1 Iesu Gariri obo paruo bara ato gotoi urubia sirio nou ro neido gimowauti. Neio na-gou-rimo nou aboto neio ro aise gemosopa-rimo Godi edi mea owera ro nou irowidiro ri. 2 Paruo bara ato nou ro nato giwia-ma pe teibo na-girobu-ma neti kimesere urubia ro giatai-marimo neio isa na ta-gou-rimo neti iaseruwouti ri. 3 Iesu nou Saimoni pe to aise gorora nou aboto iato gutura nou egea mere damo to owabumaidiro ri. Taie nou pe ato na-gomi urubia sirio nou ro ioudo gimowauti-ro.

4 Nou ro urubia kimowauti na-goroporeai taie nou Saimoni aboto nato gutura, ‘Pe ito ma-dowabumaidiro damo to, neti iato ba-didobiti nakere kodoro sapuwo to.’

5 Taie Saimoni ro ibo, ‘Auna dubu, nimo duwo tuturu neti egea se nimesere-dumo, ata nakere ata odoro pua neti to, kaupoti oro ro beda owera utura-die io mo ro anama-osioidiro-ri.’

6 Taie neti neio ro na-gimidai-rimo iato gidobiti-rimo nakere sirio imese ta-godoro-rimo neti kititouti aupise ie, sapuwo sapuwo rido turi nakere ro se giroridiro. 7 Ina neibi ro borubi iato giramairiai-birimo ata pe to edi urubia ro goroho-birimo neibi iwarebai-biri, neti kidimo neio atu se nakere iato giahuruti-rimo pe teibo nakere ro ta-giarumia-ma aupise kiroruo-ma. 8-10 Saimoni borubi Iemisi ra Ioane ra Sebedi mere teibo ie neitiro mutu neibi atu se nakere giahuruti-birimo a-giwagogorai-birimo.

Saimoni Pita ro na-gowea nedi tanaro ro nou kauhio to aise gomi Iesu sosoro gabo ato, nou ro ibo, ‘Abera Naramu, oro neito mamo mo aboto, mo ubauba kisioidiro dubu e.’

Iesu ro nato gutura Saimoni aboto, ‘Oro tere na ie, abora nakere beda sosoro irobo, oro ro urubia idaibo mino to ama-irobo-ri.’ 11 Taie neibi ro na-girowai-birimo nedi owera ro neibi pe teibo aise giwairio-mabirimo, beda mutu namabu ro giamo pe ato iato aise gimeseruti-birimo, ina Iesu beda moro to gou neibi ro aise gowasoro-birimo.

12 Iesu ata sabowa to na-gou-ro, iato ata dubu ta-gomidiro nou durupi imese katio ro ta-gopia-rimo. Taie iedi dubu ro Iesu nou ro na-gowea, nou kauhio to aise girimusubua Iesu edi sosoro gabo ro nato, taie Iesu aboto auna se iato gorowaro. Nou ro ibo, ‘Abera Naramu oro pupuwo korosa mutu e, oro ubi ato, mo meana dowai-ro!’

13 Iesu tu iato gitomai nou ato. Nou ro ibo, ‘Mo ubi ie oro meana kowai aboto. Abora oro meana ta-nowai.’

Nedi tanaro ro hio ia to gororosioidiro, nou edi katio ro na-giamo durupi ato imese aise gikokoiriai-rimo.

14 Taie Iesu nedi dubu ro iato gemowapotai ibo, ‘Oro ro ata dubu ata emowapotai ate. Oro ba-dou Godi ra urubia ra turituri dubu aboto oro durupi nou ro ba-memowea. Oro ro arua nakomu ba-diwou Tarena Moto to, Mose sabi ro beda sosoro aro idaibo sosoro ba-disioidiro. Ina urubia sirio neio umoro nato amadimo-oi-ri ibo oro meana ta-woi.’

15 Iedi tanaro na-gosioidiro Iesu ro, owera nato gorobodorouti. Taie iato urubia sirio nato gou-rimo nou owera irowidiro ri, daro temeteme urubia sirio nou ro meana iwaititi ri. 16 Kaupoti Iesu nou sirio tau ta-irohotiti nakara moro to Godi mutu eremowauti ri.

17 Iesu nou urubia na-gimowauti mea owera Godi sapuwo to iato ibose ta-gorowomidiro Parasi urubia Mose sabi kitamudiro urubia mutu. Neio erere sabowa rido goroho-rimo, Gariri ato iedi sabowa ro na-iamo, Iudia ato edi sabowa ro na-iamo ina Ierusarema sabowa gebari ioudo neio aise gou-rimo. Iedi tau ro nato Abera Naramu edi korosa ro ta-gowamo Iesu abato urubia meana kiwaititi aboto. 18 Taie ata togiri dubu namuturubi ro nato gowou-rimo Iesu aboto, patapata mutu. Namuturubi ro na-gowou-rimo Iesu aboto neibi ubi ie owodoro ri Iesu aboto, 19 kaupoti egea se gowaibia-birimo aise gowameai-birimo mabu bobo tato ie, urubia ro gabo imese ta-gowasiai-rimo. Taie iato neibi ata kimaragoidiro nato gowea-birimo, ‘O, ito mowioro-birimo moto ohu to.’ Taie neibi ro ohu to kowioro pito na-gemepito-birimo taie nu ioudo gowororuwo-birimo nedi dubu ro umodi to na-gowororuo-birimo Iesu beda moro ato gotoi nou nato buru kereredea ie.

20 Neibi Iesu ro ta-gieibimai-bi, ‘Io, nibi ro nedi tanaro ro kimibiria mutu osioidiro-diebimo.’ Taie nou aise gerewesegerai iedi dubu ro nou aboto, ‘Namutuna, oro ubauba mo ro a-nematopeamuti.’

21 Parasi urubia Mose sabi kitamudiro urubia neio nakara se iato gereriauri-rimo ‘Ei, nedi dubu ro modobo pua nou ro ubauba kimatopeamuti aboto, Godi masiro nou ro ubauba ta-wowai, Godi nakara se modobo ie urubia ubauba kimatopeamuti aboto, ata dubu ro kosioidiro modobo pua.’

22 Iesu umoro ta-goi neibi edi kimaragoidiro ro, beda sosoro owera to geremowagomea-birimo taie nou ro ibo, ‘Nibi etou mabu ato imaragoidiro-bimo idaibo? 23 Mo aboudo koko ra idaibo owera kutura ibo oro ubauba mo ro a-nematopeamuti, o koko ra ibo kutura deribua, dou? 24 Mo Imese Urubia Kiauri Dubu nou e, mo abato korosa towamo imese urubia ubauba kimatopeamuti aboto, ina mo ro anama-osioidiro-ri ata tanaro nibi umoro koi sapuwo to.’

Iesu iato gutura iedi dubu ro nou aboto, ‘Oro mo ro a-nemowapotai, deribua! Keta doumai! Dorowameai simara moto to!’ 25 Iedi dubu ro urubia sirio sosoro gabo ato aise geribua-ro keta na-goumai aise gosuruwo, imese gorowameai simara moto to, Godi nou ro iato imese gemowabu. 26 Iedi urubia ro neio auna se gimaragoidiro-rimo, Godi neio ro iato gemowabu-rimo. Neio nakara se iato geremowagomea-rimo, ‘Morobise ie idaibo tanaro na-wororosioidiro abora nimo ro ta-nowea-mo nedi korosa tanaro ro.’

27 Iesu Iu urubia karadabuti moto rido na-gosuruwo-ro, nou ro Riwai iato gowea takesi kimade opesi ato gomidiro. Taie Iesu ro nato gutura nou aboto, ‘Mo abora dobodoro-ro!’

28 Riwai ro edi owera ro na-girorowai nou ro sirio namabu aise gimeseruti taie Iesu nou ro saro rido iato gobodoro.

29 Riwai ro auna soriomu Iesu sapuwo to nato gosioidiro, iedi soriomu ro nou moto ato giamo. Urubia sirio ta-garadabuti ito idaibo takesi kimade rubi, arua urubia mutu. Iesu mutu neio atu moro ato gorowomidiro ohona giho-rimo. 30 Taie Parasi urubia daro Mose sabi kitamudiro urubia neio ro urubia na-giwia-rimo Iesu mutu atu moro ato na-giho-rimo, neio auna masawe ro girobai. Taie Iesu kowasoro urubia neio ro iato gimodowa-rimo, ‘Mabu boira nio nedi takesi kimade urubia ro atu moro ato na-iho-dumo, ina arua ubauba urubia mutu?’

31 Taie Iesu ro neio neito gimowameai, ‘Mea durupi urubia dokota aboto oroho-ri pua durupi meana iwaititi ri, kaupoti urubia etio ra temeteme mutu na-orowomidiro dokota ro neio durupi meana kiwaititi ie. 32 Mo ro meamea urubia iroru-ri pua neio ubauba aboudo kerewesegerai aboto. Mo a-nou-ro ubauba urubia iroru ri neio ubauba aboudo erewesegerai ri.’

33 Urubia ro iato gutura-rimo Iesu aboto ibo, ‘Ioane edi kowasoro urubia ro daro Parasi edi kiwasoro urubia ro Godi kararatoro sapuwo to neio amia saiki kiho tato korowomidiro ie. Kaupoti oro edi kowasoro urubia ro neio ro idaibo tanaro isioidiro pua, neio ohona sirio tau aise ihotiti-dumo.’ 34 Taie Iesu ro neio neito gimowameai, ‘Marete soriomu oro ro kosioidiro ato, ina urubia karadabuti ato, edi marete dubu ro neio mutu komidiro ato, urubia ohona kiho tato korowomidiro ra? E e oro ro namuturubi ohona kiho tato iwomidiro-ri pua. Nou idaibo tau ato na-womidiro nou namuturubi modobo ie ohona kiho nou mutu. 35 Kaupoti ata tau tou-die nedi marete dubu ro namadimo-owagare-ri ata moro to, taie nedi urubia ro kiho tato nato ama-orowomidiro-ri.’

36 Ina ata totomu Iesu ro urubia nou gimowauti, ‘Ata mere ro orio sedo ekekeai-ri pua ina tagara sedo pito neito kemowateai. Mabu idaibo tanaro kosioidiro ato iedi orio sedo ro ubauba kowai ie, ina edi orio sedo kere ro kowateai ato iedi sedo ro mea se obodiai-ri pua.

37 Ibose ata mere ro orio tuba tagara kepuru to arate-ri pua. Mabu idaibo tanaro kororosioidiro ato, orio tuba tagara kepuru to karate ato, iedi tuba ro keremagaubuti ato iedi kepuru ro aise kerepeputi ie, iedi tuba ro aise karasiai ie, ina kepuru ubauba koi ie. 38 Ina ibo ie, orio tuba orio kepuru to kiratuti ie. 39 Urubia dubu ubi tato ie orio tuba kidio aboto mabu nou ro tagara tuba na-idio imese modobo na-woi, taie nou ro kutura ie ibo, “Tagara tuba modobo ia ie imese, orio tuba ubauba ie.” ’