1-5 Roti Sodom sabowa gomo ato gomidiro, iedi tau ro nato Kedoraome auna eputa dubu e, Erama duriomoro ato. Ina nou ro iaurititi nedi eputa urubia ro Bera, Sodom sabowa eputa dubu e, Birisa Gomora sabowa eputa dubu e, Sinabi Adama sabowa eputa dubu e, Semebe Deboimi sabowa eputa dubu e, Bera sabowa, nou ata masiro Soa nou eputa dubu mutu e. Neio nou ro giauri 12 kisimisi to, ina 13 kisimisi na-gorobai neio ro nato gemeseruti-rimo, mabu nou ro auna se isaubutiti. 14 kisimisi na-gorobai Kedoraome nato gimaragoidiro, ‘Iedi urubia ro mo aboudo ta-geremeseruti-dumo.’

Taie, nou ro nato gidabuai Babironia eputa dubu Aramapere, Arioko eputa dubu Erasa sabowa ato, Tidara eputa dubu Goimi sabowa ato. Neio iato garadabuti-rimo boso aimara urubia mutu, imese gou-rimo boso aboto. Neio ro Repa urubia imese ta-giopiauti-rimo Aseteroti Kanaimi sabowa ato. Ina boso ioudo gou-rimo ata sabowa to Ham, ina iato urubia ta-giopiauti-rimo, ibose Susi urubia Ham sabowa ato ta-giopiauti-rimo. Ina ibose Emi urubia ta-giopiauti-rimo neio ro Sabe Kiriataimi sabowa ato. 6 Ina Hori urubia ta-giopiauti-rimo neio ro Idomu podo duriomoro ato, womu tato Eraparani sabowa ti-gorobai-rimo, goto se duriomoro abato na-gowamo. 7 Ina ioudo gorowameai-rimo Kadesi sabowa to, ata masiro Eni Misipata. Ina neio ro amia Amareke urubia ibose to ta-giopiauti-rimo, ina neio ro ibose ta-giopiauti-rimo Amore urubia, Hadadoni Tamara sabowa ato na-gorowomidiro.

8 Kedoraome ro sirio sabowa urubia kiopiauti to na-giporeai, ina saro to boso iato gowou amia sabowa to, idaibo Sodom Gomora Adama Deboimi Bera, neio Sidimi gawagogo ato iato gororowea-rimo. 9 Kedoraome eputa dubu peteibi mutu boso aimara ata sapuwo rido goi-rimo, amia 5 eputa urubia simara boso aimara urubia mutu ata sapuwo rido goi-rimo. Taie, nato gororopiauti-rimo.

10 Sodom ra Gomora ra eputa dubu teibo boso aboudo na-gorowadau-rido, neitiro ro owea pua pusuru bobo na-gowamo, neito aise giretei-ma. Na-giretei-ma, taie pusuru ro aise gimopai-ma. Ina Adama Deboimi Bera eputa urubia imese gorowadau, podo gemidiai-rimo. Taie, podo ro iato aise giwasiai.

11 Sodom ra Gomora ra rido imese sirio namabu Kedoraome ro piro to aise giwadau-ro. 12 Ibose Roti, Abaram aramu e nou ro sarupo na gaubai, nou imese namabu sirio mutu aise gemowadau-ro.

13 Ata dubu Sodom rido na-godau-ro nou ro gemowapotai Abaram ibo, ‘Oro aramu Roti ta-owadau-mo, ibose nou namabu sirio ta-emowadau-mo, ata namabu ata emeserai pua!’

Abaram nou Hiburu gu dubu e. Iedi tau ro nato nou a-gomidiro awawo ota abato, Amore gu dubu Mamere, nou goto ato. Mamere nou neama teibo masiro Ane ra Esekoro ra Abaram mutu neibi ibo oroworohutiti-bimo.

14 Abaram ro na-girorowai iedi owera ro, nou woko urubia iato gidabuti, boso koroho etio ro garatamudiro-rimo. Taie, neio imese gibodoro-rimo saro rido, womu tato Dani sabowa to ti-gorowateai-rimo. 15 Iedi duwo ro nato Abaram ro simara woko urubia iato gihoduti, ina boso imese gereredea. Boso na-gereredea, Kedoraome ro emedio pua, nou Abaram aboudo aise godau. Abaram ro saro rido imese gobodoro, na-gobodoro Damasikasi korohodorai, imese aise gobodoro womu tato Hoba sabowa, Damasikasi sapuwo ato.

16 Taie, Abaram ro imese giapopo-ro mamio, amia urubia, namabu sirio Kedoraome ro piro to na-giwadau. Ibose nou ro ta-gapopo-ro Roti, nou namabu sirio mutu. 17 Abaram ioudo na-gorowameai-ro, Sodom eputa dubu imese gou nou aboto eremowauti ri Sabe gawagogo ato. Iedi gawagogo ro ata masiro Eputa Dubu gawagogo.

18 Ina Merikisedeke ro iato gowea Abaram, nou Sarema eputa dubu e, nou turi dubu e Morobise Godi ohu ato na-omidiro-die nou sapuwo to. Nou ro iato giwou beredi waini Abaram aboto, 19 ina owera to korosa iato gaiwai ibo, ‘Morobise Godi ohu ato na-omidiro-die nou ro gisioidiro-ma toboro ra duriomoro ra, nou ro nakara se oro korosa ba-mowai. 20 Oro Morobise Godi ohu ato na-omidiro-die nou ro gowarebai boso ato nasa rubi na-giopiauti, noudo ie nou ba-demowabu!’

Taie, Abaram 10 kere gabogabo to namabu sirio iato gihoduti, nou beda namabu giwou-ro boso aboudo, ina kaupoti kere nou ro Merikisedeke gomia.

21 Sodom eputa dubu ro iato gutura Abaram aboto, ‘Mo simara urubia se demowameai-ro Kedoraome ro na-giwadau, namabu marasio, oro do ie!’

22 Ina iato Abaram ro ibo, ‘Morobise Godi ohu ato na-omidiro-die nou sosoro gabo ato, mo a-neremowotouti 23-24 ibo oro mo ro ata namabu ata owomidai-ri pua, idaibo tamaka hodo kainai, pausumi beda namabu ra na-niwameai-ro mo ro orobai-ri pua. Kaupoti oro ohona sapuwo nimo ro ta-niho-rimo, mo boso urubia mutu. Saro rido oro modobo pua keremowauti ibo, “Abaram mo ro auna ta-nowai namabu to.” Mamere neama teibo mutu Ane ra Esekoro ra neibi se ba-dimapepeai-ibi namabu, mabu mo neibi ro nowarebai-birimo boso ato.’