1 Iedi sowake urio teibo ro paea dubu teibo to keba se Aberaham abato na-gomidiro-rido, neitiro ioudo gireribua-rido Sodom sabowa iauri ri, ina adimo duwoduwo ato gorowateai-rido ito. Neitiro Roti ro iato giwia-ma goto didiri ato, urubia beda moro ato iradabutiti-dumo. Roti ro na-giwia-ma, nou imese gou neitiro aboto, nou sopu to aise garaburuti, sosoro woidomari goto to aise giwaposowa. 2 Roti ro aise giramairiai-ma, nou ro ibo, ‘Nitiro auna dubu teibo ie, dou-rido mo moto to, sairo iato amadi-iwiouti-ri, ina duwo kaupoti ama-irobu-mari, kowaroho duwoduwo neido amada-aimai-ri.’

Neitiro ro ibo, ‘Marasio, neitiro nato anama-irobu-mari goto didiri ato.’

3 Roti ro inaina aise gimaidodorowado-ma, neitiro koko se egea se giamo-ma. Taie, neitiro saro to iato gireribua-rido, atu se imese gou-birimo Roti mutu nou moto to. Iato Roti ro ohona na-gimesioidiro-ma, beredi isiti tato gimitai-ma, taie neitiro ro aise giho-rido.

4 Norou aboto aupise ie kou, imese Sodom dubu, orio domere, nogenoge, nato gou-rimo Roti aboto. Roti moto dubu sirio ro ta-gemowaperai-rimo, 5 neio ro ibo ‘Oro ro iedi apira dubu teibo ro na-iwodoro-ma, nimo ubi ie neitiro kiworohuti-ma poro rido. Diwosuruwo-maro!’

6 Roti iato gosuruo-ro, magere huru rido aise gopai. 7 Taie, nou ro ibo ‘Nio mo namuturubi ie. Idaibo ubauba tanaro kisioidiro modobo pua neitiro aboto. 8 Modobo ie neitiro mo ro mea se kiauri-ma, mo ubi tato ie ata ubauba kowea neitiro abato. Mo besere irimo teibo tomidiro-do, neitiro umoro pua amia dubu mutu koroho, neitiro irimo teibo ie, nio ubi ato mo ro anamadi-iwosuruwo-mari, simara se ba-diworohuti-mamo.’

9 Neio ro ibo ‘Oro apira dubu e, sabowa dubu pua! Oro gebari pere ra, a?! Oro daragare! Nimo gabo dimatateai-ro! Auna ubauba apira dubu teibo ro amado-owea-ri nimo aboudo, ina ibose auna ia ubauba oro ro ama-owea-ri nimo aboudo!’

Neio serawo mutu Roti aboto iato gorowioro-rimo, magere na-gohoiouti-rimo esebea ri gemiri-rimo. 10 Sowake urio teibo ro magere iato godobura-rido, Roti tu rido aise gopodia-rido imese gowodoro-rido, taie magere iato aise gopai-rido. 11 Iedi dubu sirio ro, orio domere nogenoge neio idomari pogo aise gimowai-rido sowake urio teibo ro, bana se gorowararioidiro-rimo, neio ro modobo pua magere kowea aboto, egea se gowaseidiro-rimo.

12-13 Taie, sowake urio teibo ro ibo, ‘Nedi sabowa ro anamado-opisiamuti-ri. Mabu nedi sabowa ro nato ubauba se etio iworohuti-dumo neio edi iamo ro Iawe ro timewidiro-die. Oro aboudo na-orowomidiro urubia, merebusere, emapeamio, modobo ie oro ro kimowapotaidiro neio hio to neido aragare ri. Tuturu to owamo-ri pua Sodom ubauba anamado-owai-ri, Iawe ro nou ri nimeiriai-madie.’

14 Roti imese gosuruwoidiro-ro hio to emapura teibo imowapotai-mari, besere teibo gabo iedi dubu teibo aboto gimowou-ma. Nou ro ibo ‘Samo to daragare-do sabowa rido, Iawe ro aupise ama-opisiamuti-ri!’

Kaupoti neitiro ibo gimaragoidiro-rido korowiro owera ie.

15 Saiki banibani na-giwotouti-ro, sowake urio teibo ro Roti iato gowoubua-rido, ‘Samo to deribua! Dosuruwo neido! Oro orobo, besere teibo mutu dosuruwo-bimo! Modobo pua oro ubauba ro kowea Sodom kopisiamuti ato.’

16 Roti a-gorodiobuti, koko se gowamo moto kemeserai aboto. Sowake urio ro Roti tu rido korobai orobo mutu, ina ata sowake urio ro besere teibo kirobai-ma, neibi imese gosuruwo-birimo, iato gorowadau-birimo neibi simara keremiro sapuwo to. Roti, nou orobo, besere teibo mutu, Iawe edi nirimagare ro nou gimowaweai-ibiro.

17 Sowake urio ata ro ibo, ‘Podo ro ba-miwasiai-ibi, nibi modobo pua durio goto ato karaperai, nedi moro ro imese anama-opisiamuti-ri. Nibi huru to imetere ate. Hio to se ba-dou-bimo podo to!’

18 Roti ro ibo, ‘Auna dubu, oro auna nirimagare ta-owawea-ro mo aboto. 19 Mo keremiro oro ro nemowameai-die ubauba aboudo. Mo modobo pua nitiro ro na-nemaduduro-do hio to kou podo kemidiai aboto. Mo ipi ato ubauba ro anama-owea-ri. 20 Sabowa kainai aupise towamo-die, mo modobo ie iato karaperai.’

21 Taie, sowake urio ro ibo ‘Io, iato ba-daraperai iedi sabowa kainai ro ubauba owai-ri pua. 22 Oro ito dirario samo to. Iedi sabowa ro ito nama-orowateai-ri, taie Sodom mo ro nato anama-opisiamuti-ri.’ Iedi sabowa kainai ro masiro Soa, Hiburu owera to ‘Kainai ie’.

23 Saiki ta-gidiai-ro, Roti bi nato gorowateai-birimo Soa sabowa to. 24 Tuturu to pua Iawe ro daroho sosoro era nou gemeiriai-ro toboro ohu rudo, era mio ro giretuti-ro, 25 imese namabu sirio, idaibo urubia sirio, moto, sugamoso, ota, ata namabu ata emeserai pua Sodom ra Gomora ra ato, imese ubauba aise giwai. Ibose Iodeni gawagogo ato beda namabu ro gorowotoi, pari namabu, ota sirio, urubia mutu, imese aise gipisiamuti, ataata ararasoro pua. 26 Taie, Roti orobo huru to na-gimeterai, nou damena gohi to aise gararapoi.

27 Taie, Aberaham Iawe mutu beda moro ato geremowauti-rido owera edi goto ro nato, ata kowaroho Aberaham nato gou ito. 28 Nou podo ohu rudo ioudo na-girarowea-ro, Sodom ra Gomora ra sabowa teibo iwia-mari, gahuta se giwia na-gioro-rimo, Iodeni gawagogo sapusapuwo rido. 29 Taie, Godi ro iedi sabowa teibo ro ubauba ta-giwai-ma, kaupoti nou ro ta-gimaragoidiro Aberaham beda owera garo nou aboto. Ina noudo ie Roti beda sabowa ato gomidiro Godi ro ubauba na-gowai, taie nou ioudo aise gowagare-ro.

30 Roti tere ie Soa sabowa ato komidiro besere teibo mutu, ina neibi nou ri gou-birimo podo duriomoro to. Neibi ro nato gowea-birimo goto goro na-gaidiro-ro, taie neito aise godoro-birimo, iato imidirotiti-birimo.

31 Ata tau ato mabira ro neama iato gemowapotai, ‘Neitiro abera oromano ro orobai. Amia duriomoro ato osio busere araremo-dumo, ina nato domere pua ie neitiro kiedea-ma aboto. 32 Neitiro abera tuba sosoro obo momio-rido, mo mutu kirobu-ma, ina ata duwo oro mutu iato kirobu-ma, ibo anamado-owati-ri tuba sosoro obo anamado-omio-ri. Abera ro ama-irasomai-mari bamuai teibo neitiro abato. Modobo pua neibi masiro imese karatowouti aboto.’

33 Iedi duwo ro nato iedi besere teibo ro neitiro ro abera tuba sosoro obo imese gomio-rido, taie iato mabira orobo ro gereredea, abera mutu imese girobu-ma. Iedi tau ro nato Roti umoro oi pua ibo keba besere na-giraposoidiro nou abato, ibose nou beda tau ato geribua-ro.

34 Ata saiki na-gowaroho, ina mabira orobo iato gutura neama orobo aboto, ‘Mo abora duwo Idau mutu ta-nirobu-ma, ina momio-rido tuba sosoro obo, nedi duwo ro nato oro ro ama-ou-ri, nou mutu ama-irobu-mari, mo beda sosoro norowati. Idaibo sosoro tanaro to namado-owati-ri neitiro abera ro mere teibo ama-iwia-mari neitiro ato, ina neibi edi gu ro aratowouti-ri pua, imese ama-outiti-ri.’

35 Taie iedi duwo ro nato neitiro ro ina iato gomio-rido abera tuba sosoro obo, taie neama orobo ro gaimai, nou mutu iato girobu-ma. Ina Roti umoro oi pua ibo saro besere a-giraposoidiro nou abato, ibose beda tau ato geribua-ro.

36 Mabira niro na-gowea, neama ibose to gowea, neitiro simara abera ro gimasomai-ma. 37 Mabira ro dubu mere goroto, masiro a-giduti Moabi to. Abora Moabi urubia na-orowomidiro, nou aboudo gorobodorouti sipu. 38 Neama ro dubu mere ibose ti-goroto, masiro a-giduti Benami. Amoni urubia na-orowomidiro abora, Benami aboudo gorobodorouti sipu.