1 Taie, Godi ro ibo Noa aboto ‘Oro, oro orobo, mere peteibi, neibi upi mutu, mo ro korosa niwai-ibi. Nibi merebusere sirio se ba-dirasomo-bimo, neio ro irowomidirotitiwai ri duriomoro gebari ato. 2 Nedi duriomoro ro nato beda mutu namabu sirio ro oroho-dumo, pawa, nakere, imese koromudidiro nakomu mutu, neio tere ri nibi aboudo amadimo-orowadaudiro-ri. Neio mo ro a-niapoi nibi aboto, nibi ro ba-diauri-bimo iedi namabu sirio ro na-woroho-dumo duriomoro ato, 3 nibi ro modobo ie kiho. Kebase mo ro ta-nimapoi kiho sapuwo to sopu rudo na-wisuwoduti-dumo ota iopu puara mutu, ibose abora mo ro a-niapoi karima ohona, ba-diho-mo!

4 Mo ro a-nimowapotai-ibi nibi karima ohona karima mutu iho mamo, sabi ie, mabu keremiro karima aboudo orobu-die. 5 Ibose ata mere ro na-opia, urubia mere keremiro na-emowagare, mo ro ibose wisa kowameai ie. Ina urubia dubu beda nakomu ro kopia ra, nou keremiro na-emowagare, iedi nakomu ro urubia ro keremiro ba-memowagare-mo. 6 Mo nakara se a-nerematiouti urubia dubu kosioidiro, ina beda dubu ro kopia ra urubia dubu, wisa na nou kopia ie.

7 Modobo ie nibi ro sirio merebusere kirasomo, neio ro sirio ba-moi-mo nedi sopu duriomoro ro nato, ina neio aboudo sipu ba-morobodorouti.’

8 Ina Godi ro Noa mere peteibi mutu keremowotouti owera ibo gimowapotai-bi, 9 ‘Mo abora nedi owera ro nama-aro-ri imese morobise owera ie, aise amadimo-ororosioidiro-ri. Nibi edi merebusere ro, aramio, nasaio, neio aboto, 10 ibose beda mutu namabu sirio ra mo ro na-nisioidiro, nedi duriomoro ro nato na-woroho-dumo, imese beda mutu nakomu ra na-gosuwoduti-rimo ota bokose pe goro rudo, nedi owera ro neio aboto ou. 11 Nedi owera ro mo ro na-naro morobise owera ie, mo ro nedi duriomoro ro nato beda mutu namabu sirio ro iamo, ibose imese keremiro nakomu sirio na-woroho-dumo, mo ro neio aboto ido idaibo tanaro osioidiro-ri pua, duriomoro gebari mo ro obo to ina opisiamuti-ri pua.’

12 Ina Godi ro iato gutura, ‘Mo ro isabuna anama-imedea-ri oro urubia mutu, ibose imese keremiro nakomu na-woroho-dumo, nimo imese sirio tau umoro kiwaititi sapuwo to ie. 13 Mo ro darai toboro ohu ato isabuna na anama-owotowa-ri, orio urubia umoro nou ro ama-iwaititi-ri, nou ri nama-owotowa-ri toboro ato neio ro kiauri sapuwo to. 14 Toboro bubu kere ro na-watimuti ina iato na-emowatateai, darai iato aise korowotowa ie toboro ohu ato. 15-16 Darai nio ro kowea ato mo ibose mo umoro koi ie nakara se ibo, mo beda umoro owera naro nibi aboto. Ina darai mo ro kowea ato, mo umoro koi ie ibo mo imese neremowotouti beda mutu keremiro nakomu sirio ra na-woroho-dumo nedi duriomoro ro nato, ido obo ro iopia-ri pua. 17 Nedi darai ro isabuna na nowotowa, nio ie mo ie nimo umoro kiwai aboto, beda mutu nakomu sirio ra na-iamo, mo ro ido ubauba iwai-ri pua.’

18 Noa simara mere peteibi mutu na-gosuruwo-birimo ota bokose pe goro rudo, neibi masiro Sem Iapeti Ham. Ham ro dubu mere garasomai, nou masiro Keineni. 19 Noa edi mere peteibi ro neibi aboudo gorobodorouti imese sirio urubia duriomoro gabogabo ato na-worowomidiro.

20 Noa nou pari woko kisioidiro dubu e. Nou ro ta-gibouti ota gamoda sosoro pari ato, nou masiro gereipi.

21 Taie, ata tau nou ro iedi gereipi iopu ro nuku to iato gimapipiti. Iedi obo ro saro rido pupuwo na-gimidai, nou ro na-gidio, iato kawakawa ro aise gorobai. Nou obotama aise gipuruti, taie porose se norou parai moto goro ato imese gutuwa. 22 Ham ro na-gowea abera porose se korobu moro ato, nou aise gorowameai-ro naramu teibo imowapotai-ma ri. Nou ro ibo ‘Nitiro ma-dou-rido, Idau owea ri.’ 23 Neitiro na-gou-rido abera porose se korobu moro to, nou sosoro emowea pua. Iato abera obotama atimai na huru to gemowou-rido, na-gatimai-rido, taie iato gorowameai-rido.

24 Noa kidio norou aboudo na-geribua-ro, nou umoro na-goi ibo saro mere ro otou tanaro gosioidiro, taie, 25 nou ro Ham ubauba iato gowai ibo, ‘Oro mere Keineni sopu to ama-ororuwo-ri, nou Sem ra Iapeti ra neitiro woko ama-imesioidirotiti-mari, merebusere aramio mutu.’

26 Noa ina iato gutura ibo, ‘Godi Sem ro na-emowabutiti nou masiro Iawe, nou urubia ro ba-memowabutiti-mo! Keineni nou Sem sowake ba-mirohotiti. 27 Ina Iapeti ata goto Godi ro ba-momia. Iapeti Sem mutu ba-mimidiro-do, kamade mutu. Ina Ham mere ie Keineni neitiro sowake ba-mirohotiti.’

28 Noa 600 kisimisi ato abata ro nato gowea, ina abata saro gabo ato 350 kisimisi to ta-gomidiro. 29 Taie, Noa 950 kisimisi na-gorobai, nou iato aise garaburai.