1 Iedi tau ro nato Ria ra Iakobo ra neitiro besere irimo ie Daina sabowa mamio aboto imese gou apira. 2 Taie eputa dubu Hamo edi mere ro Sekemi, Hiwi gu dubu e, Daina sabowa ato nou ro nato gowea. Sekemi ro na-gowea Daina, nou ro aise gorobai imese gowodau iato tanaro aise gemesioidiro, Daina Sekemi ro siripo ta-gowai. 3 Sekemi auna ubi ro gowamo Daina aboto, nirimagare owera to iato gageawado.

4 Taie nou ro edi umoro owera ro aise gowarario nou simara abera aboto, nou ro ibo, ‘Iedi besere ro na-wotoi-die mo oro ro gabo demoworohuti-ro, mo ubi ie nou kedea aboto.’

5 Iakobo nou umoro ta-woi nou besere aboto Sekemi ro beda siripo tanaro gisioidiro, iedi tau ro nato nou dubu mere ta-garaseperai-rimo kiwoubua namabu imowotoi ri. Taie Iakobo nou ata owera ata utura pua iedi tanaro ro nou sapuwo to, womu tato nou dubu mere ti-gorowameai-rimo kiwoubua namabu kimowotoi moro rido.

6-7 Iakobo dubu mere neio ro na-girowai-rimo otou tanaro gororosioidiro neio auna serawo ro giwati mabu Sekemi ro neio medera na-gowadau ubauba tanaro gosioidiro Isiraere urubia aboto. Neio serawo niro aise giahidimai-rimo, ina tau se gorowameai-diomo abera aboito.

Taie iato Sekemi abera Hamo nou ro gorowateai owera eremowauti ri Daina abera ina nou medamio mutu. 8 Nou ro ibo, ‘Mo mere ubi auna se owamo Daina aboto, nou auna ubi ie nou kedea aboto. 9 Nimo upi busere modobo ie keremahudurio, nimo upi busere nio ro ba-diaremo-mo, nio upi busere nimo ro namadimi-iaremo-ri. 10 Nimo duriomoro nio duriomoro ie, atu se anama-irowomidirotiti-ri kamade mutu. Nio aise gidimo-oroho-ri, modobo ie nimo mutu nio namabu keremahudurio.’

11 Sekemi ro ibose ti-garo Daina abera medamio neio aboto ibo, ‘Nirimagare peteibi modobo buro ra Daina mo ro kedea? Mo owera nibi ro namabimo-omidai-ri ubi to, nibi etou nakomu apoi-diebirimo kotohiti sapuwo to nibi anama-imia-ibiri. 12 Nibi ohu ia to namabimo-owioidiro-ri, ibose nibi ro amabimo-owea-ri iedi wisa ro. Kaupoti nibi medera aise daiwai-birimo mo ro anama-edea-ri.’

13 Ina Daina medamio ro Sekemi abera mutu neitiro iato gimowapotai-marimo karasaubuti owera mabu neio abato iedi niro temeteme ro ibose ti-giamo neio medera nou ro ubauba beda sosoro gowai. 14 Taie, medamio ro ibo, ‘Nimo medera oro ro edea-ri pua, kaupoti namabu towamo, dodio nou ro odiobidiro mabu oro dubu simara takamai owasiai pua ina uriai pua. Idaibo sosoro dubu ro kedea ato nimo medera, nimo siripo aise namadimo-oi-ri. 15 Nimo ro oro nato namadime-emapoi-ri oro dubu simara takamai nama-asiai-ri ina nama-uriai-ri nimo sosoro iedi kaupoti tanaro ro oro ro nama-isioidiro-ri io modobo ie. 16 Idaro oro nimo ro a-nemowapotai-dumo beda mutu domere ro orowomidiro auna sabowa ato modobo ie neio dubu simara takamai kiasio kiouriouti ina iedi tau ro nato nimo busere nio ro amadimi-iaremo-ri, nio gabo amadi-orodobura-ri. Nimo domere ro nio upibusere modobo ato amadimi-iaremo-ri, nimo kaupoti duriomoro ato anama-irowomidirotiti-ri kamade mutu, nimo kaupoti urubia, kaupoti ohona nato nama-orowomidiro-ri. 17 Nio ubi tato namadimo-oi-ri dubu simara takamai kiasio kiouriouti aboto Daina nimo ro anamadimo-owagare-ri neido ata duriomoro to anamadimo-ou-ri.’

18 Nedi owera ro neitiro na-girowai-rido medamio beda sosoro owera to garo-rimo, neitiro ro eso to gomidai-rido. 19 Iato Sekemi imese girario nou simara urubia imowauti ri edi tanaro ro nou osioidiro ri, mabu nou auna ubi ie Iakobo besere kedea aboto.

Sekemi simara urubia auna ubi ie nou aboto nou ro beda owera karo ra neio ro aise kirowidiro ie. 20 Taie Sekemi ra Hamo ra imese gou-rido auna sabowa to beda moro ato iradabutiti-dumo neitiro ro domere iato gimowauti-rido iedi owera ro. 21 Neitiro ro ibo, ‘Nodio urubia ro miro gowou-diomo, modobo ie nimo mea se korowomidiro neio mutu, neio nato ba-mirowomidiro nimo duriomoro auna ie, atu se anamadimo-orowarebai-ri, modobo ie nimo namabu keremahudurio. Idaro neio ro kiaremo modobo ie nimo upibusere, nimo ro kiaremo modobo ie neio upibusere. 22 Kaupoti tanaro towamo nimo ro kisioidiro aboto, nimo domere sirio na-norowotoi nato nedi kaupoti tanaro ro nou mosioidiro-rimo, neio sosoro nimo modobo ie dubu simara takamai kiwasio kiwouriouti. 23 Nedi tau ro nato neio ubi nato amadidimo-oi-ri neio atu se nato ama-irowomidiro-ri nimo mutu atu moro ato. Taie nimo kaupoti urubia to nato namadima-ararapoi-ri. Nimo ro namadimo-osioidiro-ri idaibo tanaro, neio edio kiwoubua namabu sirio ro burumakau sipisipi nanigosi kemoro ibose neio moto ato edi namabu sirio na-iamo nimo ro anamadimi-irahidimai-ri, nimo ro modobo ie edio tanaro ro nou kosioidiro. Taie, neio aise ama-irowomidirotiti-ri nimo abato.’

24 Imese beda mutu domere ro gemeiti ito neio ro na-girowai-rimo iedi owera ro neio ro ubi to gomidai-rimo, Hamo ra Sekemi ra beda owera to gimowauti-rido.

Taie iedi tau ro nato imese domere neio edi tanaro ro aise gosioidiro-rimo, dubu simara takamai na-giwasio-rimo taie iato giwouriouti-rimo.

25 Netewa didi saiki peteibi ro goroporeai-rimo iedi domere ro na-giwasio-rimo dubu simara takamai na-giwouriouti-rimo, neio temeteme mutu girobu, Daina iedi medera teibo ro Simioni ra Riwai ra neitiro giri susura teibo na-gimidai-marido taie urubia umoro iwai pua neitiro edi sabowa gebari ro neito na-godoro-rido, taie imese dubu sirio neitiro ro pamo se giopiauti-rido. 26 Taie neitiro neido na-gou-rido Hamo ra Sekemi ra iato giopia-marido, Daina Sekemi moto ato gomidiro neitiro ro aise gowosuruwo-rido imese gowameai-rido.

27 Taie Iakobo arua dubu mere neio wapo rido gou-rimo neio ro pamo urubia aise gimadau-rimo neio beda mutu nakomu ro giamo iedi sabowa gebari ro nato, 28 goto ato edi na ro na-goroho-rimo kiwoubua namabu sirio, ibose pari ato edina na-gorowotoi neio ro imese aise giwagare-rimo. 29 Neio ro Daina wisa gowameai-rimo, Sekemi iedi tanaro ro na-gosioidiro neio medera aboto nou wisa ie. Taie beda mutu namabu patu ra moto ato na-giamo imese aise gimade-rimo neio ro, arua awawo mani to na-gimade-rimo nedi namabu patu ro neio ro aise giwadaudiro-rimo.

30 Iakobo ro na-gowea iedi tanaro ro nou ro iato gutura Simioni ra Riwai ra aboto, ‘Nitiro ro mo auna mibo ta-nomia-do. Keineni urubia Perese urubia nato na-orowomidiro nedi duriomoro ro nato, iedi urubia sirio ro neio namadima-aradabuti-ri atu se neio ro auna boso amadimo-osioidiro-ri neibi aboto, neibi anamadimi-iwota-ibiri, neibi dubu patu pua, neibi anamadimi-iporea-ibiri.’

31 Taie, medamio ro ibo, ‘Nimo medera era gabo orobo ra?’