1 Aberaham nou apira dubu sosoro imidirotiti Pirisitia duriomoro ato, iedi tau ro nato Godi ro Aberaham kimibiria tanaro nato gemowaibia. Godi ro iato gutura nou aboto ibo, ‘Aberaham!’

Aberaham ro iato gemowameai, ‘Mo nou e.’

2 Ina Godi ro iato gutura, ‘Oro ia simara mere, natonato na-ematititi abora ba-dowou muso duriomoro to, podo na-orowotoi-die, duriomoro masiro Moraia. Oro ro iato ba-dopia, momuo se ba-dematowo-ro, mo ba-demowameai-ro beda podo nama-emapoi-ri mo ro, iato ba-dosioidiro!’

3 Aberaham norou aboudo na-geribua-ro nou era iato giabuse, nou sowake dubu teibo kirobai-ma Aisaki mutu, nou doniki korobai, namabu patu neibi ro na-geremododiai-birimo, doniki ohu ato kiaremuti, taie neibi imese gaimai-birimo. 4 Taie, ata saiki neibi atu se gou-birimo, ina ata saiki na-gatamuai-birimo neido na-gou-birimo taie ipi ato imese gorodiobo-birimo. Iedi saiki ro nato beda duriomoro gemapoi Godi ro, nou ro muso rido neido gowea. 5 Iedi sowake dubu teibo ro nou ro iato aise gidiobo-ma, ‘Nitiro nato domidiro-do, doniki diauri-do, neitiro ito anamado-ou-ri Godi emowabu rie, tinamadido-orowameai-ri neito.’

6 Aisaki era patu aise gemamitiai Aberaham ro, taie neitiro imese gaimai-rido, neitiro na-gou-rido, Aberaham giri sipi ato ibose ti-gotoi, era upugo ata tu to gorobidiro. Neitiro na-gou-rido, ipi ato 7 Aisaki ro ibo ‘Idau, neitiro era patu, era upugo, nou mutu e, ina neitiro sipisipi boira? Beda sipisipi namado-opia-ri neitiro ro, nadi ato edea na, Godi aboto kaiwai sapuwo to? Neitiro sipisipi tato ie!’

8 Aberaham ro ibo ‘Godi ro anamadi-imia-mari neitiro sipisipi, kematowo sapuwo to.’

9 Neitiro neido kou, podo to korowateai, taie, Aberaham nadi kitomuti, era nadi maumo ato kaduruti, taie Aisaki nou ro na-gowea kotoi, Aisaki nou ro kohiai, iato gatahiti. Nou ro na-gatahiti imese hodo to taie, aise gowou beda nadi gitomuti nato imese gowotodai, iato girisipi kemaubai, 10 taie giri susura to ubi ie omua ri, 11 ina Godi sowake urio ro ibo, ‘Ei, Aberaham, omua ate! 12 Dodiobo edi tanaro ro! Mo umoro ta-noi Godi oro ro temaragoidirotiti, oro mere emowairiai pua nou aboudo.’

13 Aberaham na-giraroweauti, nou ro dubu sipisipi iato gowea, soso daimo ato na-gotoi, gaini karawia to ta-garagodeauti. Taie, Aisaki nou ro kowagare ioudo, nadi rido hodo na-gemapoduti taie, nou ro Aisaki aise gowotobowa, nou bobo ato Aberaham kiraumo sipisipi korobai, iato gopia nou ro, taie, nadi ato kedea, era kowateai imese gematowea Godi aboto.

14 Aberaham edi tanaro ro na-gosioidiro, taie iedi sopu ro masiro a-giduti, ‘Iawe ro Iato Gaiwai’, ibose abora urubia aro-dumo ibo, ‘Iawe ro edi podo ro nato ama-imio-ri’.

15 Iedi tanaro ro na-goroporeai, Godi sowake urio ina owera iato gutura 16 ibo, Iawe ibo aro-die nou aboto, ‘Aberaham, oro simara mere oro ro orobai pua, oro ro emowairiai pua, oro ro aise aidodorai-die. 17 Ina noudo ie mo ia simara masiro nasoro mo edi hodo kasaubiai owera ro koko kowai aboto, ibo oro edi aramio merebusere ro nasaio neio imese sirio amadimo-oi-ri. Koriri iopu beda sosoro iamo, ibose kiboni na-orowotoi toboro ato, sipu idaibo sosoro amadimo-osuruwo-ri oro aboudo, mabu mo beda owera naro oro mere sapuwo to, oro ro aise gosioidiro. Oro edi aramio merebusere ro nasaio boso aimara amadimo-oroho-ri erere duriomoro to, neio ro amadimi-iwasiti-ri, iato aise amadimi-irahidimo-ri.

18 Imese urubia sirio mo aboto amadimo-orowaro-ri ibo, “Aberaham urubia aboto korosa beda sosoro iaiwotiti, ina idaibo korosa ba-diaiwo-ro nimo aboto.” Neio idaibo sosoro amadimo-orowarotiti-ri, mabu oro ro mo edi owera ro aise gosioidiro.’

19 Taie iato neitiro ioudo na-gorowameai-rido sowake dubu teibo aboto beda moro ato gimeserai-marido, kimowapotai-ma taie, neibi imese gorowameai-birimo Besiba to, iato imidirotiti-bimo.

20 Taie ata tau ata dubu ro iato giwasoro Aberaham aboto Nahoro dubu mere sirio sapuwo to. ‘Oro neama Nahoro nou merebusere sirio ie abora, Mirika ato girasomai. 21 Keba mere Usi, ina nou saro ato na-gai-ro masiro Busi, ina nou abato Kemuere ie. (Nou abera Arama.) 22 Ina arua dubu mere neio masiro Kesedi, Haso, Piridasi, Idarapi, Betuere. 23 Betuere Rebeka abera ie. Oro edi neama ro Nahoro nou ro girasomai Mirika ato, ina 8 dubu mere nou ro girotuti. 24 Ibose Nahoro ro sarupo besere ta-gedea, nou masiro Reuma. Ina iedi sarupo besere ro Nahoro ro nou ato girasomai-ibi dubu mere peteibi, neibi masiro Teba Gahama Tahasi ina Maka.’