1 Iuda ata tau ato nou naramio niramio aise gimeserai taie nou imese gou-ro ata sabowa masiro ie Adurami, taie nou iato imidirotiti ata dubu abato masiro Haira. 2 Iato na-imidirotiti nou ro ata besere nato gowea Keineni duriomoro ato nou ro nou gedea, nou abera masiro Sua. Iuda nou mutu na-imidiro-do 3 iato nou niro ie, nou ro Iuda mere gemowohau, nou ro masiro Eri to giduti.

4 Iato ina ibo wimidiro-do Iuda orobo ina niro iato gowea, iato ata mere se gemowohau, nou ro masiro Onana to giduti.

5 Iato ina ibo wimidiro-do Iuda orobo ina niro iato gowea, Kesibi ato na-gomidiro ata mere nou ro iato goroto, nou ro masiro Sira to giduti.

6 Iedi mere teibo ro Eri ra Onana ra auna na-goi-rido, Iuda ro keba mere orobo iato gemerebai-ro masiro Tama, nou ro nou gedea. 7 Iuda edi keba mere ro Eri na-wimidirotiti nou kerewaikerewai se iraridirotiti Iawe sosoro gabo ato. Taie nou Iawe ro keremiro aise gemasiai.

8 Taie Iuda ro iato gutura Onana aboto nou turi mere, ‘Oro naramu ta-garaburai nou edi orobo garamu ro oro nou mutu ba-dirobuti-ma. Nou abato ba-dirasomai merebusere, naramu merebusere to ararasoro na. Nou nimo tanaro ie.’

9 Onana umoro ta-goi ibo nou ro edi merebusere ro nama-irasomai-ri naramu orobo garamu ato nou merebusere to ararasoro-ri pua.

Taie nou ibo orowatititi naramu orobo mutu kirobuti-ma ato nou dubu simara na goto to kiawira ie mabu nou ubi tato ie merebusere kirasomai naramu orobo garamu abato. Mabu edi merebusere ro nou merebusere to ararasoro-ri pua, naramu merebusere to kararasoro ie.

10 Iawe ro ta-iaurititi-ro nou edi tanaro na-isioidirotiti. Onana ro beda tanaro isioidirotiti Iawe kamade tato owaitititi ina noudo ie Iawe ro nou keremiro nato gemasiai.

11 Iuda ro ibo etera garamu ato, ‘Oro ba-dorowameai simara sabowa to, oro garamu iato ba-dimidiro womu tato mo saro mere nama-ororomai-ri oro nou ro nato ama-edea-ri.’ Iato Tama abera aboto imese gorowameai. Ina Iuda nou ubi tato ie nou saro mere naramu teibo sosoro karaburai.

12 Iuda tuturu tau to ta-imidirotiti, nou orobo, Sua edi besere ro nato garaburai. Taie nou pape ibo imidirotiti womu tato pape ti-goroporeai, ina ioudo Timina sabowa to nato gou, urubia iwia ri nou sipisipi sobo na-giwasio-rimo neio giwia nou simara namutuna Adurami dubu e Haira, nou mutu gou-rido.

13 Tama ta-gemowapotai-rimo ibo, ‘Oro daramunegere tou-die Timina sabowa to, nou sipisipi sobo iwasio rie.’ 14 Taie nou garamio edi garegare suana ro aise gipuriti, orio obotama iato giroiti ina obotama kere to nou sosoro woidomari iato gorowasiai-ro. Timina gabo sapuwo ato na-owamo nou iato aise gomi Enaimu sabowa ato magere damo kodouti moro ato. Nou ro edi tanaro ro nou ri gosioidiro mabu nou umoro ta-goi ibo Iuda saro mere Sira auna ta-goi kaupoti Iuda ro gabo mena se emoworohuti pua nou ro kedea aboto.

15-16 Taie Iuda ro na-gowea edi orobo ro na-gomidiro nou ro eibimai pua, nou a-gimaragoidiro ibo nou ata era gabo orobo ie mabu nou sosoro woidomari ta-giwasiai obotama kere to. Iato Iuda nou aboto aupise na-gou nou ro iato gutura ibo, ‘Mo ubi ie oro mutu koroho.’

Tama ro ibo, ‘Mo oro mutu namado-oroho-ri mo etou nakomu namadi-omia-ri oro ro?’

17 Ina Iuda ro ibo, ‘Oro nanigosi dawade anamadi-ememeiriai-ri.’

Tama ro iato gutura ibo, ‘Io modobo ie tauo mo ata namabu ata domia-ro mo umoro koi sapuwo to ibo morobise to ido nanigosi dawade oro ro amadi-ememeiriai-ri. Oro edi namabu ro nato anama-emowameai-ri.’

18 Iuda ro ibo, ‘Ina mo ro oro etou namabu nama-omia-ri oro umoro kiamo sapuwo to?’

Tama ro ibo, ‘Abora oro ro diaiwai-maro isitoro wagoha ato na-woroidiro oro simara masiro mutu, ibose oro kiradiouti gonopu.’

Iato Iuda ro aise giaiwai-ma edi namabu teibo ro taie nou ro iato goworohuti era gabo to. Iedi tau ato na-goroho-rido iedi atu saiki ro nato Tama niro aise gowea. 19 Tama imese gorowameai nou ro edi obotama na-iroidiro nou ro kipurutai taie garamio obotama iato giroiti.

20 Iuda namutuna Haira iato gemeiriai nanigosi dawade mutu edi orobo nou aboto ina Iuda edi namabu teibo ro na-giaiwai-ma nou emowameai-ma rie. Ina iedi orobo ro egea se gosora, nou ro owea pua.

21 Taie Haira ro iato gimodoruti duriomoro urubia ibo, ‘Iedi era gabo orobo ro na-imidirotiti Enaimu to kodouti gabo bara ato nou bato omidiro?’

Neio ro ibo Haira ato, ‘Ata era gabo orobo ata nato omidiro pua.’

22 Iato Haira imese gorowameai nou ro ibo Iuda ato, ‘Mo ro egea se nosora. Ata era gabo orobo ata omidiro pua sabowa rubi ibo utura-diemo.’

23 Taie Iuda ro ibo, ‘Marasio iodio namabu teibo ro ba-miworohuti-ma. Modobo pua neitiro gaga kimororouti-ma. Mo ro ta-nemeiriai nanigosi dawade ina iato oro ro ata kowea tato ie.’

24 Sagana peteibi ta-goroporeai-birimo, Iuda ata dubu ro nato gemowapotai ibo, ‘Oro edi etera garamu ro niro ie, era gabo to irohotiti.’

Iuda ro urubia iato gitiodorai, nou ro ibo, ‘Iedi garamu ro neito dorobai-rimo ba-datahiti-mo era to ba-deherai-mo mabu nou ro nimo sabi gesebea.’

25 Tama ido amadimo-owosuruwo-ri nou ro keba se owera se gemeiriai-ro daramunegere aboto, nou ro ibo, ‘Nodi namabu teibo ro na-nirobidiro-mamo niro nou ro nemowea. Isitoro na-woroidiro wagoha ato masiro mutu ibose kiradiouti gonopu ma-diwia-ma, etu do ra?’

26 Iuda aupise na-gou nou ro nato gieibimai-ma. Nou ro ibo, ‘Iedi orobo ro morobise ie, mo ro narasaubuti. Mo ro keba se emeiriai pua Sira nou ro edea ri, ina Tama ro nou ri gosioidiro edi tanaro ro.’

Iuda ro ido Tama aboto ina osioidiro-ri pua idaibo tanaro.

27 Tama mere koroto tau ro na-gorobai nou ro edemuai teibo giroto-ma. 28 Nou odio korowaibia ro na-gorowaibia ata mere tu se gowosuwoidiro-ro kiauri orobo ro tu mau ato karima obotama kere to se gemasaubiai isabuna.

Iato kiauri orobo ro ibo, ‘Keba se nou ro ai-die.’ 29 Kaupoti nou tu aise owiodidiro-ro. Nou tu edi kowiodidiro na-gowiodidiro iato neama ro geresia-ro nou goroto keba se. Kiauri orobo ro ibo, ‘Oro gabo keba se ibo a-wopito-die?’

Keba se edi mere goroto nou ro masiro Peresi to giduti, ibo owamo Hiburu owera to ‘Gabo opito-die’. 30 Iato tu mau ato edi mere ro na-gematahirai karima obotama kere to iato nou gowahau nou ro masiro Seraha to giduti, ibo owamo Hiburu owera to ‘Karima ia ie’. Taie.