1 Aberaham Hiti urubia aboudo goto komidai, nou orobo bobo to kedea na-goroporeai, odio tau ro nato Aberaham nou oromano ro ta-gorobai. Nou ro beda tanaro ra na-isioidirotiti Iawe ro womio-ro odio korosa ro.

2 Nou ro keba sowake koroho dubu aboto iato gutura ibo, ‘Oro tu ba-dowaumia-ro mo oroisia maumo to 3 morobise owera daro-ro Iawe sosoro gabo ato toboro ra duriomoro ra edio urio ro nou ro gisioidiro-ma. Oro ro mo mere orobo Keineni duriomoro urubia abato emosora ate, 4 oro dou mo beda duriomoro ato noroto, mo ia simara urubia neio aboudo ba-demerebai-ro Aisaki orobo. Nou nimo simara tanaro ie.’

5 Sowake dubu ro ibo ‘Boido mutu umoro ra besere ia korowairiai mo mutu kou tato neito, modobo ra Aisaki mo mutu korowameai oro koroto duriomoro to?’

6 ‘E e, oro ro owou ate! 7 Iawe, Adiri Abera, nou ro mo ta-nowagare-ro mo simara urubia duriomoro rido. Iawe Godi ro mo duriomoro gebari isabuna ta-nemedea. Iawe ro ibo ta-gutura “Mo ro nedi duriomoro ro anama-iwai-ri oro aramio merebusere aboto.” Iawe ro sowake urio ama-emeiriai-ri keba moro to, oro nou ro ama-owarebai-ri Aisaki mea besere kemerebai aboto. 8 Nou korowairi ato ba-demeserai, kaupoti Aisaki oro ro owou ate!’

9 Taie, Aberaham sowake dubu nou tu iato gowaumia nou oroisia maumo to, morobise owera iato garo nou sosoro gabo ato.

10 Nou Aberaham aboudo na-gasiriai namabu patu nou ro na-gimododiai ina ibose meamea namabu patu Aisaki orobo emotohiti na nou ro kemoro ohu ato aise giedea, arua sowake urubia mutu 10 kemoro neibi ro na-girobai-birimo namabu ohu ato aise giaremo-birimo, neibi nato gaimai-birimo.

Neibi neido na-gou-birimo oromo teibo turituri ato Arama urubia beda moro ato na-gorowomidiro, ata sopu ta-ararasoro iato Nahoro sabowa gebari. 11 Taie adimo ato mamio neio aise kou e obo bobo to, obo ioudo iaputi ri. Taie obo bobo neibi ro ta-gowea-birimo, 10 kemoro aise giwotodai-birimo.

12 Neibi ro neio imese na-giwotodai-birimo goto ato, taie keba sowake koroho dubu iato a-gararatoro Iawe aboto, ‘Iawe oro mo eputa dubu ro emowabutiti, ibose oro ubi tanaro tisioidirotiti nou ro, nou mere orobo mo ro bida besere emerebai-ri ra, oro nakara se umoro ie. Oro nirimagare dowawea-ro mo eputa dubu aboto. 13 Mo nato ti-notoi obo bobo ato, busere tiodori-die obo iaputi ri. 14 Mo obo etu ro nomia-die mo ro nama-utura-ri ibo, “Mo obo domia-ro,” mo nou ro namadi-omia-ri obo, daro nou saro to namadi-utura-ri ibo, “Oro kemoro ibose mo ro obo anama-imio-ri,” io, nouse ie iedio besere ro oro sowake dubu nou masiro Aisaki nou ro nou ama-edea-ri. Mo umoro anama-ai-ri oro nirimagare owawea-die mo eputa dubu aboto.’

15 Sowake dubu nou kararatoro oroporeai pua iato Rebeka ro ohau-die auna sabowa rudo. Nou Betuere besere ie, Betuere nou Nahoro mere ie Mirika ro goroto, Nahoro Aberaham neama ie. 16 Rebeka na-gohau-ro ioudo bena to nou ro tarepuru nou gowohau-ro, ina Rebeka nou sagaru ia ie, uramu ro kedea tau ta-gorobai iedi tau ro nato, nou irimo besere ie. Taie nou kodori obo na-giaputi-ro iato na-gorowameai-ro, 17 iato sowake dubu ro Rebeka aise gemarario, nou ro ibo, ‘Mo egea mere obo ma-domia-ro.’

18 Ina Rebeka ro ibo, ‘O, io buro, oro obo anama-omia-ri.’

Taie obo tarepuru nou ro na-gedea goto to taie nou ro obo iato gomia. 19 Nou obo kodio na-goroporeai taie Rebeka ro ibo, ‘Oro kemoro na-irobu-die obo mo ro anama-imio-ri womu tato neio obo ro kiamidimai.’

20 Taie nou ro iato gatamuai obo kimaseduti edina ro gomidiro obo tarepuru ato. Taie nou ina ina gorowame hio ito obo bobo to, obo nou ro ioudo gimoworoho-ro, nou ro kupia sirio to iato gimaseduti. Taie iedio kemoro patu ro neio kou obo imese gidio-rimo, obo kidio ro imese ti-giamidimai.

21 Sowake dubu kimaragoidiro ro gopia nou ro edio tanaro na-giauri. Nou ro ibo, ‘Mo Iawe ro morobise a-nowaboi-die ra nedi besere ro nou se ra nou?’

22 Kemoro neio obo kidio na-giporeai-rimo, nou gorodi to na-gosioidiro-rimo auna mani namabu e punugo karao nou ro kememidai taie nou gomia Rebeka. Ibose nou ro idaro netewa teibo tutahe teibo ibose auna mani namabu teibo ie gorodi to gisioidiro-marimo, nou giaiwai-ma Rebeka aboto. 23 Taie, nou ro ibo Rebeka ato, ‘Oro abera etu ra? Neibi nato kirobu-bi modobo ra oro abera moto ato?’

24 Ina Rebeka ro ibo, ‘Mo abera Betuere Nahoro ie, Mirika nou mamu e. 25 Modobo ie nibi kirobu-bi mo abera moto ato nedi duwo ro nato, ina ibose kemoro kirobu moro towamo ina sugamoso sirio ie neio ihona.’

26 Sowake koroho dubu nou iato aise giraposowa nou Iawe iato gemowabu 27 ibo, ‘Mo ro oro nemowabu. Iawe oro mo eputa dubu ro emowabutiti, oro morobise tanaro daro meamea tanaro isioidirotiti mo eputa dubu aboto. Mo mea se ta-nowaboi-ro oro ro mo eputa dubu urubia aboto.’

28 Taie, Rebeka imese girario, edi tanaro na-gororosioidiro nou ro iato gorowauti nou simara mamu urubia aboto.

29-30 Taie, nou medera masiro Rebeni nou ro na-girorowai iedi owera ro, Rebeka nou ro na-gowea tutahe ra punugo karao ra mutu na-gotoi, nou imese girario ata dubu iato gowea kemoro gimotoi obo bobo abato. 31 Taie Rebeni ro ibo, ‘Oro korosa ta-womia Iawe ro, ba-didiai-birimo moto to, nibi kirobu-bi moro ta-nimesioidiro-ibi, kemoro kirobu moro modobo ie, sugamoso sirio ie neio nou amadimi-iho-ri.’

32 Ina iato Aberaham sowake koroho dubu nou ri godoro neibi moto to iato Rebeni ro nou kemoro gimini ohu rido nou ro iato giamodoro-ro beda mutu namabu patu ro giamo kemoro ato kiamodoro nou ro goto ato giaremuti. Taie Rebeni ro kemoro sugamuso na-gimio neio imese giho-rimo. Rebeni karatea obo nou ro kowosuwoidiro imese gimedeai-ibi sairo iwiouti na taie sairo na-giwiouti-birimo iato Rebeni ohona aboto girario ohona kimemidai-ibi taie iato gimiai-ibi. 33 Nou ro ibo, ‘Diho-birimo ohona nou e.’

Ina odio sowake koroho dubu ro nou ro ibo, ‘Mo auna owera ti-norobidiro nou nama-aro-ri keba se, ohona ido nama-iho-ri.’

Rebeni iato gemowameai, ‘Dimowauti-ibiro!’

34 Taie nou owera iato gatamuai karo, nou ro ibo ‘Aberaham mo eputa dubu e. 35 Iawe ro korosa giaiwo nou aboto, nou rie nou auna namabu sirio kiworohuti. Nou abato toroho-dumo burumakau sipisipi kemoro hosi daro nou abato sirio namabu tiamo gorodi mani, siriba mani, sarupo urubia upi dubu, imese Iawe ro womiotiti ina nou mere dese to gemoroto oroborabere ro. 36 Sera nou abere ia ie nedi tau ro nato ina mere nato gemoroto. Mo eputa dubu nou ro imese namabu sirio iedi mere ro nou aboto giaiwai.

37 Mo simara eputa dubu aboto morobise owera tanaro. Nou ro ibo “Keineni urubia abato mo mere orobo ioudo emerebai ate, 38 mo ia simara gu urubia aboudo ioudo ba-demerebai-ro!”

39 Ina mo ro iato nemowameai mo eputa dubu, “Nou nama-orowairiai-ri kou tato mo mutu, iato bida sosoro nama-owati-ri?”

40 Mo eputa dubu ibo, “Mo sirio tau Iawe ubi tanaro ti-nisioidirotiti, nou ro sowake urio ama-emeiriai-ri keba moro to oro nou ro ama-emasouti-ri. Oro ro mo mere orobo mo simara gu urubia mo abera urubia aboudo ioudo amadi-emerebai-ri. 41 Mo gu urubia ro iedi besere ro kotiodorai tato, oro ba-demeserai.”

42 Taie mo ro Keineni duriomoro na-nemeserai iato nou-die nedi duriomoro neito abora. Taie ina obo bobo ato mo kararatoro na-nosioidiro iato mo ro ibo nararatoro, “Iawe, oro mo eputa dubu ro emowabutititi, mo oro ro demowapotai-ro mo eputa dubu mere beda besere emerebai ri ra? 43 Mo nato notoi obo bobo abato. Mo ro nato nama-emotoi-ri ata orio besere ata amadi-ou-ri obo iaputi ri mo ro ibo nama-utura-ri nou aboto ‘Mo oro tarepuru rudo egea mere obo ma-domia-ro anama-odio-ri.’ 44 Ina iato etu ro utura-die ibo, ‘Obo nou e, dodio, ina ibose mo ro oro kemoro obo anama-imio-ri, amadimi-idio-ri,’ mo umoro nato nama-ai-ri ibo io, nou se ie, Iawe oro ro mo eputa dubu mere edi besere ro nou gemohodowa edea nari.”

45 Mo kararatoro owera oroporeai pua iedi tau ro nato Rebeka ro ohau-die auna sabowa rudo obo iaputi-ri, nou obo na-iaputi ina mo ro iato nemowapotai, “Mo obo ma-domia-ro.”

46 Taie Rebeka ro ibo “Obo nou e, dodio. Oro kemoro ibose obo anama-imio-ri.” Taie, nou ro obo tarepuru iato edea goto to, mo obo iato nedi, taie nou kemoro obo iato imio ina ina aise orowame nou obo bobo to ioudo na-iworoho-die tarepuru to iato gimawiriti taie kemoro nou idio-dumo. 47 Ina besere ia iato nemodowa, “Oro abera etu ra?” “Mo abera masiro Betuere Nahoro, Mirika nou mamu e.”

Taie mo neido na-nirario nou namabu kememidai kemoro ohu rudo idaibo tutahe teibo iato nowoiti, karao punugo ato iato nemamitiai. 48 Iato mo na-niroborea eso owera naiwai Iawe aboto mabu mo nou ro nemasouti-die mea gabo mo ro korobai aboto, mo eputa dubu neama nou aramu besere nou mere ro kedea. 49 Abora nedi tau ro nato mo demowapotai-birimo nibi ro, mea nirimagare tanaro nibi ro amabimi-isioidiro-ri ra mo eputa dubu aboto? Ina kisioidiro tato nibi ro demowapotai-birimo ina mo umoro ie mo beda tanaro nama-osioidiro-ri.’

50 Rebeni Betuere mutu neitiro ibo, ‘Nedi tanaro ro na-wororosioidiro nou morobise Iawe aboudo ie. Neitiro ro iwesegerai-ri pua nedi tanaro ro, imese aise mowamo idaibo sosoro. 51 Rebeka ba-dorobai ba-dowou oro eputa dubu mere ro ba-medea, mabu Iawe ubi ie.’

52 Taie Aberaham sowake dubu ro na-girorowai iedi owera ro nou aise giraposowa goto ato Iawe imese gemowabu.

53 Taie ioudo na-geribua-ro Rebeka nou ro iato gomia obotama daro gare ato kiaremo nakomu, tu ato kiaremo nakomu gorodi ra siriba ra rudo gisioidiro-rimo iedio nakomu ro. Taie, nou ro ibose to gimio-ma awawo mani namabu patu nou medera ra mamu ra aboto.

54 Taie, iedio duwo ro nato Aberaham keba koroho sowake dubu nou simara dubu patu mutu neibi kiho kidio nou ro gereredea, aise girobu-bi iedi duwo ro nato.

Taie ata saiki na-gowaroho sowake dubu ro iato gutura ibo, ‘Abora mo demeiriai-birimo Rebeka mutu mo eputa dubu aboto.’

55 Rebeka medera ra mamu ra neitiro ro iato gemowameai-rido ibo, ‘Io, Rebeka amia saiki neibi mutu ama-omidiro-ri nou ido tama-ou-ri.’

56 Ina sowake dubu ro ibo, ‘Mo nodiobuti-bimo. Mo kou gabo neito Iawe ro nemasouti-ro, demeiriai-birimo mo Rebeka mutu mo eputa dubu aboto abora.’

57 Neitiro iato gutura-rido, ‘Tau Rebeka anamado-orumai-ri ina anamade-emodowa-ri nou ubi beda sosoro hata ie.’

58 Taie neitiro ro iato korumai iato gemodowa-rido, ‘Oro ubi ra nedi dubu ro nou mutu kou abora?’

Ina nou ro ibo, ‘Io, mo ubi ie kou.’

59 Taie nou sowake orobo nou na-iaurititi nou mutu iato gitiodorai-mabirimo ou ri Aberaham sowake dubu mutu. 60 Tau keba se neio ro mea owera komia ibo, ‘Nimo medera, oro merebusere aramio sirio amadimo-oi-ri, neio ro amadimi-iwasiti-ri boso rubi namabu duriomoro mutu.’

61 Taie, Rebeka kemoro gimini ohu to korora, nou sowake orobo ibose ata kemoro gimini ohu to korora, arua sowake busere neibi mutu atu se imese gou-birimo. Aberaham sowake dubu nou simara dubu patu mutu, ina Rebeka nou amia busere mutu, neio ito gou-rimo Keineni duriomoro to.

62 Iedi tau ro nato Aisaki ta-gemeserai obo bobo bato gomidiro iodi duriomoro, nedi obo bobo masiro ‘Keremiro dubu na-womidiro mo nou ro niauri-die’. Nou iato gomidiro Negebi duriomoro ato. 63 Nou iato goroho mea kimaragoidiro iwia ri. Taie iato nou neido na-girarowea muso ato nou ro a-giwia kemoro dawarea na-gou-rimo neito. 64 Taie Rebeka ibose ioudo na-girarowea-ro nou ro ata dubu se gowea Aisaki se gowea nou ro. Taie nou kemoro gimini ohu rudo na-gerepeduai-ro, 65 nou ro iato emodowa sowake koroho dubu, ‘Io beda dubu ra io?’

Sowake dubu ro ibo, ‘Aio mo eputa dubu e io.’ Taie Rebeka woidomari aise gorowasiai obotama to. (Neio ta-isioidirotiti-mo idaibo tanaro keredea saiki ato.)

66 Aisaki aboto na-gorowateai-rimo neio, iato keba sowake koroho dubu owera Aisaki aboto iato gorowauti beda tanaro ro gororosioidiro iato beda tanaro giauri nou ro imese gorowauti.

67 Taie Aisaki imese gou-ro Rebeka nou ro korobai taie imese gowou Sera parai moto goro to iato nou ro aise gedea. Aisaki nou auna ubi ie auna nirimagare ie Rebeka aboto. Aisaki mamu Sera ta-garaburai keba se nou rie Aisaki mibo mutu komidiro. Iato Rebeka nou ro na-gedea edio mibo ro Rebeka ro gemowatateai.