1-2 Ata tau ato Isipi duriomoro eputa dubu nou masiro Pero auna serawo ro gorobai netewa teibo woko dubu teibo aboto, nou neito gemohuta-rido, mabu neitiro ubauba tanaro gisioidiro-rido nou aboto. Ata Pero tuba sosoro obo kemeauri dubu e, ata Pero parawa kemito dubu e. 3 Taie iedi dubu teibo ro nou ro dibura moto goro to aise giedea-ma, Iosepa bida dibura moto ato gomidiro neitiro neito gibiria-marimo.

4 Taie Pero edi moto kemeauri urubia ro neio eputa dubu ro neitiro Iosepa tu to giedea-ma iato imese imidirotiti-do tuturu tau to dibura moto goro ato.

5 Ata duwo iedi dubu teibo ro erere hiwo teibo girobu-mado. Neitiro dibura moto ato hiwo na-girobu-mado, Pero tuba sosoro obo kemeauri dubu ata hiwo gorobu, Pero parawa kemito dubu ata hiwo gorobu, neitiro hiwo teibo maumo erere ie. 6 Taie iedi kowaroho ro nato neitiro na-gireribua-rido Iosepa ro gou-ro iedi dubu teibo ro neitiro aboto, nou ro na-giwia-ma neitiro nitonito se gomidiro-rido kamadekamade tato giwaroho-ma.

7 Taie Iosepa ro iato gimodowa-ma, ‘Nitiro etou mabu ato irarowo-do kamadekamade tato etona ro iari-ma?’

8 Taie neitiro ro ibo, ‘Neitiro hiwo teibo ta-nirobu-mado nedi duwo ro nato, ina ata dubu ata ro modobo pua neitiro hiwo owera teibo maumo kimowamea-ma aboto.’

Ina Iosepa ro ibo, ‘Godi kaupoti nou se ie hiwo owera maumo nou ro kiwawuti ie. Nitiro hiwo owera ma-dorowauti-rido mo aboto.’

9 Taie Pero tuba sosoro obo kemeauri dubu ro Iosepa aboto iato gorowauti nou simara hiwo owera, nou ro ibo, ‘Mo ro hiwo to ta-niauri ata ota sere, 10 ina iedi ota sere ro ioudo netewa didi agagi peteibi neibi ro osuruwo-diebirimo. Mo ro ibose ta-niwia kakamu upa na-wosuwoduti-dumo hio to, iato iedi upa ro noudo mo ro ta-niwia kakamu na-wosuwoduti-dioumo hio to, ibose iedi kakamu ro ioudo mo ro ta-niwia iopu hio to na-wosuwoduti-dumo, iedi iopu ro imese gumuni samo to oi-dumo. 11 Ina mo ro norobidiro eputa dubu edi panikere ro, mo ro iopu isi nato nimapipiti panikere to, iato naiwai eputa dubu aboto.’

12 Iosepa ro iato gemowameai ibo, ‘Oro edi hiwo owera ro maumo mo ro anama-emowawea-ri. Netewa didi ota sere agagi peteibi ibo nowawea netewa didi saiki peteibi ie. 13 Netewa didi saiki peteibi iporeai-ibiri pua, oro eputa dubu ro ama-otiodorai-ri dibura aboudo simara woko to ama-owameai-ri, ina oro ro nou simara tu to ama-omio-ri keba se beda sosoro to womiotiti idaibo sosoro ama-omiotiti-ri. 14 Ina, tanaro patu mea se namadimo-ororosioidiro-ri, mo ba-demaragoidiro-ro oro ro, mo natonato ie, ibose mo sapuwo to Pero aboto ba-daro owera mo dibura aboudo osuruwo modobo ie. 15 Mo Hiburu duriomoro rido kou kawa ou pua, urubia ro sarupo naubai-rimo ina mo ro ata ubauba ata osioidiro pua nato. Mo kedea kawa nedea-rimo dibura to.’

16 Ina Pero parawa kemito dubu ro na-girowidiro Iosepa ro beda sosoro gemowawea tuba sosoro obo kemeauri dubu nou hiwo owera mea, nou iato gutura Iosepa aboto, ‘Mo ibose hiwo ta-norobu. Mo ro netewa didi parawa gatere peteibi niauri-ibi mo eputa ato neibi ro itomaidiro-ibi, 17 ibose ohu gatere ato iamo sirio meamea parawa ohona Pero ubi ohona ie, kaupoti pawa sirio ro iroruwo-die edi ohona ro neio ro iato giho-rimo.’

18 Iosepa ro ibo, ‘Oro hiwo owera maumo ibo ie. Netewa didi gatere peteibi ibo nowawea, netewa didi saiki peteibi ie. 19 Netewa didi saiki peteibi iporeai-ibiri pua oro Pero ro ama-owagare-ri dibura aboudo ina iato oro eputa ama-asiai-ri, oro durupi ududu nou boso rubi ro amadimo-owioro-ri ota ohu to ioudo amadi-ororidiro-ri. Pawa ioudo namadimi-iroruwoidiro-ri oro durupi neio ro amadime-ekekeouti-ri.’

20 Netewa didi saiki peteibi oroporeai pua Pero koroto saiki ro gowamo. Edi tau ro nato nou soriomu nato geremesioidiro. Nou ro sirio woko urubia iato gidabuti-ro, taie tuba sosoro obo kemeauri dubu parawa kemito dubu Pero ro nato gimodobura-maro dibura aboudo, neitiro iato giwotobowa-ma nou woko urubia sosoro gabo ato. 21 Pero ro ibo tuba sosoro obo kemeauri dubu aboto, ‘Oro simara woko to amadi-orowameai-ri.’ Iato nou woko aise gitamuai eputa dubu tuba sosoro obo panikere to kemaseduti ie tu ia to kemowou e.

22 Kaupoti parawa kemito dubu eputa aise gasiai-rimo nou ududu ota ohu rido gororidiro-ro, Iosepa ro beda sosoro gimowauti-ma, hiwo owera maumo tanaro patu ibose ti-gororosioidiro-rimo.

23 Pero tuba sosoro obo kemeauri dubu ata kimaragoidiro iamotiti pua Iosepa aboto, nou ro Iosepa woki ta-gemati.