erere sabowa ato na-orowomidiro Gereisia duriomoro ato.

3-4 Abera Naramu Iesu Keriso na-garaburai Abera Godi ubi ato simara keremiro aise gadodorai, nimo duriomoro ubauba tanaro sirio aboudo nou ro iapopo rie. Modobo ie nio neitiro ro wisa tato kiwarebai, ina ibose miro neitiro aboudo aise kowamo nio abato. 5 Abera nimo ro memowabutiti-rimo womu tato womu tato. Ibose ba-mororosioidiro-mo.

6 Mo auna ia kimaragoidiro ro nopia mabu nio mo ro dese to nimeserai ina Godi nio ro nato gebedidiro-dumo. Nio nou ro girapoi-ro mabu Iesu nou ro na-gemeiriai-ro wisa tato kiwarebai nato gowapotai-ro nio aboto, ina nio ro nedi tau ro nato ata sosoro kitamudiro nou aboto gerewesegerai-dumo. 7 Kaupoti mea owera Iesu sapuwo to nou se ie, ata tato ie. Ina nio arua urubia ro iadoruti-dumo nedi mea owera ro neio ubi ata sosoro to kemowawo.

8 Nio ro keba se mea owera ta-gimibiria-rimo neibi ro na-nimowauti-birimo. Kaupoti mo ro ata sosoro owera to kimowauti rasiri ie, mo Godi aboudo ba-naraseperai. Ina ibose sowake urio Adiri sabowa rido nou ro ata sosoro owera to kimowauti rasiri ie, nou Godi aboudo ba-garaseperai. 9 Keba se neibi ro umoro owera nio aboto ta-norowauti-birimo ina abora a-nowameai-bimo peba ato kisioidiro nedi atu owera ro. Umoro owera ibo ie, neibi ro beda owera nitamudiro-birimo keba se, ata dubu ata ro mea owera Iesu sapuwo to ata sosoro to nama-itamudiro-ri, nedi dubu ro modobo ie Godi sosoro gabo rido imese moro to karaseperai ie.

10 Mo ro urubia kamade kiwaititi rasiri ie, mo Keriso edi sowake dubu ro neito ararasoro-ri pua. Mo ibo pua urubia kamade kiwaititi aboto, mo ubi ie Godi kamade kowaititi.

11 Kimibiria niramio nio na-orowomidiro iato, mo ubi ie nio umoro kiwai ibo, mo ro nedi mea owera ro na-nimowauti Iesu sapuwo to, mo ata dubu ata ro emowauti pua nou simara kimaragoidiro owera. 12 Ina ibose duriomoro urubia na-orowomidiro neio ata aboudo imidai pua, idaro neio ata ro atamudiro pua. Nedi mea owera ro Iesu Keriso ia ro nemowauti-ro.

13 Nio umoro ie mo ro beda tanaro nisioidirotiti keba se, Iu urubia edi sabi kibodoro maumo ro nato na-nimidirotiti. Iesu patu urubia mo ro ubauba ta-niwaititi, nedi kimibiria tanaro ro imese opia rie. 14 Iu urubia edi sabi patu ro mo ro koko ia se nirobidirotiti, ina nou sapuwo to mo masiro imese ohu ia to gowamo arua Iu urubia mo mutu kohaudiro borubi neio mo ro ta-nirohodorai-ro sopu to niauri-ro. Iedi sabi sirio ro nimo nasa naminami ro na-nitamudiro-rimo mo ro bibiri to nibodorotiti.

15 Kaupoti mo Godi ro keba se gabo ta-nemesioidiro-ro, mo mamu niro turi ato na-nomidiro, edi tau ro nato Godi ro nato narapoi-ro nou woko emesioidiro ri, nou edi maumo nirimagare ro nato nemohodowa-ro. 16 Ina Godi ro Iesu Keriso nou mabu ato gowawea-ro mo aboto, nou ubi ie mo ro Iesu Keriso sapuwo to edi mea owera ro imowauti ri Iu owera karo tato urubia aboto.

Ina edi tau ro nato mo ro ata dubu ata aboto ou pua muro owera imade ri. 17 Idaro mo Ierusarema to samo to ou pua, edi na urubia ro na-giapoi keba se kitiodorai urubia to, neio aboudo arua umoro owera imade ri. Mo Arabia duriomoro to aise nodori, iato na-nimidirotiti taie ioudo norowameai-ro Damasikasi sabowa to.

18 Netewa didi kisimisi na-goroporeai-birimo mo nato nidiai-ro Ierusarema sabowa to Pita owea ri. Mo Pita abato tuturu tau to omidiro pua, 15 saiki to nomidiro nou abato. 19 Ina iedi tau ato na-nomidiro Ierusarema sabowa ato Iesu neama Iemisi mo ro nou se nowea, ata kotiodorai dubu ata mo ro owea pua. 20 Godi umoro ie, abora mo ro nedi owera ro na-niatiti karasaubuti owera pua, morobise owera ie.

21 Ina ioudo na-nasiriai-ro Siria ra Sirisia ra nedi duriomoro teibo ro neito nagediai-ro. 22 Iesu patu urubia Iudia duriomoro ato na-gorowomidiro iedi tau ro nato, neio umoro pua mo sosoro kiauri. 23 Neio ro owera se irowidirotiti-mo ibo, ‘Nimo etu ro niwaititi ubauba nedi dubu ro nimo kimibiria tanaro imese moro to atowouti ri, abora nou ro imowauti urubia mea owera Iesu sapuwo to.’ 24 Ina neido ie iedi kimibiria urubia sirio ro mo ro beda tanaro nisioidiro Godi masiro nou mabu ato gowoubua-rimo.